Efésios 5

1Matubu mã Deusũ bakebu kayabi pepabunã, haska Deusũ abuai haska besti txibãkĩ mawakubaĩkãwẽ. 2Haska inũ, Cristõ nuku abukĩ Deus duawanũ ika Deusũ kupiti nuku bishuĩ mawai inĩti hawẽrua keska puekĩ Deus benimawanikẽ haska Cristo nuku ishuni keskariakĩ nukubetã ikũwaĩbu dasibibube nui abunamei hiwekubaĩkãwẽ.

3Hanushũ ikũwãbumã hatu ati wakĩ hawa txakabuki dakeama yuikĩ hamapaiwẽ kemuhairakubaini hiwemisbuki. Hakia matuburã, ana hatu keska hiweama haska ikũwaĩ hiweti betsahaira hiwekĩ txutanamebaũmisbukiri ana xinaĩ hãtxama inũ txakabu atimapa tibi ana xinaĩ hãtxamari inũ kemu paekiri ana xinaĩ hãtxama haska Deusũ hawenabu uĩkatsi ikai keska besti txibaĩ hãtxakubaĩkãwẽ. 4Ha dikabi nukũ keshawẽ hãtxairã, ana dakewati hãtxa txakabu yuiama inũ, hãtxa hamapawẽ yuiama inũ, hãtxa tsua merabewatimawẽ ana hãtxama haska tibiwẽ hãtxa ana kaĩmama matũ keshawenã, Deus besti kẽwãkubaĩkãwẽ. 5Ha inũ, txanima tsuabura haska dakeama hamapai tibibe txutanamebaũmisbu inũ, hawara atimapa tibi amisburã, Cristo inũ Deus shanẽ ibuaya hatube hiwetirubumaki. Ha inũ, tsuabura hamapaiwẽ kemumisrã, dami yushĩ itsa washũ kẽwãmisbu keskawẽ taea ha haskamisbu Cristo inũ Deusbe hiwetirubumariki.

Cristo txibaĩbu ma shabaki pesea keska hiwekũkaĩtikiaki, na hãtxarã

6Tsuabũra matu beparãkĩ hamẽ matu yusĩkĩ paraĩburã, hatu nĩkayamakãwẽ. Tsuabũra Deus nĩkama hawa merabewatimakiri yusĩmisburã, Deusũ hatu kupitxakayamashanikiki. Uĩrakubaĩshãkãwẽ. 7Ha inũ, hawara txakabuwaibube ana hatube dasiyamakubaĩkãwẽ. 8Ha inũ, uatianã, nukũ Shanẽ Ibu unãkĩ ikũwãriama txakabui mexu merã ika keska mã hiwenibuki. Hamẽ eskatianã, Cristo ikũwaĩ haki dasitã matũ xinã maewatã mã betsahairawa mã ma shabaki pesea keska hiweabuki. Haska mã ma tapiã xinaĩ pe hiwekubaĩkãwẽ. 9Ha shabapã nukũ xinã betsa wamatã nuku tapĩmai tsekekaĩkĩ mia imairã, nuku duapamai inũ, nuku kayatapimai inũ, nuku txani txakatimawaikiki. 10Hawara Deusũ abuai unãtã heneama ashũkĩ benimawakubaĩkãwẽ. 11Tsuabura mexu merã nia keskashũ txakabu xinãtã matu amakatsis ikaiburã, hawa pe hayabumaki. Ana hatuki dasiama matuĩ hatu dakewakĩ shabakã kaĩma keska wakĩ shabakabi pepakiri hatu yuikubaĩkãwẽ. 12Hawara txakabuhaira hune ikaibu shabakabi yui daketiki. 13Hatũ txakabukiri mã hatu unãmaya hawara hune txakabu betsa betsapawamisbu dasibibũ shabakabi unãtirubuki, ana haska washũ hunetimarã. 14Haskakẽ haska xinã betsa watirubu xinãkĩ Deuskiri nawati yuikĩ:

“Txakabũ matu tsumarã,

mepamarikãwẽ.

Mã mawabiani hanũ beniribirãkãwẽ.

Matũ txakabu mã heneaya

Messias Cristõ hawẽ txashawẽ matu yusĩkĩ matu unãmashanikiki”,

ikaki.

