Popular Bible Verses from Kolosi 3

Share

Buku ari ndramak udu bolo ndrokowa aha, ndrinen andra-i udu ta nadu tinen ari ja, iy nane amekes ndra-in ili tan, mwasin ta iy kabwese maha-an doh le ai. Iy kati-iy ma kamani kandriyen ta ndramak nane doh. Tasah, Laban ndramani kandriyen ndra-in taha marakon, ya aha ale kamani kandriyen ndra-in ta nadu tine aha iri rayah ja.

Len marakon badeh, aha kabudon le lakou badu kandrah, ma kaso-ok iri lakou doh. Kora-on aha kabudon le ta iri kandriyen ndra-in mene iri mwan ma badih badu kon munyak a-en hamon ta aliy.

Lakou marakon aha amekes, aha badeh, kabadok ta amekes. Bala buku aha amekes gok tiri lau le bwe, aha badeh, amekes gok ta Laban ale.

Aha badeh, lau ta Kindrei; iy aso-ok aha labai, ma iy ndrandrei aha ndrasahan iri lau tan amwenen. Eme ma, aha badeh, ka-en hamon ta kandriyen buku: Aha katikisi iri lau mwan ma badih marakon, ma kamekes mwasin kili tiri. Aha badeh, katehei so-ok ta bada aha ki-iu kili andri, ma amekes kandriyen kamunum le kili tiri mwan ma badih, ma kalelei iri kamekes ndra-in kewek taha.

Sahou ta Krais badeh, kihis handru kudu bolo ndrine aha. Aha badeh, kaleheya, ma kabatanau aha kamwenen na tanan handru doh. Aha kayah wari ta Debit, ma iri wari rayah ja ta salom, ma iri wari Malawin Ndrabun atehei udu ndrine aha ta atudun Kindrei. Lakou marakon aha amekes ma asehek badeh, aha kamekes ki-in bwele-e nyara Laban Jises, ma aha kadeu wurah kili tan, ma ta tama taha Kindrei.

Kandriyen ta aso-ok iri mwan ma badih badeh, ere bwele-en labai mara-ei ja tiri kandriyen rayah ja mene ndrasehek ndrawek taha. Ma iy badeh, atehei iri kandriyen mwasin marakon ili le winiyan, ma iy tawi ndrine aha mari i le se.

Ya, Kindrei badeh, ndratehei kohan ha-un ndrawek taha, ma iy ndramete-ei aha amak ndrame awas hawe Krais. Eme ma, aha badeh, kabadok ta akohok iri lakou badu kandrah doh. Ere kon doh, Krais badeh, udu buku kabin, ma Kindrei suruni nyaran iu ili loken mara-ei.

Krais badeh, ta amekes ndrine taha marakon amunum. Eme ma, aha badeh, katehei ndrine aha mwasin doh, kudu bwena taha ta lakou mari aha amekes. Tasah, Kindrei ndralebelei aha marakon ndra le tan. Eme ma aha kameh winiyan asahan bada aha ari le, ma aha kameh winiyan manyah are le se. Ma aha ale badeh, kadeu wurah kili ta Kindrei ta lakou marakon.

Aha badeh, ndramak hawe Krais. Eme ma, aha winiyan ba-en hamon ta kandriyen ndra-in ja bwe. Aha badeh, kadai iri kandriyen mari badu kon munyak udu ndrine aha ki-iu. Jo asehek ta kandriyen buku: Kandriyen ta karei, ma kandriyen ta amadin hawe badih o mwan tasou, ma kandriyen ta kereyani ndrine ndramak ta amekes karei, ma kandriyen ta ndrakok. Idoh i buku aha atehei bwili ndru-u aha i andri ili ta kindrei, iri amekes na sukumada kei. Tasah, lakou badu kon munyak badeh, akohok kon ta Kindrei udu bolo koha aha ja.

Tasah, aha badeh, ba-en hamon ta kandriyen badu munyak buku bwena, bwe. Aha a buku lau ndramak bwena labai. Ma kohan ha-un doh aha ndrandrei hawe Krais, idoh iri mwan ma badih badu kon munyak winiyan batou bwe. Udu mirihik hawe Kindrei, ma aton ta mada iri.

Arile, na dah badeh, aha karuwani iri kandriyen marakon doh: Aha sandra-i sala hawe iri lau rayah ja, ma samekes losen sasahan, o, ndrinem andra-i ili tiri mwan ma badih rayah ja. Ma aha sasondrokonya iri na sahou ndra-in.

Aha badeh, sawendreya iri mwan ma badih ta Kindrei. Tasah, ta koha aha, aha ndraruwani iri kandriyen marakon ta ndrine aha malen ndra-au. Ma aha ndrasahan ha-un ja. Ya, Kindrei le amwenen mene bwidi ndrine aha asahan ha-un ja. Ma len mari, iy edeu tanan ewek taha, ma iy bwidi aha asahan ha-un, ma kone ndramak doh i buku le Kindrei amwenen.

Ya, aha mwan tasou, aha badeh, kaso-ok udu aha iri, ma aha samekes ndrine iri sandra-i.

Ya, aha nah mwan ma badih, aha badeh, kanuhun boho tama aha ma tine aha iri ta lakou marakon. Laban badeh, aso-ok aha ka-en hamon tiri kandriyen buku doh.

Ya, aha badih tasou, aha badeh, kanuhun boho udu aha iri, ma ka-en hamon tiri. Tasah, aha ta Laban ma kandriyen dah badeh, amwenen labai ta madan.