Hoe Om Vrede Te Vind

Dag 1 van 10 • Vandag se leesstuk

Bybeldagboek

Die Fondasie van alle Vrede


Nie so lank gelede, net voor 'n praatjie, het ek en 'n spanlid iets te ete geniet langs die Weskus. Terwyl die jong kelnerin ons bedien, vra ek haar: “As jy God vir enigiets in jou lewe kon vra, wat sou dit wees?”


Sonder om te huiwer antwoord sy: “Ek sou vra vir vrede.”


Met trane in haar oë vertel sy ons toe van haar ouma se afsterwe, slegs 'n paar dae vantevore.


Soos sy vertel, besef ek dat niemand in haar familie - sy inkluis - in God geglo het nie. Sy het God bewustelik verwerp. Sy was wel bewus van 'n diepe rusteloosheid in haar, al het sy nie regtig geweet hoe om hierdie beroering aan te spreek nie, en ook nie wat dit veroorsaak nie. Soos vele mense daar buite het sy van dag-tot-dag gelewe, sonder enige betekenis, met geen ware doel in haar lewe nie.


Hierdie jong vrou verteenwoordig so baie van ons vandag - ons gaan deur die aksies, streef net daarna om van dag-tot-dag te oorleef, soekend na 'n weg alhoewel die lewenspad duister voor ons lê, en so probeer ons sin maak uit alles.


Te veel kere voel dit asof daar net nooit voldoende antwoorde is op ons menslike dilemmas nie—veral die vraag oor hoekom ons soms so leeg en sonder vrede voel nie. Om alles te kroon lyk dit asof daar net nooit genoeg redes is vir ons om aan te hou probeer nie, en dan net aan te hou ly onder die teëspoed van die lewe.


Die jong kelnerin het die kwessie vir ons in haar terme verduidelik: “Ek soek vrede.” Ander sou sê: “Ek is eensaam.” Sommige sou sê: “As my man/vrou my maar net sus en so sou liefhê, sou ek gelukkig wees.” Verskillende weergawes, maar almal met dieselfde deuntjie: “Daar is iets verkeerd... ek is ongelukkig. Ek het geen vrede nie. Wat is fout met my?”


Die meeste mense wat die slagoffers is van die boodskappe van ons sekulêre samelewing, ondervind hierdie leemte en sien nie dat hulle probleem verband hou met God nie. Ons word gedurig gebombardeer met die samelewing se eise: “As jy maar net maerder was, meer styl gehad het, 'n luukse Jaguar gery het, in 'n beter woonbuurt gewoon het, meer geld verdien het …” die lys gaan aan en aan. Maar geeneen van die bogenoemde gesogte antwoorde op ons probleme, of enige van die honderde ander redes wat aan ons voorgehou word, kan permanent en bevredigend dit waarna ons so smag, voorsien nie.


Die jong kelnerin was reg: Die meeste van ons smag na iets meer—en die alles-omvattende woord wat dit so mooi beskryf is vrede.


En as 'n pastoor vir meer as ses dekades, kan ek jou dít vertel: Totdat jy nie vrede met God het nie, sal jy nooit ware vrede in hierdie lewe ondervind nie.