Popular Bible Verses from Kolosé 2

Share

Ko ia, ko e me‘a ‘i ho‘omou ma‘u ‘a Kalaisi Sīsū ko e ‘Eiki, pea mou fou ‘iate ia pē; ko e kakai kuo aka ‘iate ia, pea ‘oku langa hake ‘iate ia, pea ‘oku faka‘a‘au ke kaukaua ‘i he lotu, ‘i hono anga na‘e akonekina ai kimoutolu, ‘o mou tupulekina ai, pea ō mo ia ‘a e fa‘a fakafeta‘i.

Mou vakai na‘a faifai pea ai ha taha te ne fai‘aki ‘ene poto fie filōsefa, ‘a ia ko e koto muna mo e kākā, ‘o ne holataki kimoutolu ‘i he ‘alunga ‘o e ngaahi tu‘utu‘uni fakaeono‘aho ‘a e kakai, ‘io, ‘i he ‘alunga ‘o e ngaahi ‘elemēniti ‘o e lotu ‘a ia ‘oku fakamaama, ‘o ‘ikai ‘i he ‘alunga faka-Kalaisi.

Ko kimoutolu foki, lolotonga na‘a mou mate ‘i ho‘omou ngaahi faihala, pea ‘i ho‘omou ta‘ekamu, ‘a ē ko ho‘omou kei kakano‘ia, na‘a ne kaungā fokotu‘u hake kimoutolu mo ia, hili ‘ene fakamolemole ‘etau ngaahi faihala kotoa pē. ‘Io, hili ‘ene tāmate‘i ‘a e tohi ne fakamo‘ua kitautolu ‘aki hono ngaahi tu‘utu‘uni, ‘a e tohi ko ia na‘e tu‘u ko hotau fili: ‘io, kuo ne ‘ave ‘a e tohi mo ‘ene pūnufu‘u mai, he na‘a ne tukifa‘o ia ki hono Kolosi

Koe‘uhi ‘oku fale ‘i He‘ene ‘Afio hono kātokatoa ‘o e ‘Otua, ‘o nofo sino; pea kuo mou ‘osi fonu ‘i ho‘omou tu‘u ‘iate ia, ‘a ‘Ene ‘Afio ‘a ia ko e ‘ulu ‘o e fa‘ahinga pule mo ma‘u tu‘unga kotoa pē.

Ko ia, ke ‘oua na‘a ai ha taha te ne anga‘i kimoutolu ‘i ha kai pe ha inu, pe ‘i ha me‘a hangē ko ha kātoanga, pe ha fakamāhina fo‘ou, pe ha Sāpate; he ko e ngaahi me‘a ko ia ko ha ‘ata pē ‘o ha ngaahi me‘a ka hoko, ka ko e sino ‘o e ngaahi me‘a ko ia ‘oku tefito kia Kalaisi.