Новы год, новыя ласкіУзор

Вось у чым рэч. Хрысьціянскае жыцьцё, царква й нашая вера ня тычыцца нас. Яны тычацца Яго – Ягонага пляну, Ягонага валадарства ды Ягонай славы.

Гэта сапраўды нешта надзвычай цяжкае. Гэта супярэчыць нашай інтуіцыі. Гэта тое, што прыводзіць у беспарадак нашае жыцьцё й прыносіць непаразуменьні ў нашыя ўзаемаадносіны. Гэта тое, што адцягвае нашую ўвагу й выкрадае нашыя жаданьні. Гэта тая рэч ніжэй за ўсе астатнія рэчы, якая даказвае нашую патрэбу ў ласцы. Гэта бітва, якой ніхто ня можа пазьбегчы. Гэта тое месца, дзе дзесяці зь дзесяці нас патрэбны паратунак. Гэта тая бойка, якую Бог вядзе за нас, каб дапамагчы нам памятаваць, што жыцьцё папросту ня круціцца вакол нас. Яно круціцца вакол Бога – Ягонага пляну, Ягонага валадарства й Ягонае славы.

Менавіта з гэтае прычыны першыя словы ў Бібліі, магчыма, зьяўляюцца найважнейшымі словамі ў ёй: «На пачатку Бог…» Гэтыя словы зьяўляюцца надзвычай важнымі. Яны сапраўды зьмяняюць усё: ад таго, што вы думаеце пра сваю таясамасьць, значэньне й прызначэньне, да таго, як вы ставіцеся да найбольш малаважных чалавечых абавязкаў. Усё, што было створана, было створана Богам і дзеля Бога. Усё хараство створанага сьвету было прызначана дзеля таго, каб паказаць Ягонае хараство. Сусьвет належыць Богу, і Ён заплянаваў усё так, каб ён дзейнічаў паводле Ягонае мэты й пляну. Тое ўлучае нас з вамі. Мы не былі створаныя дзеля таго, каб жыць незалежна й саманакіравана. Нам не было прызначана існаваць паводле нашых уласных эгаістычненькіх праекцікаў і дзеля нашых уласных момантаў славы. Не, мы былі створаныя, каб жыць дзеля Яго.

Як жа гэткае накіраванае на Бога жыцьцё выглядае на практыцы? Мы павінны практыкаваць такое жыцьцё ня толькі ў рэлігійным вымярэньні нашага жыцьця, але ў кожнай сфэры нашага існаваньня. Мне падабаецца, як Павал піша аб гэтым у 1 Карынцянаў 10:31: «Дык ці ясьцё, ці п'яцё, ці іншае што робіце, усё рабеце на славу Божую». Калі Павал кажа пра пакліканьне жыць дзеля Божае славы, то ён ня мае на ўвазе толькі вялікія, уплывовыя, сьвядома духоўныя моманты жыцьця. Ён мае на ўвазе гэткія звычайныя ды аднастайныя рэчы, як ежа й пітво. Нават найзвычайнейшыя, на першы погляд нязначныя дзеяньні майго жыцьця павінны падпарадкоўвацца й накіроўвацца шчырым жаданьнем прынесьці славу Госпаду. Ня ведаю як наконт вас, але я асабіста губляю Божае існаваньне з вачэй праз занятасьць гэтага жыцьця, і я ўжо не кажу пра Ягоную славу!

Пачнем новы год, прызнаўшы, што для нас няма нічога меней натуральнага за жыцьцё дзеля славы некага іншага. Гэтае прызнаньне адчыняе дзьверы не адчаю, а надзеі. Бог ведаў, што, будучы грэшнымі, вы ніколі ня здолелі б жыць так, дык Ён паслаў Свайго Сына пражыць жыцьцё, якое вы ня здолелі б пражыць, памерці за вас і ўваскрэснуць, перамогшы грэх ды сьмерць. Ён зрабіў тое ня толькі дзеля таго, каб вы змаглі атрымаць прабачэньне за вашае эгаістычнае жыцьцё, але й дзеля таго, каб вы маглі атрымаць ласку, патрэбную вам, каб жыць дзеля Яго. Калі вы прызнаяце вашую патрэбу ў дапамозе, то вы атрымліваеце доступ да ратунку, які Ён ужо забясьпечыў у асобе Свайго Сына Ісуса. Атрымайце надзею, зноў працягнуўшы руку па гэны ратунак сёньня.

Даведайцеся болей пра кнігу Пола Дэйвіда Трыпа «New Morning Mercies: A Daily Gospel Devotional».