Waarom Paasfees?Voorbeeld

Vryheid waarvoor? 

Jesus is nie meer fisiek op die aarde nie, maar Hy het ons nie alleen gelaat nie. Hy het sy Heilige Gees gestuur om by ons te wees. Wanneer sy Gees in ons kom woon, gee Hy ons 'n nuwe vryheid.

Vryheid om God te ken

Die dinge wat ons verkeerd doen, veroorsaak 'n hindernis tussen ons en God: "jou oortredinge het jou van jou God geskei" (Jesaja 59: 2). Toe Jesus aan die kruis gesterf het, het Hy die hindernis wat tussen ons en God bestaan het, verwyder. As gevolg hiervan het Hy dit vir ons moontlik gemaak om 'n verhouding met ons Skepper te hê. Ons het sy seuns en dogters geword. Die Gees verseker ons van hierdie verhouding, en hy help ons om God beter te leer ken. Hy help ons om te bid en om die Woord van God (die Bybel) te verstaan.

Vryheid om lief te hê

"Ons het lief omdat God ons eerste liefgehad het" (1 Johannes 4:19). As ons na die kruis kyk, verstaan ​​ons God se liefde vir ons. Wanneer die Gees van God in ons kom woon, ervaar ons daardie liefde. Wanneer ons dit doen, ontvang ons 'n nuwe liefde vir God en vir ander mense. Ons word vry om 'n lewe van liefde te leef — 'n lewe wat gesentreer is om Jesus lief te hê en te dien, en om ander mense lief te hê en te dien, eerder as ‘n lewe wat op onsself fokus.

Vryheid om te verander

Mense sê soms: "Jy is wat jy is. Jy kan nie verander nie." Die goeie nuus is dat ons met die hulp van die Gees wel kan verander. Die Heilige Gees gee ons die vryheid om die soort lewens te leef wat ons nog altyd wou leef. Paulus sê vir ons dat die vrug van die Gees "liefde, vreugde, vrede, geduld, vriendelikheid, goedheid, getrouheid, sagmoedigheid en selfbeheersing" is (Galasiërs 5: 22-23). As ons die Gees van God vra om binne-in ons te kom woon, begin hierdie wonderlike eienskappe in ons lewens groei.