Vergifnis van sonde deur die bloed van die Lam

Ragab se verhaal is ‘n inspirerende getuienis van hoe God vergifnis skenk aan dié wat in Hom glo, ongeag hulle verlede. Vergifnis, volgens die Bybel, is ‘n daad van liefde en genade waar iemand die skuld of fout van 'n ander persoon nie toereken nie, maar eerder die oortreding vryskeld, dit wil sê, nie teen die persoon hou nie.

As ‘n vrou wat in ‘n stad van afgodediens en morele verval gewoon het, sou sy waarskynlik as een van die onwaarskynlikste kandidate vir God se genade en vergifnis gesien word. Tog wys haar verhaal dat God se vergifnis geen grense ken nie.

Haar oortuiging om die rooi tou as ‘n simbool van die bloed van Jesus Christus, uit haar venster te hang, het vergifnis vir haar moontlik gemaak en daardeur is sy gespaar van die fisieke verwoesting van Jerigo en ook van die ewige oordeel. Sondevergifnis het reg deur die geskiedenis gepaard gegaan met die vergieting van bloed.

In die Ou Testament het offers van diere se bloed vergifnis van sonde moontlik gemaak, maar in die nuwe Testament het Jesus, die volmaakte Lam van God, sy bloed aan die kruis uitgestort om die finale betaling vir ons sonde te bring. Hy het nie net ons sondes bedek nie, maar dit volkome weggeneem en ons ewige Hoëpriester geword sodat geen toekomstige sonde ons kan verwyder van die liefde van God in Jesus nie. Wanneer ons op die krag van sy bloed vertrou, ervaar ons vergifnis van sondes, vryspraak van veroordeling en oorwinning oor die dood.

Gaan jy op die oomblik gebuk onder die las van sonde? Jesus het vir jou sonde gesterf en aan die Kruis sy bloed uitgestort sodat jy vergewe kan word. Aanvaar Jesus se offer as genoegsaam vir jou sonde en skande.

Jy moet ook ‘n rooi tou aan die venster van jou lewe vasmaak. Jy doen dit deur jou vertroue in Christus Jesus se offer te plaas en jou sonde te bely: “As ons egter ons sondes bely, Hy is betroubaar en regverdig om ons sondes te vergewe en ons skoon te maak van alles wat verkeerd is” (1Johannes 1:9, NLV).

Gebed

Here, dankie dat U ons vergewe deur die bloed van Jesus. Help ons om, soos Ragab, ons geloof in U te plaas en u vergifnis met dankbaarheid te aanvaar. Amen.