Marcos 13

Templuta ushakätsiyänanpaq kanqanta Jesús willakunqan

Mateo 24.1-2; Lucas 21.5-6

1Templupa patiunpita yarqïkaptinmi juk discïpulun Jesústa kënö nirqan: <<¡Rabí, rikë! ¡Imanö jatusaq rumikunawanmi templuta y lädunchö këkaq cuartukunatapis shäritsiyashqa!>>

2Jesúsnam nirqan: <<Kë llapan rikäyanqëkita chipyëpam juchutsiyanqa. Manam ni juk rumillapis perqarëkar quedanqatsu>>.

Manaraq kutimuptin imakuna kananpaq Jesús ninqan

Mateo 24.3-14; Lucas 21.7-19

3Templu tsimpan Olivos jirkachö japallankuna jamëkarmi Pedro, Santiago, Juan y Andrés Jesústa tapukuyarqan: 4<<Teyta, willëkayämë. ¿Imëtaq nishqëkinö kanqa? Tsënö kananpaq ¿ima señaltaq kanqa?>>

5Jesúsnam nirqan: <<Paqtam pipis engañayäshunkiman. 6Atskaqmi shutïchö shayämunqa <noqam Cristo kä> nir. Tsënö nirmi atskaq nunakunata engañayanqa. 7Guërra kaptinpis y guërra kananpaq kashqanta musyarpis ama mantsakäyankitsu. Puntataqa tsëkunaran kanqa. Tsënö kaptinpis kë patsaqa manaran ushakanqaraqtsu. 8Juk nacionmi juk nacionwan guërrata rurayanqa y juk marka nunakunam juk marka nunakunawan wanutsinakuyanqa. Tsënöllam mëtsëchöpis patsa kuyunqa. Muchïpis alläpam kanqa. Tsë jipakïkunaqa kanqa qallananllaran.

9<<Mäkuq mäkuq kayanki. Chikiyäshurnikim prësu tsarïkur autoridäkunaman apayäshunki. Sinagögakunachöpis astayäshunkim. Noqa rëkurmi gobernadorkunamanpis y reykunamanpis prësu apayäshunki. Tsënöpam willakïnïta pëkunatapis willayanki. 10Manaraq kë patsa ushakaptinmi jinantin nacionchöpis noqapaq willakuyanqa.

11<<Autoridäkunaman apayäshuptikipis ama llakiyankitsu <¿imataraq nishaq?> nir. Tsë höram imata parlayänëkipaqpis Espíritu Santu käyitsiyäshunki. Manam kikikikuna yarpäyashqëkitatsu parlayanki, sinöqa Espíritu Santu käyitsiyäshushqëkitam.#Mat. 10.17-20; Luc. 12.11-12. 12Tsënöllam wawqin wawqinta, tëtan tsurinta y tsurinkunana tëtankunata wanutsiyänanpaq autoridäkunaman entreguëkuyanqa. 13Noqa rëkurmi pïmëpis chikiyäshunki. Tsënö chikiyäshuptikipis wanuyashqëkiyaq markäkamurqa salvashqam kayanki.#Mat. 10.22.

Jipakïkuna kananpaq Jesús käyitsinqan

Mateo 24.15-28; Lucas 21.20-24

14<<[Profëta Daniel qellqashqannöllam] Teyta Dios melanashqan kaqta templuchö rikäyanki.#Dan. 9.27; 11.31; 12.11. (Kë qellqashqäta leyiqkunaqa shumaq käyikuyätsun.)#13.14 Kë qellqashqäta leyiqkunaqa shumaq käyikuyätsun nishqanqa manam Jesucristo nishqantsu këkan, sinöqa kë libruta qellqaq Marcos yapashqanmi. Tsënöta rikar Judeapa markankunachö täraqkuna jirkakunapa safakuyätsun. 15Wayi jananchö këkaqkuna#13.15 Tsë witsanmi wayita qatananpa rantin terrädu jananman tsaqllarir leqitawan taqrayaq. Tsë jananchömi awakuyaq, aqakuyaq y trïgutapis akrayaq. imankunatapis mana jorqushpa ewkuyätsun. 16Chakrachö këkaqkunapis ama ponchunkuna jorquq kutiyätsuntsu.#Luc. 17.31. 17¡Allaw, imanöraq jipayanqa qeshyaq warmikuna y llullu wawayuq warmikuna! 18Teyta Diosta mañakuyë safayanqëki junaq tamya killachö mana kananpaq.

