Collective: Знайдзем жыцьцё разамУзор

Як знайсьці сваё прызначэньне ў жыцьці?

Мы часта пытаемся дзяцей: “Кім ты хочаш стаць, калі будзеш дарослым?” Шчыра кажучы, гэта даволі цяжкае пытаньне для пяцігодкаў. Але калі табе спаўняецца 18, то раптам зьяўляецца вялікая патрэба разабрацца ў гэтым. Пытаньне такое: Што я мушу рабіць з маім жыцьцём?

На шчасьце, Ісус дае нам прынцыпы, якіх мы можам прытрымлівацца. Як мы ўжо сказалі ў першым дні гэтага пляну, нашая галоўная мэта ў жыцьці — гэта любіць Бога ды людзей. Гучыць проста, але практыкаваць тое можа быць цяжка.

Любіць людзей значыць любіць іх, калі яны робяць памылкі, калі яны крыўдзяць і злуюць цябе. Гэта значыць, што перад кожным рашэньнем мы пытаемся ў саміх сабе: ці гэтае рашэньне ёсьць праяўленьнем любові да людзей навокал мяне?

Калі Ісус рыхтаваўся вярнуцца на нябёсы, то Ён зразумела патлумачыў Сваім вучням іхнае прызначэньне. У Сваім апошнім навучаньні Ён пазнаёміў нас з нашым прызначэньнем — ісьці ў сьвет і вучыць людзей слухацца Бога. Ён таксама паабяцаў быць з намі на кожным кроку.

Нашае заданьне — гэта весьці людзей да Ісуса, любячы іх, як Ісус. Зноў жа ж — тое гучыць проста, але даецца цяжка. Нягледзячы на тое, дзе ты знаходзісься, гэта ёсьць і будзе тваім прызначэньнем. Ня важна, ці ты працуеш у офісе, ці ў кавярні — хай любіць людзей навокал цябе і паведамляць ім Добрую навіну пра Ісуса будзе тваёй місіяй.

І ведаеш што? Табе ня трэба рабіць гераічныя рэчы, каб зрабіць нешта важнае. Табе ня трэба быць генэральным дырэктарам, або станавіцца пастарам, або падтрымліваць нейкую вялізную справу, каб спрычыніць зьмены. Рабіць усё тое — гэта цудоўна, але кожны з нас мае магчымасьць зрабіць нешта важнае проста празь любоў да людзей, што знаходзяцца пад нашым носам.

Дык расслабся. Пакінь непатрэбныя спадзяваньні, якія ты маеш да сябе. Бог з табой, і Ён накіроўвае й вядзе цябе да шляху, што Ён прыгатаваў для цябе.

Дагэтуль ня ведаеш, як зрабіць гэтую праўду часткай вялізных рашэньняў, якія стаяць перад табою?

Вось тры пытаньні, якія дапамогуць табе вырашыць, як жыць згодна з тваім прызначэньнем, — памятаючы, што ты можаш любіць Бога, любіць іншых і вучыць людзей ісьці за Ісусам дзе б ты ні апынуўся.

1. Што з твайго мінулага досьведу паўплывала на цябе найбольш? Твая мінуўшчына не азначае цябе, але яна можа нечаму навучыць цябе. Калі ты перажыў нейкія цяжкасьці, ці ты хочаш дапамагчы іншым людзям, якія перажываюць тое ж самае? Гэта можа дапамагчы табе вызначыць твае захапленьні.

2. Ці ты маеш пачуцьцё пакліканьня? Што выклікае ў цябе праведны гнеў? Напрыклад, магчыма, што ты адчуваеш моцнае жаданьне абараняць дзяцей у небясьпечных абставінах. Можа, ты заўсёды хацеў даглядаць хворых людзей. Што б гэта ні было, падумай, ці нейкая пэўная прафэсія можа дапамагчы табе рабіць тое, да чаго Бог паклікаў цябе.

3. Якія твае прыродныя здольнасьці? Кожны з нас мае розныя таленты, якія Бог даў нам дзеля Свае славы. Што табе даецца лягчэй за ўсё? Гэта можа дапамагчы табе вырашыць, што рабіць.

Падумай: Адвядзі трохі часу на тое, каб паразважаць над вышэй напісанымі пытаньнямі. Памаліся аб тваіх адказах і абмяркуй іх з блізкімі людзьмі. Паглядзі, ці можа гэныя пытаньні дапамогуць табе больш ясна зразумець тваё прызначэньне.

Памаліся: Божа, дзякую Табе за тое, што Ты даў нам усім розныя таленты й здольнасьці. Дапамажы мне любіць Цябе ды іншых больш ды больш. Дапамажы мне навучаць людзей. Дай мне яснасьць наконт таго, дзе й як я магу служыць Табе найлепш, і пакажы мне, якім павінен быць мой наступны крок. У імя Ісуса. Амін.