Popular Bible Verses from Hibriyuhanen 11

Share

Emun duen kedtuu ta te Megbevayà, egketuenan ta he egkezawat ta is meupiya he ebperetengen ta. Pinaag̵i te kedtuu ta, egketag̵ù dini te g̵ehinawa ta is kedewata ta keuzemà te menge vutang he wazè te pa maahà. Is menge tipehuna he etew, nezelig̵an sikandan te Megbevayà tenged te midtuuwan dan sikandin.

Is etew he wazè din kedtuu te Megbevayà, kenà egkehimu he egkesuatan te Megbevayà is menge ulaula zin. Su is etew he ebpetavang te Megbevayà, kinahanglan he edtuuwen din he zuen Megbevayà, ne kinahanglan daan he edtuuwen din he edtuvazan te Megbevayà te meupiya is minsan hentei he edhag̵ù he ebpen-ahà te paag̵i wey sikandin mekepekid-emig̵u te Megbevayà.

Netuenan ta he is minsan hengkey he egkeahà he midlimbag te Megbevayà, ne nehimu pinaag̵i zà te lalag din. Ne tenged kayi egketuenan ta he is minsan hengkey he egkeahà ne ziyà ebpuun te kenà egkeahà.

Ne si Abraham daan, duen kandin he kedtuu. Su neketuu sikandin te Lalag te Megbevayà he ewai zin is inged din ne medhendiyà te selakew en he tanà he impenaad te Megbevayà he ibeg̵ey ziyà te kandin wey ziyà te menge kevuwazan din. Ne zutun mid-ewaan din is kandin he inged minsan pa te wazè din hanew zutun te tanà he impenaad kandin. Ne hein nekeuma sikandin dutun te tanà, midtuuwan din he egkeuma is timpu keuzemà he idata kandin te Megbevayà haazà is tanà. Ne minsan pa zutun, is ed-ubpaan din dutun, ne menge lawig dà he mid-etepan te terapal he henduen te kenà sikandin meg̵inged dutun te tanà. Ne iring din ded daan is mid-ulaula zutun te anak din he si Isaak wey is apù din he si Hakub, minsan pa te impenaad daan kandan te Megbevayà he egkeangken dan haazà is tanà.

Ne zuen daan kedtuu ni Noe su hein midleg̵uyan sikandin te Megbevayà te limas he egkehitavù, midtuuwan din, minsan te wazè din pa maahà haazà is limas. Ne mibeelan din is dekelà he avang he egngezanan te arka ne hein midlapey is dag̵at, nelibri sikandin wey is pemilya zin ne wazè dan melened. Ne pinaag̵i zutun te kedtuu zin, impesavut din he zait he edlimasen te Megbevayà is tivuuk he mekesesalà he menusiyà. Ne zutun mid-isip sikandin te Megbevayà he metazeng tenged te midtuuwan din is migkag̵i te Megbevayà.

Ne si Inuk daan. Tenged te kedtuu zin wazà sikandin mebpatey su midtulus sikandin te Megbevayà ne kenè en sikandin egkeahà dini te kelibutan su ziyè en sikandin te Megbevayà. Duen insurat he Lalag te Megbevayà he ibpesavut he te wazè pa tulusa si Inuk, nesuat is Megbevayà te menge ulaula zin.

Si Abel zengan, tenged te kedtuu zin te Megbevayà ne nehimu zin is utew pa meupiya he pemuhat kenà te impemuhat te kakey zin he si Kain. Ne tenged kayi te kedtuu ni Abel mid-isip te Megbevayà sikandin he metazeng su midawat te Megbevayà is impemuhat din. Ne minsan pa te zengan dà minatey si Abel zuen ketudluanan din kenitew tenged te mezesen is kedtuu zin.

Ne si Sara zaan is esawa ni Abraham, duen kandin he kedtuu su minsan te wazà sikandin mekeanak wey utew en sikandin meg̵urang, mibmeg̵ingey g̵ihapun tenged te kedtuu zin te Megbevayà. Umba mibmeg̵ingey sikandin su midtuuwan din is penaad kandin te Megbevayà he egkeuma is timpu he ed-anak sikandin.

Su si Abraham, ne iyan hustu he ebperetengen din he inged sikan is inged diyà te langit he kenà egkezeetan te wazè din pidtemanan. Ne iyan mibpelanu wey mibaal kayi is Megbevayà.