19<<Tsë witsanqa nunakuna alläpam jipayanqa. Teyta Dios kë patsata kamashqanpitam nimëpis tsënöqa jipayashqatsu. Tsënöllam yapëqa manana imëpis tsënö jipayanqanatsu.#Dan. 12.1; Apoc. 7.14. 20Akrashqan nunakunata ankuparmi Teyta Dios tsë jipë junaqkunata pasatsinqa. Mana pasatsiptinqa llapanpis wanurmi ushakäyanqa.

21<< <Teyta Dios kachamushqan Cristo këchömi këkan> niyäshuptiki ama creyiyankitsu. <Wakchömi këkan> niyäshuptikipis ama cäsuyankitsu. 22Tsë witsanmi Cristo tukuqkuna y uli profëtakunapis yuriyämunqa. Nunakunata creyitsiyänan rëkurmi espantëpaq milagrukunata rurayanqa. Tsënö rurarmi Teyta Dios akrashqan nunakunatapis engañëta munayanqa. 23Pëkunata mana creyiyänëkipaq shumaq käyikuyë. Manaraq tsënö kaptinmi musyayänëkipaq willëkäyaq>>.

Jesús kë patsaman kutimunanpaq kanqan

Mateo 24.29-44; Lucas 21.25-33

24<<Tsëpitanam alläpa jipakïkuna pasariptin intipis tutapakurkunqa, killapis atsikyanqanatsu, 25qoyllurkunapis shikwayämunqa y ciëlupis karkaryanqa.#Isa. 13.10; Joel 2.10, 31; 3.15; Apoc. 6.12-13. 26Tsënam nunakuna rikäyanqa Nunapa Tsurin pukutë jananchö chipapëkar alläpa puëdiq këninwan shamïkaqta.#Dan. 7.13; Apoc. 1.7. 27Tsëpitanam angelninkunata kachamunqa akrashqan kaqkunata mëtsëpitapis ëlluyänanpaq.

28<<Hïgus montita rikar käyikuyë. Raprankuna tseqllimuptinmi usya tiempu qallananpaqna kanqanta musyayanki. 29Tsënöllam niyashqaqnö pasakushqanta rikar musyayanki Nunapa Tsurin kutimunanpaqna kashqanta. 30Rasunpam niyaq: Kanan tiempu nunakuna manaraq ushakäyaptinmi llapan niyashqaqkuna cumplikanqa. 31Ciëluwan kë patsa ushakaptinpis noqa nishqäkunaqa manam ushakanqatsu.

32<<Nunapa Tsurin imë junaq imë höra kutimunanpaq kanqanta manam ciëluchö këkaq angelkunapis ni Diospa Tsurinpis ni pï nunapis musyayantsu.#Mat. 24.36. Tsëtaqa Teytällam musyan. 33¡Mäkuq mäkuqlla këkäyë! [Teyta Diosta mañakuyë.] Manam musyayankitsu imë kutimunanpaq kashqanta>>.

34<<Shumaq käyikuyë. Juk nunash karupa ewkur wayinta täpayänanpaq sirwiqninkunata umpakunaq. Punku kichapakuqnintanash käyitsinaq mäkuq mäkuqlla këkänanpaq.#Luc. 12.36-38. 35Tsëmi mäkuq mäkuq kayänëki. Wayiyuq#13.35 Wayiyuqpaq parlarqa kikinpaqmi Jesucristo parlarqan. imë kutimunanpaq kashqanta manam musyayankitsu. Patsa tutapärëkaqtsuraq, pullan paqastsuraq, gällu waqë höratsuraq o patsa warëtsuraq chämunqa. 36Paqtaraq mana yarpäyashqëki höra kutimur punukashqata tariyäshunkiman. 37Manam qamkunallatatsu nikäyaq, sinöqa llapan nunakunatam. Tsënö willapëkäyaptiqqa mäkuq mäkuqlla këkäyë>>.

Đang chọn:

Marcos 13: qwhB

Tô màu

Sao chép

So sánh

Chia sẻ