Die Sewe Rolle Van Die Heilige GeesVoorbeeld

Die Heilige Gees Is Ons Vereniger

Die boek Handelinge vertel ons, nadat die eerste dissipels met die Heilige Gees gedoop is, het hulle "hulle heelhartig toegelê op die leer van die apostels en die onderlinge verbondenheid, die gemeenskaplike maaltyd en die gebede" (Handelinge 2:42). Die Griekse woord koinonia, wat gebruik word vir gemeenskap, verskyn hier vir die eerste keer in die Bybel en word dan 18 keer in die Nuwe Testament gebruik.

Koinonia, wat ook as "vennootskap" vertaal kan word, is 'n bonatuurlike genade wat Christene daartoe lei om mekaar innig lief te hê. Dit was nie voor Pinkster moontlik nie, want dit is 'n verpersoonliking van die inwonende Heilige Gees. Net soos die krag van die Heilige Gees ons in staat stel om die siekes te genees of wonderwerke te verrig, weef sy koinonia ons harte en bind ons saam.

Na die uitstorting van die Gees in Handelinge 2, het koinonia daartoe gelei dat die vroeë dissipels hul besittings onselfsugtig onder mekaar gedeel het (vv. 44-45) en om dikwels maaltye saam te geniet (vers 46). Baie mense het besluit om Christene te word toe hulle hierdie liefdevolle gemeenskap waargeneem het (vers 47).

Koinonia was 'n noodsaaklike bestanddeel in die Nuwe Testamentiese kerk. Dit is wat Paulus, Timoteus, Lukas, Titus, Priscilla en Aquila as 'n span saamgebind het. Dit is wat die vroeë Christene bymekaar gehou het te midde van vervolging, en wat hulle gelei het om hulle lewens vir mekaar af te lê.

Ons moet terugkeer na koinonia — maar jy kan dit nie aflaai of vervals nie. Ons sal kunsmatige, gebeurtenis-gedrewe programme moet skrap as ons die Christenskap wat op verhoudinge gebaseer is, soos in Handelinge, wil hê. Ons sal die Heilige Gees moet uitnooi om sy werk te kom doen sodat ons deur sy bonatuurlike band met ons broers en susters in Christus saamgebind kan word.