15Haskakẽ matũ hiwearã, uĩrakãwẽ. Hawara mã akai txibaĩ pe bestikubaĩkãwẽ, unaĩsmapamarã, hakia unãnepairã. 16Natiã txakabu betsa betsapa huaya menã manama matũ hiwea pewarikãwẽ. 17Haska inũ, ana hawarawẽ unaĩsmapama hawara nukũ Shanẽ Ibũ matu amakatsis ikai nĩka pewatã haska xinaĩkiri tapĩrikãwẽ. 18Haska inũ, mã nushuti pae xarabu beya wanirã, hawẽ kemui xinã txãkaĩ pe mekeama mã txakabumisrã, ha henetã natiã Deusũ Yushĩ Pepa bestiwẽ kemukĩ nushukĩ akawakĩ mata wakĩ matũ huĩti benimai xinã txãkãkubaĩkãwẽ. 19Eska tibi bestiwẽ yuikĩ kẽwãkubaĩkãwẽ. Mã hatubetã ikũwaĩbube Deuskiri nawati tibiwẽ nukũ Shanẽ Ibu kẽwaĩ huĩti hirabiwẽ benimawakubaĩkãwẽ. 20Hawara mã haya inũ hawara mã hayama Epa Deusũ dasibi nuku inãmis xinãkĩ yuikĩ: “Haska hamapai xarabu mĩ ea inaĩwẽ taeshũ ẽ mia kẽwaiĩ”, akubaĩkãwẽ, nukũ Shanẽ Ibu Jesus Cristõ kena kuxipawẽ yuikinã.

Haskai duanamekũkaĩtikiaki, na hãtxarã

21Haska inũ, Cristokiri pe xinãkĩ mã duawakatsis ikairã, ikũwaĩbu betsabube binunãnãkatsis ikama hatube yununãnãma nĩkakanãkubaĩkãwẽ.

22Beneyabuũ, matu yununũ nĩkakãwẽ. Nukũ Shanẽ Ibũ matu yunua nĩkashũ mã akai keska wakĩ matũ benẽ matu yunua habebis yununamei hẽ iyamama ashũkubaĩkãwẽ. 23Haska inũ, Cristo mã ikũwaĩburã, Cristorã, matũ bushkaki. Maturã, mã hawẽ pabuki. Matũ bushka matũ mekenikaki. Habiaskari mã aĩbu beneyaburã, matũ benerã, matũ bushkaki, hatũ matu mekemisrã. 24Haskakẽ nũ Cristo ikũwaĩbũ hawẽ yunua tibi nĩkashũ nũ amis keska wakĩ matũ benẽ hamapai mia yunua nĩkashũ aĩbu tibitũ matũ beneri nĩkasama hau hatu ashũriakubainũbũwẽ.

25Aĩyãbuũ, maturi yununũ nĩkakãwẽ. Cristo habũ ikũwãshanaibuwẽ nuikĩ abui hawẽ hiwea hatu inãni keskai maturi matũ aĩwẽ nuikĩ parãma hatu abuhairakubaĩkãwẽ. 26Cristõ nuku haska wakatsi ikĩ nũ hawẽ ikũwaĩbu nuku mawashũkĩ hawena meribi txakabuma nũ shũpinũbũ hawẽ kakape nũ ikũwaĩwẽ taeshũ nuku naximamisbuki. 27Cristo habũ nũ ikũwaĩbu pepahaira hawa detsis neama hawa tari txũpima ana hawa txakabu betsa tibi hayama nukũ hiwea sheni henetã pepa meribi besti haska hatũ besu uĩkatsis ikikiki. 28Habiaskariai hawẽ bene hawẽ aĩbe ketashameshũ abuirã, hawẽ yura keskawẽ taea hunibũ hatũ aĩwẽ hau nuikubainũbũwẽ. Haska xinãkinã, hatũmebi hatũ yurawẽ nui keskakĩ hatũ aĩ abukanikiki. 29Tsuabũra hatũ yura danãma pimakĩ mekemis keska wakĩ habiaskari wakĩ Cristõ hawẽ ikũwaĩbu mekemiski, 30hawẽ yurakenã. Nukuburã, ha yurakirã, nũ hawẽ pabu tibiki. 31Haskawẽ taea haska huni inũ hawẽ aĩ yura bestitxai keskatikiri Moisés kenekĩ yuikĩ: “Haskawẽ taea hunĩ hawẽ ibubu dapashkabaĩ hawẽ aĩbe ketashametã ha dabe hiwei ana yura dabema yura bestitxai keskatiki”, hatu waniki. 32Aĩyaĩ inũ beneyai yura bestitxai keska hiwearã, mĩ tapĩtirurã, bikaki. Hakia habiaskariai Cristo inũ dasibi ha ikũwaĩbu haki dasia habiaskariki, Cristoki nũ haki dasia nũ yura bestitxai keskaburã. 33Habiaskari wakĩ haska huni tibitũ hawẽ yura ibubis mekemis keska wakĩ hau hawẽ aĩ pe mekekĩ duawakubainũbũwẽ. Haska inũ, hatũ aĩnĩ hawẽ benẽ yunuai hau nĩkashũkubainũbũwẽ.

Currently Selected:

Efésios 5: cbsBR

Highlight

Copy

Compare