1 Koridɨ 6
6
Kɨraazɨtɨyarɨ lɨmwaga'dɨvɨsara kotɨya mamarinɨpɨne'nesɨ.
1Sarɨmɨjɨya pwai kwai sarɨmɨjɨya pwarɨ wɨja'na yagaalya' kɨnɨnnakei Gotɨyare tewaanyara yawɨbwarya'neraavɨ pari'ma'dei dɨngaka! A'mwe Gotɨyarɨna yɨda'maraangera mamwaalyɨgasara mu'nyadɨvɨsaraayabanna kotɨya' yaawadelyɨ. Sai sasare sabwina wagɨla muvwa'nyadei dɨngaka! 2“Gotɨyare tewaanyara a'mwe Kwaakevakɨya yuyaraavɨre sabwi maryawɨbwaranganya'neraavɨ sahwai wɨmwaaihaderera,” sarɨmɨ daza'na myawɨrijɨhivanɨga'! Nabaai dɨvi sarɨmɨ a'mwe yuya Kwaakevakɨyaraavɨ maryawɨbwapɨja' dahaa' yagaala maalɨka sarɨmɨjɨyaremɨlɨ' dazasare samɨlɨ'na sarɨmɨ yɨnɨga wi'na maryawɨbwapɨneihi daaka! 3Yɨ “Nemɨ lɨmwaga'daanyaina ejelɨyaraavɨre sabwi kɨbulyɨ maryawɨbwaraadeinera,” sarɨmɨ dazavɨ myawɨryɨvanɨgasaihi daa! Yɨ sarevɨ dahaasagaa' nemɨre mwaalya davurɨya yagaalyangɨna nemɨ wi'na nebulya'na maryawɨbwaraanneine. 4Yɨ sarevɨdaa'nyɨ mwaalya davurɨya yagaalya' kɨnɨnnakeihi mwaaibɨzaihi yagaala savɨ mwasɨlaanyara maryawɨbwarya'neraavɨ nadahɨlakɨpɨdɨka! Kɨraazɨtɨyare kusɨlaanyavɨyaihi yawɨ'na “Sahwaraavɨre kuryara bainɨkera waryaanyarera.” Yɨ sahwaraavɨ sarɨmɨre kotɨya'na be'na wɨmwaaihɨvanɨgataraavaka! 5Yagaala dɨwe daza' kadɨka wɨ'nɨpɨja' sarɨmɨrebwina wagɨla yɨhɨvwa'naja' yɨ sa' tewaanyasɨ. Sarevɨ sarɨmɨnyɨdaa'nyɨ sɨrya'mwe saraarɨ yagaalyavɨ yɨnɨga maryawɨbwarannei aane pwai kwai midaaka! Sɨmunnakei sarɨmɨnyɨ tɨnnyaba mwaalɨkei pwai kwai midaaka! 6Sarɨmɨ yɨda'nanyabwina mamɨdɨnyɨvanɨga'. Aawa. Neya'mwe pwai neya'mwe pwarɨ kotɨya maryadelyɨ. Yɨ nabaai Kɨraazɨtɨyarɨ malɨmwagyadɨvɨsara kotɨya maryawɨbwarya'neraayaba sara yadelyɨ. Tewaanyabwi daaka! 7Sarɨmɨ saihi kotɨya marinadɨvɨsaihɨlyɨ. Yɨ sasare saburɨdaa'nyɨ Saataanɨ yune yɨhɨthathɨwamanɨkeihɨlyɨ. “Nemɨ kave baihana'na yadawaari kayaa'nanya' neya'mwe pwai kwai gamɨnna neyana!” majɨ baa'na yɨvanɨga'! “Baihana'na yadawaari nemɨre gɨlyɨvɨsa neya'mwei nemwagi'nana!” majɨ be'na yɨvanɨga'! 8Sarɨmɨ sɨrya'mwerɨna yavada'galya'nebwi mabɨramaarivanɨga'. Aawa. Yune sarɨmɨ saihina kayaa'nanya' yadɨvɨsaihɨlyɨ. Pwaraavɨ kayaa'na yɨbwaakya' yadɨvɨ' gɨlyɨvɨsa wɨmwagi'nadɨvɨsaihɨlyɨ. Yɨ sasare sabwi sarɨmɨjɨya sɨrya'mweraavɨ dazahwaraavɨ yadɨvɨsaihɨlyɨ.
9Sarɨmɨ dathavɨna myawɨrijɨwaa'! “A'mwe kayaa'nanyabwi yadɨvɨsara Gotɨyare maremwaaide' sa' maapɨ'dera mɨ'.” Akai, sarɨmɨ yune sarɨnnya sɨmunyangɨna kwaasɨ nadakɨnɨpɨdɨka! Yɨ darebulyɨ. A'mwe yaasɨwa'na marɨdaakunadɨvɨsarajɨ yɨ a'mwe kwaasɨ gotɨya yɨta, sɨla saraavɨ mɨdɨdɨvɨsarajɨ yɨ a'mwe pwaraavɨre a'mwengɨ ata lɨmwadɨvɨsarajɨ yɨ a'mwera kayaa'nanya wagɨla wɨvwa'nya'ne a'mwe pwarajɨ ye'mwannayadɨvɨsarajɨ 10yɨ kukerajɨ yɨ tɨganaarya yadɨvɨsarajɨ yɨ biyaaya pɨnɨ nadɨvɨ' yɨmaka widɨvɨsarajɨ yɨ a'mwera a'mwe pwaraavɨ yagaaibɨraizɨka wɨdangadɨvɨsarajɨ yɨ kuka yɨpalamaa'dɨvɨsarajɨ a'mwe sasare yuya dazara Gotɨyai maremwaaide' maapɨ'dera mɨ'. 11Nabaai sɨnnawɨ sarɨmɨjɨya pwara dazabwi sasara mwaalesaihɨlyɨ. Kuna kayaa'nanya sangɨ mamwaaipɨneihɨlyɨ. Aawa. Naanga Jizaazai Kɨraazɨtɨyarɨne yayavɨjɨ nemɨre Gotɨyare Kuryai kwarɨjɨ Gotɨyai aalya mena yɨhyada gamɨnne tewaanyaihɨrɨ mena yɨhɨmwaaihada gamɨnyɨne yɨda'maraangeihɨrɨ mena yɨhɨthahɨlakakeihɨlyɨ.
