Collective: Знайдзем жыцьцё разамУзор

Ці ўсе людзі гэткія ж самотныя, як я?

У нашыя часы інфармацыя даступная для нас цалюткі дзень і ноч. Ты можаш гугліць што заўгодна калі заўгодна. У YouTube можаш знайсьці карысныя відэа пра тое, як адрамантаваць зьдзьмутую шыну, як зрабіць плян выдаткаў, або нават як прыгатаваць рамэн. І хоць веды могуць быць вельмі карыснымі, лёгка спажыць зашмат інфармацыі ў ізаляцыі — дзеля чаго мы не былі створаныя.

Бог стварыў нас, каб мы жылі ў супольнасьці зь іншымі. У царкве часта ўжываецца гэтае слова, што ў галоўных рысах азначае, што нам патрэбныя добрыя сябры. Навошта? Бо спажываньне інфармацыі ў ізаляцыі амаль што ніколі не прыводзіць да зьменаў. Нам патрэбная мудрасьць, і мудрасьць найлепш расьце ў супольнасьці.

Узгадайма пачатак. Адной зь першых рэчаў, што сказаў Бог, было “нядобра” быць чалавеку аднаму. Ён стварыў нас з патрэбай у іншых людзях. Ісус прадэманстраваў гэта нам у Сваім жыцьці й служэньні на зямлі.

Ісус абраў 12 недасканалых людзей, каб жыць разам зь імі. Яны елі разам, маліліся разам ды служылі разам. Навошта Ён зрабіў гэта? Ісусу не былі патрэбныя людзі. Бо гэта ж Ісус. Магчыма, Ён зрабіў тое, каб паказаць нам, як любіць недасканалых людзей дзеля Ягонае дасканалае мэты.

Ісус паказаў нам, што значыць мець добрых сяброў. І Ён ведаў, што тое мелася нечага каштаваць Яму. Ён ведаў, што Юда меўся здрадзіць Яму. І шчыра кажучы, Пётра таксама часам трохі баламуціў. Ён ведаў, што Пётра меўся вырачыся Яго, але Ісус усё адно любіў іх усіх.

Гэткая любоў можа служыць нам прыкладам. Часта мы так засяроджваем усю сваю ўвагу на тым, каб мець аднаго ідэальнага сябра, што мы губляем магчымасьць сябраваць зь людзьмі, што знаходзяцца пад самым носам. Калі мы знаходзім сяброў, то мы павінны любіць іх, нягледзячы на іхныя заганы, — так, як Ісус любіць нас.

Яшчэ адна карысьць ад супольнасьці — гэта тое, што Ісус ня толькі прадэманстраваў нам гэта, але Ён таксама паабяцаў быць у ёй разам з намі. Ісус сказаў, што дзе двое альбо трое сабраныя ў Ягонае імя, там Ён сярод іх. Гэта добрая падстава праводзіць больш часу зь іншымі людзьмі.

Дык вось калі ты спрабуеш плянаваць тваё жыцьцё безь людзей навокал цябе, то, напэўна, твой плян ня пойдзе так, як ты спадзяесься. Нам патрэбныя людзі, каб зьдзейсьніць нашую мэту. Нам патрэбныя людзі, каб зразумець, хто мы ёсьць. Нам патрэбныя людзі, каб падбадзёрваць ды ўзмацняць нас, маліцца з намі, кідаць нам выклікі рабіць тое, што нам падаецца цяжкім ды немагчымым, і дапамагаць нам, калі мы падаем ды церпім няўдачы.

Часам будзе цяжка. І ты ня будзеш заўсёды разумець усё. Але калі ты абярэш быць як Ісус і любіць як Ісус, то ты зразумееш, што ты ідзеш лепшым накірункам — як мы казалі ў першым дні гэтага пляну чытаньня.

Падумай: Ці ёсьць нейкія такія асобы, зь якімі ты мог бы сябраваць, але не сябруеш, бо чакаеш знаёмства з ідэальнымі людзьмі?

Памаліся: Ісусе, дзякую за тое, што Ты паказаў нам, што значыць мець супольнасьць, і што Ты паабяцаў быць сярод нас, калі мы зьбіраемся разам. Дапамажы мне больш давяраць Табе ды іншым людзям, якіх Ты памясьціў у маім жыцьці. Дапамажы мне любіць так, як любіш Ты. У Тваё імя. Амін.