Popular Bible Verses from Ecclesiastes 3

Share

Ating mitakdang panaun para king sablang bage; ating oras ing sablang malilyari keti king yatu.

Ating panaun ing mibait ka, at ating panaun ing mate ka; ating panaun ing tanam ka, at ating panaun a kekang pupulan ing kekang tenam. Ating panaun ning pamakamate tau, at ating panaun ning pamanulu; ating panaun ning pamanlasak, at ating panaun ning pamanalakad king melasak.

Ating panaun ning pamangiak, at ating panaun ning pamangayli uli ning tula; ating panaun ning kalungkutan, at ating panaun ning pamanerak. Ating panaun ing pamangalat batu, at ating panaun a tipunan lang pasibayu; ating panaun ning pamangaul, at ating panaun ning pamamigil king pamangaul.

Ating panaun ning pamangisi, at ating panaun ning pamanulsi; ating panaun ning pamagtahimik, at ating panaun ning pamagsalita. Ating panaun ning pamalsinta, at ating panaun ning pamimua; ating panaun ning pamakigera, at ating panaun a payapa.

Ating panaun ning pamanintun, at ating panaun ning pamamating; ating panaun ning pamanipun, at ating panaun ning pamanugse.

Balu ku king ing nanumang daraptan na ning Dios manatili king kapilan pa man; e na sukat pang dagdagan o bawasan. Makanyan ing depatan na, at ding tau ya ing karelang galangan.

Ngaku king lub ku, Parehu na lang atulan ning Dios ding taung mayap at ding e mayap, uling mitakda yang panaun para king sablang bage at king merapat.