Ne si Moises, duen daan kedtuu zin te Megbevayà, su hein meg̵urang en sikandin, mid-ewaan din is meupiya he kebpekesavuk din diyà te valey te anak te hadì te Ihiptu, ne wazà sikandin mesuat he ed-umawen he anak te anak he vahi te hadì. Su iyan din midtumù he merasey sikandin duma te menge etew he sakup te Megbevayà, kenà te kedlipey pinaag̵i te menge salà dini te kelibutan he egkehitavù te mevavè dà he timpu. Neisip din he tuwas pa he meupiya is ked-entusa zin te kedlupig̵i kandin tenged te kedsarig din te mibpilì he hadì he ibpevulus te Megbevayà keuzemà, kenà is dekelà he ketig̵eyunan he egkekuwa zin diyà te Ihiptu. Su iyan hustu he edteg̵azan din is langun he meupiya he ibeg̵ey kandin te Megbevayà keuzemà. Ne tenged te kedtuu zin mid-awà sikandin dutun te Ihiptu su wazè din ikehandek is kepauk te hadì te Ihiptu. Ne minsan pa te utew mereg̵en is egkengeseg̵azan din wazà sikandin medlikù su henduen be te egkeehè din he eduma kandin is Megbevayà he kenà egkeahà.

Netuenan ta he impenaad te Megbevayà ki Abraham he pinaag̵i te anak din he si Isaak egkehimu he utew mezakel is kevuwazan din. Ne hein migezaman te Megbevayà is kedtuu ni Abraham, migkeg̵iyan din si Abraham he ipemuhat din si Isaak. Iyan, utew zekelà is kedtuu ni Abraham te penaad te Megbevayà ne tenged dutun wazè din isipa he kenà egkehimu he kenè din ibpemuhat si Isaak.

Duen dutun te inged he Hiriku bahi he meremerik is ulaula zin he egngezanan ki Rahab. Ne minsan pa zutun, hein nekeuma is ed-eles-eles he menge sug̵ù ni Moises he edsusi te kelig-en dutun te inged, midtuu si Rahab te Megbevayà ne midtevangan din haazà is menge etew. Ne neug̵et pa zutun hein migerà is menge zuma zin he wazà medtuu te Megbevayà, wazà sikandin iragkes tenged te kedtuu zin te Megbevayà.

Ne is menge kevuwazan ni Israyil, pinaag̵i te kedtuu zan te Megbevayà, nekerapas dan te zag̵at he egngezanan te Merig̵à he impedsuwey te Megbevayà, ne neiring te tanà he memazà haazà is imbayè dan. Iyan, is menge tig-Ihiptu he edal-as kandan, ne nengelened dan pudu su imped-uliey te Megbevayà haazà is dag̵at he impedsuwey zin.

Ne zuen daan kedtuu te menge kevuwazan ni Israyil, su hein nemekeuma zan dutun te ingkutà te inged he Hiriku ne kada andew seled te pitu he andew ed-elingkus dan dutun te kutà, ne zutun migevà te Megbevayà haazà is kutà.

Ne tenged te kedtuu zin midtuman din is Pista te Kedlevayi ne insug̵ù din he ebpelisan te lengesa te nati he kerehidu is gemawan te menge valey te menge kevuwazan ni Israyil. Umba midhimu zin heini su wey kenà mehimetayi is menge penganey he anak dan te velinsug̵uen te Megbevayà he ibpepenhimatey te langun he menge penganey he anak te menge etew ziyà te Ihiptu.

Ne si Jose zaan tenged te kedtuu zin, dutun te meg̵aan din en kebpatey, netagnè din is ked-awà te langun he menge kevuwazan te lukes din he si Israyil ziyà te tanà te Ihiptu. Ne intelaan din daan dutun he ke egenat dan en, uwita zan daan is lawa zin te minatey.

Ne si Hakub, midtuu zaan sikandin te Megbevayà su zutun te meg̵aan din en kebpatey, mibpenubtuvazan din is menge apù din he menge anak ni Jose ne zutun mid-usazey ziyà te tuked din ne mid-azap din is Megbevayà.

Ne si Isaak daan, midtuu sikandin te penaad kandin te Megbevayà su mibpenubtuvazan din is menge anak din si Hakub wey si Esau.