Popular Bible Verses from Esaya 41

Share

Kanshi imwe mwilatiina iyoo, pantu ine ndi nenu. Mwilasakamana iyoo, pantu ine nine Lesa wenu. Nine nakulamukosha, kabili nine nakulamwafwa. Nine nakulamusunga ku kuboko kwandi ukwa kulyo kabili ukwamaka.

Pantu nine Yawe Lesa wenu, uumwikata ku kuboko kwa ku kulyo. Ndemweba nati, ‘Imwe mwilatiina, pantu nine nakulamwafwa.’

“Abantu abakulamufulilwa bakulasebana, ne nsoni shakulabekata. Abakulamulwisha bakaba nga pashili nangu cimo, kabili bakafwa.

Ine nine namufumishe ku mpela ye sonde, nine namwitile pakuti mufume kulya ku lutwe lwa calo ukushailepela. No kumweba nalimwebele nati, ‘Imwe nimwe babomfi bandi.’ Nine namusalile, kabili nshamulekeleshe iyoo.

Imwe mwakulati mwaeshako ukufwaya abalwani benu, awe tamwalebamonapo nakalya. Abakulamubushisha inkondo tabakacite nelyo cimo, bakalobafye.

Imwe mwe tufwanda tumwana Yakobo mwilatiina. Imwe mwe bena Israeli, nangu kwena mwacepesha, ala nine Yawe nakulamwafwa. Ine ne Lesa Wamushilo uwakwa Israeli, nine nakulamupusushako.

“Nomba iwe we Israeli, we mubomfi wandi, iwe Yakobo niwe uo naisalila ne mwine, imwe nimwe bamwana cibusa wandi Abrahamu.

Nkacita imilonga pa mulu wa mpili apashaba nangu cimo, nkacita no tumfukumfuku mwishika. Mu matololo nkacitamo ifishiba fya menshi, na mu calo umwauma ndi nkacitamo utumfukumfuku twa menshi.

“Ilyo abantu bandi bakalakabila amenshi, na ku mikoshi yabo ilyo kukaba imilale kulwa cilaka, ine ne Yawe nkalaumfwa uko balempapata, ine ne Lesa wakwa Israeli nshakatale mbalekelesha nakalya.

Bushe kwena nani alenga ukuti cileba ifi? Nani uulenga ukuti inkulo sha bantu shilebapo ukutulafye na ku citendekelo? Ala nine ne Yawe, ne waliko na pa citendekelo, nine wine ne Yawe nkabako na ku kupelekesha kwa fintu fyonse.

Mu ciswebebe nkaleka mukalekula imiti iyo nkalimbamo, ifimuti ifyalepesha ifya keda, ne milombwa, no muetulo, ne miolifa. Mu mawanga namo mukalalulubala imipapa, ne mikula, na paini pamo. Epakuti abantu bakaleimwena, no kwishiba bakaleishiba ukuti nine ne Yawe nabomba ifi. Bakalailuka no kumfwikisha ukuti ni Lesa Wamushilo uwakwa Israeli ewalenga ukuti ifi fibepo.