Новы год, новыя ласкіУзор

Найлепшая тэалёгія не патлумачыць незразумелага ў вашым жыцьці, таму вы можаце атрымаць супакой, даверыўшыся Таму, хто валадарыць, ёсьць усім і ведае ўсё.

Той раніцай ейны голас задрыжаў, калі яна папрасіла мяне прыехаць дахаты як мага хутчэй. Мая жонка Луэла – вельмі эмацыйна трывалая жанчына. Яе цяжка ўразіць. Я ведаў, што здарылася нешта сапраўды сур’ёзнае, бо тое ўразіла яе. Я быў за шэсьць гадзін ад дому; разам з маёй памочніцай, знэрваваны, я дабраўся дахаты.

Ніколь, нашая дачка, позна ўчора ноччу ішла з працы дахаты, як яна заўсёды тое рабіла. Машына зь п’яным кіроўцам без правоў заехала на ходнік і прыціснула Ніколь да сьцяны. У яе былі страшныя пакалечаньні, улучаючы адзінаццаць пераломаў тазу й цяжкі ўнутраны крывацёк. Калі я нарэшце дабраўся да шпіталю і ўвайшоў у пакой інтэнсіўнай тэрапіі, дзе ляжала Ніколь, то я зрабіў тое, што зрабіў бы кожны бацька з хоць кропляй бацькоўскай крыві. Я разваліўся на кавалкі. Я падсунуўся да ейнага ложку, ня ўпэўнены, ці яна магла чуць мяне, і сказаў: «Гэта тата, ты не адна, і Бог таксама з табой».

Калі я ўвайшоў у той пакой, то я адчуў, нібыта ўвесь сьвет паглынула цемра. Усё ўва мне крычала: «Чаму, чаму, чаму?» Калі б я меў выбар, то я ніколі не дазволіў бы маім дзецям перажываць гэтакія рэчы. І калі б я мусіў бы выбраць аднаго з маіх дзяцей, дык я ня выбраў бы тады Ніколь; у той момант ейнага жыцьця яна падавалася надта слабой. Вобміргам нас паглынула жыцьцязьмяняльная таямніца, і ўсе нашыя тэалягічныя ісьціны не дапамаглі раскрыць яе. Ніколь выздаравела, але ёй давялося перанесьці чатыры надзвычай цяжкія гады.

Я ўвесь час разважаў аб тым, што нашае жыцьцё ня выйшла тады з-пад кантролю. Мы зноў ды зноў суцяшаліся думкай, што той нешчасьлівы выпадак не зьдзівіў і не зьлякаў Бога. Бачыце, Бог ведае ўсё. Ён ніколі ня ёсьць непадрыхтаваным да нечаканага нападу. Ён ніколі не абдумвае, што Ён будзе рабіць зь нечаканым здарэньнем. Мне падабаюцца словы з Данілы 2:22: «Ён адчыняе глыбокія й схаваныя рэчы, ведае, што ў цемры, і сьвятло жыве зь Ім».

Бог знаходзіцца побач з вамі ў вашых хвілінах цемры, бо Ён ніколі не пакіне вас. Тое, што ёсьць цемрай вам, ня ёсьць цемрай Яму. Тое, што незразумела вам, ня ёсьць незразумелым Яму. Вашыя неспадзяванкі не засьпяваюць Яго зьнянацку. Ён разумее ўсё тое, што ўводзіць вас у разгубленасьць найбольш. Ня толькі вашыя таямніцы не падаюцца Яму таямнічымі, але Ён мае поўны кантроль над усім, што зьяўляецца незразумелым нам з вамі.

Памятайце сёньня, што існуе Той, Хто глядзіць на тое, што падаецца цемрай вам, і бачыць сьвятло. Памятаючы пра гэта, памятайце таксама, што Ён зьяўляецца канчатковым азначэньнем усяго мудрага, добрага, праўдзівага, ласкавага й вернага. Ён трымае вас і вашае незразумелае ў Сваіх ласкавых руках, і праз тое вы можаце мець супакой нават тады, калі незразумелая цемра грукае вам у дзьверы.