Popular Bible Verses from Esaya 40

Share

Lesa ena eukosha abacepelwa amaka akoselesha na banakile bene.

Ngefyo na balumendo bene kuti amaka yabacepa, kuti banakuka, kuti balatalansuka, no kuwa kuti bawa. Nomba abatetekela Yawe, awe bena amaka yabo yalabwela. Bema na maka nga kapumpe, ilyo babutuka ulubilo, awe bena tabanaka, ilyo benda, nalyo line amaka yabo tayapwa.

Bushe kanshi iwe tawaishiba? Bushe kanshi iwe tawaumfwako, mwa? Yawe, ala e Lesa wape, ewabumba isonde lyonse. Ena tanaka, na maka yakwe tayacepelako iyoo. No muntu kuti afilililwafye ukupima amano yakwe.

Umfweni ishiwi ilyo lilebilikisha aliti, “Panshileni Yawe inshila mu matololo. Lungamikeni Lesa wesu umusebo mu ciswebebe.

Icani ciloma, amaluba nayo yalabonsa, lelo ishiwi lyakwa Lesa wesu lyena lilabelelela lyonse.”

Lyena ninshi ubucindami bwakwa Yawe bukasokoloka, na bantu bonse bakalabumona, efyo Yawe umwine alanda.”

Imikonko yonse ishikwe, impili shonse shipaswe kumo kwine no tupili tonse, no tulundulundu twine tulinganishiwe. Apalundumana pabe apatambalala.

Akulasunga impaanga shakwe nga kacema, akulalonganya no twana twa mpaanga mu maboko yakwe, akulatusendela na pa cifuba cakwe, akulatungulula bwino bwinofye ne mpaanga ishileonsha.

Tambeni umulu, ulolekesheni. Bushe nani abumbile fyonse ifi mulemona? Nani atantika intanda shilya nge bumba lya fita, uushiita shonse mu mashina lumo lumo? Alikwatisha amaka, icakuti tapamoneka nelyo lumo ulushimubeela nangu ulwabulilapo.

Ala cabumbilwe na ulya waikala pa cipuna cakwe icabufumu pa mulu wa calo, na bantu ba pano panshi bamonekafye baba ngo tupaso kuli ena. Ewayandalika imyulu ngo mutenge kabili aifungulula nge tenti lyakwikalamo.

Koselesheni Yerusalemu. Mulelanda nankwe no mutembo kwati mulelanda no mwanakashi uulecula. Inshiku sha kucululuka kwakwe nashipwa, mwebeni ukuti nabelelwa uluse ku fyabubifi fyakwe. Ine ne Yawe kwena nalilinganyafye bwino pakumukanda imiku ibili pa fyabubifi fyakwe fyonse.”

Ishiwi lilebilikisha aliti, “Akuuma imbila, iwe Esaya.” Na ine nayasuka nati, “Ni mbila nshi ndebila?” Nalyo lyati, “Uletila auti, ala abantu bonse babafye nge cani, no bucindami bwabo bwaba nga maluba ya mu mpanga. Icani ciloma, amaluba nayo yalabonsa, ilyo Yawe apemenapo umupu wakwe. Efyo na bantu baba, nabo bene banakukafye nge cani.

Moneni, Imfumu Yawe aleisa mu maka, alecimfya fyonse no kuteeka ku maka ya kuboko kwakwe. Moneni ne cilambu cakwe ali naco, aleisa na bantu bakwe abo alubula.

Lesa wenu aletila ati, “Talalikeni abantu bandi imitima, aleni aku batalalikeni.

Nani uwingapimina pa lupi lwakwe amenshi ya muli bemba, nangu ukupimina umulu ku cisansa cakwe? Bushe umuntu kuti apimina mu lupe lumo iloba lya pano calo, nangu ukupima impili no tupili pa cipimo cakupiminako? Bushe kwalitala akuba umuntu umo uwaishiba amano yakwa Yawe? Nani uwatala afundako Yawe fimo, nangufye ukumusokako? Nikuli ani uo Lesa apandako amano, pakuti Lesa eshibe ifintu no kufitesha umo filolele? Nangu nani uo Lesa asambililako, pakuti eshibe umwakuficitila?