Popular Bible Verses from Gianyuta 8

Share

Kakame Katin Romo oyabo kede amwon me kanyaare, ling oko bedo tie malo pi kare kame romo bala dul esawa.

Malaika me agege oko kuto agwara mere, di akako kede mac konyale kede remo oko cwei i lobo. Acel i kom adek me wi lobo oko wang, acel i kom adek me yen dedede da oko wang, kede lum dedede oko wang.

Di ango ako tingo wanga, ako winyo ekokom kame oudo tie por i malo okwidu di ekok kede dwan amalo be, “Otukwi can, otukwi can, otukwi can kame jo abedo i wi lobo bino neno ka kokuto agwara kame imalaikan adek oyapuno kuto!”

Malaika me are oko kuto agwara mere, di eko lwomo i nam adwong gimoro kame cal bala moru ati kame oudo tie liel mac.

Malaika me adek oko kuto agwara mere, di acer ati oko poto ki malo di eliel bala toc, en epoto eko umo acel i kom adek me icileta kede ataneko me pii. Nying acer nono en “Ekec.” Acel i kom adek me pii oko doko kec, di jo atot kame omato pii nono oko to, pien oudo edoko kec.

Malaika me ongwon oko kuto agwara mere, di gimoro oko dipo dul acel i kom adek me wang ceng, acel i kom adek me wang duwe, kede acel i kom adek me acerin, omio acel i kom adek me lero kame gin kimio oko doko colo, acel i kom adek me iceng oko bedo abongo lero kede acel i kom adek me iwor da oko bedo kamanono.