Popular Bible Verses from Matie 6

Share

La nuwviaa vɔ fɔlɔn masale Hala len a dɛnɛ sandaa ndɔɔ. O kon, ɲɛm mun kpow n hendulun niaa lecoo.

Lelan la buulan le siɔdiio le, siɔdiio buulannin le ndu pila. Lepalaa-lepala le nɔ bahavɛi ndɔ.»

«Lelan ya co niaa dimullo ni maa la buulan le yoomu niaa a le ɲɛ niaa dianin-ndo le. La buulan vɛlɛ le dialun niaan a le ɲɛ niaa cuɛinunnin-ndo le. Vɛ̀ɛ̀ yoomoo hiw baloo le? Vɛ̀ɛ̀ diallon co fisa a ɲɛ cuɛinanndo le?

Kɛ nɔm, a va pɛ Hala piɛiyo, luɛi o nɔmndo cɛinin di-di, mà kindan dioo kɔɔli, mà piɛi Fuɲa nɔm o vionɔnndo nin-ndo. Fuɲa nɔm ca o vionnɔnndo nin-ndo yɔngunin nɔm ɲɛ n piɛi-yo.

Lelan mɛɛ niaa bɛnda mì la piɛi yɛ co hoo ni aa: ‹Fuɲa naa co o halataala-o, màá vana-vana sina maa ladiandaalan diola nɔmndan la co ni! Màá masale nɔmnden le hun! Màá hɛnan nɔmndo tosan o lɛŋnden coo, mɛɛ o co tosanndo o halataala yɛ!

Yɔngu naa n diaa lepalaa-lepala-o le paalen nden hau.

Mal naa haki le tɛɛmbuula naalan, mɛɛ naa bɛɛ n mal vanaa tɛɛmbuu a naa-a haki yɛ.

Mal naa mì n del o tɔɔndan nin te, kɛ baŋa naa masa ɲinaa vɔɔnda o ba. [Kani nɔm nɔ masalen, kpaayaa a biiloo le fɛɛn a fɛɛn ni. Amiina!›]

Kani te la mal pɛ vannda haki le tɛɛmbuula ndalan, Fuɲa niaa co o halataala-o bɛɛ malnin niaa haki.

La tofa vɔ yowva coocoo: a seŋ te, a kuw le, a cuungiaa ɲɛ-ɲɛ o lakonda le. Kɛ Fuɲa niaa co o halataala-o co nda baloo dɔvɔɔ. Vɛ̀ɛ̀ niaa la hiw yowva polon te?

«La cúúngiaa bolofaa o ceendo coo le. Kani o ceendo coo, o nɔla mò sɔva, kaangoa nɔla vɛlɛ mà tɛɛmbuu ndu, te kon te mì vuiya yem dioo, mà ciimbuu ndu. Kɛ la cuungiaa bolofaa o halataala, kani lon ndu, o nɔla mò sɔva le, kaangoa tɛɛmbùù ndu le, vui yim vɛlɛ dio le ndu ciimbuu le. Kani nɛɛ bolofaa nɔmndo co-a, lon koni kɔl nɔmndo vanin ni.»

«Vana-vana tiwba mò tosal vanaa bɛndua nda ŋiɔn baalaa o lepilɔɔ le. Kani o pilɛ nɛinunnin ndu, mò kaola o pilɔɔ, te kon te o yiinunnin a ò pilɛ, mò mulul o pilɔɔ kɔɔ. Lá tiwba mì la tosal Hala a volion baalaa o lepilɔɔ le.»

Te Hala cuɛi-yɔ pɛ billo yondoo nin, o co hau kɛ mò hun va siɔdii viowɔn o yin-ndo, vɛ̀ɛ̀ o kɛɛ yɛnin niaa vanndacieea cuɛyɔɔ hiovɔɔ billo coo? Mbɔ̀ laalan niaa dɔɔnan bɔɔ!

Kɛ taa va pɛ vana bala fondoo ɲɔɔ keo, ba mɛl nɔmndo sina ɲɛ ba kɛndɛ nɔmndo co tosaa-o le, haliko ma ke vana bala fondoo ɲɛ n co ndu keo-vo o vionnɔnndo nin, mì Fuɲa nɔm co cɔu o vionnɔnndo nin-ndo mingul nɔm.»

«La caa dɛ, la tosà dɛnɛ kɛndɔɔ vannda o hɔl haliko ma candu niaa le, yɔŋii niaa fola vɔ̀ngɔ̀ niaa bɛnda le sɔlaa-o Fuɲa niaa co o halataala-o o ba.

«Telen niaa co va o sumndo nin-ndo, la yii hɔlla maa vanaa muuluannda le. Kani nda, a cɛn pɛ a ɲaandiaa hɔlla le vannda cɔmndo maa o sumndo nin nda co ni. Mì dimul niaa toɲaa, a cii vɔ̀ngɔ̀ ndaa sɔla. Kɛ nɔm, taa va pɛ sumndo biyɔɔ, pulu hɔlla, mà suinun cuɛima cun kɛndɛan o lebol, haliko vannda sina maa o sumndo nin te n co le, fɔ Fuɲa nɔm vana co o vionnɔnndo nin-ndo. O kon, Fuɲa nɔm ca kon sɔɔn viannanndon-ndo dɔawnin nɔm vɔ̀ngɔ̀.»