Popular Bible Verses from Fakahā 12

Share

Na‘e ikuna ‘e hotau kakaí ‘a Sētane, koe‘uhi ko e ta‘ata‘a ‘o e Lamí, pea mo e Folofola na‘a nau tu‘uakí. Na‘a nau tali fiemālie ke lī‘aki ‘enau mo‘uí, ‘o a‘u ki he mate.

Pea toe ongo mai ha kalanga le‘o-lahi mei langi na‘e pehē, “Kuo hoko mai ‘a e fakamo‘ui mo e ivi, mo e pule‘anga ‘o hotau ‘Otuá, mo e mafai ‘o ‘ene Kalaisí. Ko e ‘aho mo e pō mo hono talatalaaki‘i ‘e Sētane hotau kakaí ‘i he ‘afio‘anga ‘o e ‘Otuá. Ka ko eni, kuo kapusi ia mei langi.

pea kapusi ki māmani e fu‘u ngatá, ‘a e fu‘u talākoni tupu‘a ‘oku ui ko e Tēvoló, pe ko Sētane, ‘a ia ‘okú ne kākaa‘i ‘a māmani kātoa. Na‘e tuli hifo ia mo ‘ene kau ‘āngeló ki māmani.

Ke fiefia ‘a langi, mo hono kakaí kotoa. Kae tangilāulau ‘a e fonuá mo ‘ōseni, he kuo kapusi ki māmani ‘a e Tēvoló. Kuo mahino kiate ia ‘oku si‘i hono ngaahi ‘ahó, pea ‘oku teketekelili ai hono lotó.

Na‘e hoko ha tau ‘i langi, ko Maikeli mo ‘ene kau ‘āngeló pea mo e fu‘u talākoni mo ‘ene kau ‘āngeló.

Pea mātu‘aki ‘ita e fu‘u talākoni ‘i he fefiné, peá ne fakalanga tau ai ki he toenga e fānau ‘a e fefiné, ‘a ia ko e kakai ‘oku nau talangofua ki he ‘Otuá mo mateaki‘i ‘a Sīsuú.

Na‘e toki hā mai ha fu‘u faka‘ilonga ‘i he langí, ko ha fefine ‘okú ne teunga ‘aki e la‘aá, pea tu‘u hono va‘é he māhiná, peá ne kalauni ‘aki ha ngaahi fo‘i fetu‘u ‘e hongofulu mā ua. Kuo mei fā‘ele ‘a e fefiné, peá ne to‘e he‘ene langaá.

Pea fanau‘i mai ‘e he fefiné ha tamasi‘i tangata, ‘a ia te ne pule‘i ‘a e ngaahi pule‘anga kotoa ‘aki e tokotoko ukamea. Kae fa‘ao e tamasi‘í mei he fefiné ‘o ‘ave ki he ‘Otuá mo hono taloní. Kae hola e fefiné ki he toafá, ki ha feitu‘u ne tokateu ma‘ána ‘e he ‘Otuá, ‘o tauhi ai ia ‘o fe‘unga mo ha ‘aho ‘e taha afe uangeau mā onongofulu.

Pea toe hā mai mo ha faka‘ilonga ‘e taha ‘i he langí, tā ko ha fu‘u talākoni kulokula momoho ‘oku ‘ulu ‘e fitu, mo me‘a tui ‘e hongofulu, pea takitaha e ‘ulu ‘a e kalauni. Na‘á ne pae ‘aki hono hikú ‘a e vahe tolu ‘e taha ‘o e ngaahi fetu‘u he vavaá ‘o laku hifo ki māmani. Pea tu‘u atu ‘a e fu‘u talākoni ki he fefiné koe‘uhí ke fanau‘i mai pē ‘ene tamá peá ne folo leva.

Ka na‘e ‘oange ha ongo kapakau ‘o e fefiné ‘o hangē ha fu‘u ‘īkalé, koe‘uhí ke ne puna ki he toafá ‘o hao mei he talākoní. Pea na‘e tauhi ai ia ‘o fe‘unga mo ha ta‘u ‘e tolu mo e konga. Pea toki pu‘aki mai ‘e he fu‘u talākoní ha vai ‘o hangē ha vaitafé koe‘uhí kae ‘auhia ai e fefiné. Ka na‘e tokoni ‘a māmani ki he fefiné ‘o ne folo ‘e ia ‘a e vai na‘e mahua mai mei he ngutu e fu‘u talakoní.