Popular Bible Verses from Isaaya 60

Share

Imuka, oyakye; ahakuba omushana gwawe gwizire, N'ekitiinisa kya MUKAMA kukujwereire.

Amahanga garyaija omu mushana gwawe, N'abagabe omu kumurinkana kw'okuturuka kwawe.

Ahakuba, reeba, omwirima guryashweka ensi, Omwirima ndindindi gushwekye amahanga; Kwonka MUKAMA aryakuturukiraho, N'ekitiinisa kye kikureebekyereho.

Orikukira boona obuto aryarugwamu oruganda, N'orikukira boona obukye arugyemu eihanga ry'amaani. Niinye MUKAMA; Kandi ndyakirahutsya omu bunaku bwakyo.

Eizooba tiririgaruka kukwakira nyomushana, Okumurinkana kw'okwezi tikurigaruka kukwakira, Kureka MUKAMA niwe ariba omushana gwawe ogutahwaho, Na Ruhanga waawe akaba ekitiinisa kyawe.

Eizooba ryawe tiririgaruka kurenga, N'okwezi kwawe tikurituubya kwaka kwakwo; Ahabw'okuba MUKAMA aryaba omushana gwawe ogutahwaho, N'ebiro by'okuganya kwawe biryahwaho.

Obwo nibwo orireeba, okashemuuka, Omutima gwawe gukagurukaaguruka, gukashemererwa, Ahabw'okbua obwingi bw'ebirikuruga omu nyanja buryagarukira, Obutungi bw'amahanga bukwizire.

Imutsya amaisho gaawe, omagamagye, oreebe; Boona nibateerana, nibaija ahariiwe; Batabani baawe baryaija barugye hare, Na bahara baawe baije bakiikiirwe omu mikono.

Abantu baawe boona baryaba abahikiriire, Bakubuure ensi, ebe eyaabo ebiro byona, Babe eitaagi eri nyebyariire, omurimo gw'engaro zangye, Mbone kuheebwa ekitiinisa.

Eitima tiririgaruka kuhurirwa mu nsi yaawe, n'obu kwakuba okuhwerekyereza n'okumaraho; Kureka engo zaawe oryazeeta Kujunwa, N'amarembo gaawe ogeete Kuhimbisa.

Amarembo gaawe garyaguma gaigwirwe, Tigarikingwa nyomushana na nyekiro, Abantu babone kukureetera obutungi bw'amahanga, Beebembeirwe abagabe baabo.

Amasyo g'engamira garyakushweka, Engamira nto za Midiani n'eza Efa; N'eziriruga Sheeba zoona ziryaija, Zireetsire ezaabu n'obubaane, Zimanyise hoona okusingizibwa kwa MUKAMA.

Abanyamahanga baryakwombekyera engo z'amabaare, N'abagabe baabo bakuheereze, Ahabw'okuba nkakuteera nkwiniire ekiniga, Kwonka nkusaasiire ahabw'embabazi zangye.

N'obu oraabe waatsigirweho, okangwa, Okabura ow'okukurabamu, Ndyakuhindura ow'ekitiinisa ebiro byona okukira abandi boona, Ow'kushemererwa, nk'oku obusingye burigyenda nibwihaihana.

Oryanywa amate g'amahanga, Oyonkye amabeere g'abagabe; Kandi oryamanya ku nyowe, MUKAMA, ndi Omujuni waawe, Omucunguzi waawe, Ow'amaani owa Yakobo.