Popular Bible Verses from Proverbios 14

Share

Yusen umirkacharu ainau ningki nintimsar: Ju jintan wekaaknaka nekasan tupnik jeatatjai tu nintiminayat, nu jintaka jakatniunam jeakui tusarka nintiminatsui.

Angkan pengker nintimias nekapratniuka aintsu namangken pengkermamtikui. Antsu aints chikichnaun waring achat wakerak puja nuka ni namangken, tura ukunchincha pasemamtikratnuitai.

Aints wári kajechunka wainkar, chikich aints ainau: Nuka nekas nekau aintsuitai tinawai. Antsu aints tewari kajeuka ni netse nintaimtairin paan inakmawai.

Nuwa pengker nintimtikiartin ni weari ainaun kiakartinuitai. Antsu nuwa nintinchauka ni wearinka kiakaatsuk aya mesertinuitai.

Apu Yusen umirkaru ainauka niin pengker awajsartin asaramtai, ni uchiri ainausha nuna wainkau asar, nu nintimaurijai tuke sapijmiatsuk matsamsartin ainawai.

Apu Yusen umirkaru ainauka tuke pujusartin ainawai. Kame, aints ainau tuke sapijmiakar jingkiamua nunisarang jakatniunam weenawa nuka tuuka pujutsuk, angkanmawaru ainawai.

Aints paan nintimtin: Wikia tunaunaka nakitajai tusa, Yusen umirak pujawai. Antsu netseka: Wi wakeramurnaka pachitsuk turamnawaitjai tu nintimtumas, chikich ainaunka pengké pachiatsui.