Popular Bible Verses from Isaaya 61

Share

Omwoyo wa Mukama RUHANGA ari ahariinye, Ahakuba MUKAMA anshukireho amajuta Kureetera abooro ebigambo birungi, Kushemba abacwekire emitima, Kumanyisa enkwatwa eby'okurekurwa, N'ababohirwe eby'okwigurirwa ekihome Kurangira abantu omwak gwa MUKAMA ogw'embabazi, N'eizooba eri Ruhanga waitu arihooreraho enzigu, Kuhuumuriza boona abarikuganya, N'okuha ab'omuri Saayuuni abarikuganya Eihunde ry'ebirabyo omu mwanya gw'eiju, Amajuta g'okushemererwa omu mwanya gw'okuganya, Omunagiro gw'okuhimbisa omu mwanya gw'omutima gw'obujune, Babone kwetwa ebiti by'okuhikiirira, Ebyabyairwe MUKAMA kumuhaisa ekitiinisa.

Omu mwanya gw'okukwatwa enshoni muryatunga emigabo ebiri, Omu mwanya gw'okuhemuka muryashemerererwa ebi mubagaine. N'ahabw'ekyo muryatunga emigabo ebiri omu nsi yaanyu, Kandi okushemererwa kwanyu tikurihwaho.

Ndyashemerererwa munonga omuri MUKAMA, Omitima gwangye gwesiimire omuri Ruhanga wangye; Ahabw'okuba anjwekire ebijwaro by'okujunwa, Yantaho ekanzu y'okuhikiirira, Nk'oku kishwera ajwara eihunde, Kandi nk'oku omugore ayehunda otubaare tw'obuguzi bwingi.

Baryayombeka omu myanya ya ira eyaasheenyirwe, Baimutsye amaju agaabaire gaahindukire amatongo, Bahunduure endembo ezaasheenyirwe, Ezaakurataine omu kusheenywa omu busingye butari bumwe.

Ahakuba nk'oku ensi emeza ebirikutooka, Kandi nk'oku omusiri gumeza ebigubyairwemu, Nikwo Mukama RUHANGA arimeza okuhikiirira n'okuhimbisa Omu maisho gw'amahanga goona.

Kwonka imwe muryayetwa abanyamurwa ba MUKAMA; Abantu babeete abaheereza ba Ruhanga waitu; Muryatungwa obutungi bw'amahanga, Mwehimbisize omu kitiinisa kyago.

Ahakuba nyowe MUKAMA nkunda eby'oburyo, Nyanga okunyaga n'okukora kubi; Kandi ndyabazimuurira omu mazima, Ndagaane nabo endagaano etarihwaho.