Gɨrɨkita'nanyaburɨnesɨ.
12“Yuya yɨwɨja nɨmɨ ya'neinyɨ kɨmaakɨya madakɨnyɨkengɨ.” Kɨrɨ' nabaai nyɨmaremwaalojɨ yuya sa a'mweraavɨ wɨgaimwade mɨ'. “Yuya ya nɨmɨ ya'neinyɨ kɨmaakɨya madakɨnyɨkengɨreva.” Kɨrɨ' nabaai nɨmɨnyɨ aane pɨrɨ' kɨrɨ' yɨwɨja' dɨvi wɨla nanyɨradɨka! 13“Tɨka wapaaya sa yɨ munyɨkɨnengɨ. Yɨ munyɨ' wapaaya maarya'nikɨ.” Sare kɨrɨvɨ nabaai Gotɨyai wapaayasɨ nemɨre kɨlaakejɨsɨ yuyawaai yasɨ'nadelyɨ. Kɨlaaka sajɨ'na yɨhɨthɨma! Kɨlaakejɨ' yaasɨwa'na marɨdaakunyɨna ya'nejɨ' mɨ'. Aawa. Sajɨ' yune Naangerɨna wɨdaaya'nejɨkɨ. Yɨ Naangei sai kɨlaakejɨkɨna maremwaalya'nelyɨ. 14Gotɨyai bainɨkeraayawɨdaa'nyɨ Naangerɨ yɨdɨkaavakelyɨ. Yɨ nabaai dɨragɨnya' yune gannyavɨna nemɨre kɨlaakejɨka baidezɨkaavɨjɨ avaala sasara neyɨdɨkaavadelyɨ. 15Sarɨmɨ dara myawɨrijɨwaa'! “Sarɨmɨre kɨlaakejɨka yɨ Kɨraazɨtɨyare kɨlaakejɨkɨya pimagɨnyajɨkera.” Sarevɨdaa'nyɨ nɨmɨ Kɨraazɨtɨyare kɨlaaka pimagɨnya pɨjɨ' maara'mujɨ a'mwe kwalawa' ganaangevɨne kɨlaaka pimagɨnyajɨ' mɨwɨrɨdezɨ' daaka! Arɨkewɨnyɨ. 16Aawa. Sarɨmɨ davɨna myawɨrijɨvanɨga'! “A'mwei a'mwe yaarɨdaa'ne sasɨ yɨraku'nemwaalojɨ yɨ sai a'mwe savɨjɨ avaaikɨlaaka yɨma'nadelyɨ.” Sare' darevɨnyɨ. Gotɨyai sare sa'na mena dara dakelyɨ “A'mwelyɨ a'mwesɨ sawaai kɨlaaka gave pɨjɨ'na yɨma'nyɨkadezɨkɨra.” 17Nabaai a'mwe pwai Naangelyɨ yɨraku'nemwaalojɨyai yɨ sai kuryai gave pwainanyai yɨma'nyɨkadelyɨra. 18Kayaa'na gɨrɨkita'nanyabwi sarɨmɨ yagalya'ma'na yapɨjɨ lɨkaanya dɨwila! Wagɨla yuya pɨnɨ a'mwera yɨpɨja, sa kɨlaakejɨkɨ mwasɨmagɨnyangɨ. Kɨrɨ' a'mwe yaasɨwa'na marɨdaakunyɨna yadei yɨ sai gannya kɨlaakejɨkɨ kusawɨnyavɨ kayaa'nanyabwi wɨjaavɨnadelyɨ. Sare'na sabwi mipɨnera!
19Sarɨmɨ da'na myawɨrijɨwaa'! “Sarɨmɨre kɨlaakejɨ' yɨ Kurya Tewaanyai wɨlayɨhɨmwaalɨkere anga nawɨ'nyasɨ.” Gotɨyarɨneba Kurya sai kɨnɨnnakeihɨlyɨ. Sarɨmɨ sahwaihi yune sarɨmɨnyɨneihi mɨ'. 20Aawa. Sare' darevɨnyɨ. Gotɨyai nɨgwia naangesɨ sarɨmɨnyɨ ayahi yɨhɨmubamaarakelyɨ. Sare'na sarɨnnya kɨlaakejɨkaavɨ Gotɨyarɨne yaya' munyaba nayaa dɨmakɨlyɨla!
Đang chọn:
1 Koridɨ 6: byr
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2013, Wycliffe Bible Translators, Inc. All rights reserved.