Hoe om swaarkry en lyding te hanteer预览

Die stryd teen twyfel en ongeloof

“En Jesus sê vir hom ... ‘Alles is moontlik vir iemand wat glo.’ Onmiddellik roep die vader van die kind uit: “Ek glo! Kom my ongeloof te hulp!” (Markus 9:23-24 AFR20).

In Genesis 3 is dit die eerste keer dat die Satan in die Bybel genoem word. Hy praat met Eva en saai twyfel in haar hart. Hy laat haar glo dat God nie so goed en betroubaar is as wat sy gedink het Hy is nie. Eva se geloof in haar Skepper wankel en sy neem 'n dramatiese besluit wat die hele mensdom in 'n ramp dompel.

Deesdae probeer die Satan steeds ongeloof en twyfel saai. Ideaal gesproke sou hy natuurlik graag wou hê dat mense glad nie aan God dink nie en Hom nooit leer ken nie. Wanneer mense egter opreg in die Bybelse boodskap belangstel, probeer hy hulle geloof uitdaag.

Ons sien baie voorbeelde in die Bybel van mense wat vol geloof is, maar ook van mense wat twyfel. Een so 'n voorbeeld is 'n pa wat met sy siek kind na Jesus toe kom. Hy wil bitter graag hê sy seun moet gered word, maar sy geloof is so swak! Hy roep in trane uit: “Ek glo; help my ongeloof”. En Jesus help hom. Sy kind word genees.

As jy twyfel en jou geloof is geskud, wees bewus daarvan dat dit 'n aanval van die Satan kan wees. Vra Jesus om jou geloof te versterk en enige ongeloof uit jou hart te verwyder.