Marcos 11
11
Jerusalénman Jesús yëkunqan
Mateo 21.1-11; Lucas 19.28-40; Juan 12.12-19
1Jerusalénman Jesús ëwarmi Olivos jirkachö Betfagé y Betania markakunaman chäyarqan. Tsëpitam ishkaq discïpulunkunata kachar 2nirqan: <<Taqë markaman ëwayë. Chärirmi pipis manaraq montashqan pollïnu watarëkaqta tariyanki. Tsë ashnuta paskarir apayämï. 3Tsëchö pipis <¿imanirtaq ashnuta paskayanki?> niyäshuptiki <Señor Jesúsmi wanan. Rätullatam kutiratsiyämushaq> niyanki>>.
4Discïpulunkuna ëwarmi tariyarqan wayi punkuchö pollïnu watarëkaqta. Tsë wayiqa näni kuchunchömi këkarqan. Paskayaptinmi 5tsëchö këkaq nunakuna kënö tapuyarqan: <<¿Imanirtaq ashnuta paskayanki?>> nir.
6Discïpulukuna Jesús yachatsishqannölla niyaptinmi <<tsëpinqa apayë ari>> niyarqan.
7Ashnuta chäratsir aqshunankunata karunariyaptinmi Jesús montarqan. 8Montashqa ëwaptinmi atskaq nunakuna aqshunankunata näniman mashtar Jesústa kushishqa chaskiyarqan. Wakinnam palmërapa raprankunata pakir pakir näniman churayarqan. 9Tsëmi puntanta ëwaqkuna y qepanta ëwaqkunapis kushikur niyarqan: <<¡Hosana!#11.9 Israel nunakuna Hosana niyarqan Teyta Diosta alabarmi. ¡Teyta Diospa shutinchö shamuq nuna alabashqa këkullätsun! 10¡Pëmi unë castantsik Davidnö rey kananpaq shamïkan! ¡Ciëluchöpis alabashqa këkullätsun!>>
11Jerusalénman yëkurnam Jesús ëwarqan templupa patiunman. Tsëchö rikapakurirmi tardina kaptin chunka ishkë discïpulunkunawan Betania markaman kutikuyarqan.
Hïgus montita Jesús tsakiratsinqan
Mateo 21.18-19
12Waränin junaq Betaniapita Jerusalénman Jesús kutikarmi mallaqarqan. 13Tsëmi hïgus montita raprayuqtana karupita rikëkur wayïninta ashiq ëwarqan. Wayïninta ashirninpis tarirqantsu. Wayunanpaq tiempun manaraq kaptinmi rapranllata tarirqan. 14Tsëmi kënö nirqan: <<¡Kananpitaqa manam imëpis wayunkinatsu!>>
Tsënö nishqantam discïpulunkuna wiyayarqan.
Templuchö rantikuqkunata Jesús qarqunqan
Mateo 21.12-17; Lucas 19.45-48; Juan 2.13-22
15Jerusalénman chärirnam templupa patiunman yëkurir rantikuqkunata y rantipakuqkunatapis Jesús qarqurqan. Tsënöllam qellë trocatsiqkunapa mësankunatapis#11.15 Jesús kawanqan witsanmi Roma nunakunapa qellëninta Israel nunakuna inshiyaq imatapis rantipakuyänanpaq. Tsënö kaptinpis Teyta Diospaq ofrendata apayänanpaqqa templuman apananpaq kaq qellëtaran trocatsiyaq. y urpë rantikuqkunapa cajonninkunatapis jitar usharqan. 16Tsënöllam nunakunata piñaparqan templupa patiunpa imatapis mana pasatsiyänanpaq. 17Tsëpitanam nirqan: <<¿Manaku kënö qellqashqa këkan: <Wayïqa jinantin nación nunakuna mañakayämänanpaqmi kanqa>?#Isa. 56.7. Tsënö nikaptinpis qamkunaqa suwakunapa machëninmanmi tikraratsiyarqunki>>.#Jer. 7.11.
18Tsënö nishqanta wiyëkurmi mandakuq sacerdötikuna y ley yachatsikuqkuna parlayarqan Jesústa imanöpapis wanutsiyänanpaq. Wanutsita munarpis Jesús yachatsishqanta nunakuna kushishqa chaskiyaptinmi pëkunata mantsar prësu tsariyarqantsu. 19Patsa tsaqarëkaptinnam Jerusalénpita yarqur Jesús ewkurqan.
Hïgus montita tsakishqatana tariyanqan
Mateo 21.20-22
20Waränin qoya Jerusalénman discïpulunkunawan Jesús kutirmi rikäyarqan hïgus monti pasëpa tsakishqana këkaqta. 21Jesús nishqanta yarparmi Pedro kënö nirqan: <<Rabí, <manam wayunkinatsu> nishqëki hïgus montita rikäri. Paqwë tsakishqanam këkan>>.
22Jesúsnam nirqan: <<Teyta Diosman markäkuyë. 23Rasunpam niyaq: Pipis llapan shonqunwan Teyta Diosman markäkur y nishqannö kananpaq kashqanta creyirqa taqë jirkata <këpita lamarman ëwë> niptinpis ëwanqam.#Mat. 17.20; 1Cor. 13.2. 24Teyta Diosta mañakurqa chaskiyänëkipaq kanqanta creyiyanki. Tsënö creyirqa mañakuyashqëkita chaskiyankim.
25<<Tsënölla Teyta Diosta mañakuyashqëki höra piñatsishuqnikita manaraq perdonashqa karqa juklla perdonayë. Tsënö perdonayaptikiqa qamkunatapis ciëluchö këkaq Teytëki perdonayäshunkim.#Mat. 6.14-15. 26[Nuna mayikita mana perdonayaptikiqa qamkunatapis jutsa rurayashqëkipita manam perdonayäshunkitsu]>>.
Jesústa sacerdötikuna tapuyanqan
Mateo 21.23-27; Lucas 20.1-8
27Tsëpitanam discïpulunkunawan Jerusalénman Jesús chäriyarqan. Templupa patiunchö Jesús purikaptinmi mandakuq sacerdötikuna, ley yachatsikuqkuna y precisaq Israel nunakuna 28tapuyarqan: <<Qamqa ¿pipa poderninwantaq rantikuqkunata qarqurqunki? ¿Pitaq nishurqunki tsënö qarqunëkipaq?>> nir.
29Jesúsnam nirqan: <<Qamkunatapis mä tapuyashqëki. Tapuyashqaqta yaskiyämaptikiqa noqapis willayashqëkim pipa poderninwan qarqushqäta. 30¿Pitaq Juanta kachamushqa bautizananpaq? ¿Teyta Diosku o nunakunallaku? Mä niyämë>>.
31Tsënö tapuptinmi kikinkunapura ninakuyarqan: <<Teyta Dios kachamushqanta nishqaqa: <¿Imanirtaq creyiyarqunkitsu?> nimäshunmi. 32Jina manam nishwantsu nunakuna kachayämushqanta>>.
Tsënö niyarqan nunakunata mantsarmi. Juanpaqqa profëta kashqantam llapan nunakuna niyarqan.
33Tsëmi Jesústa kënö niyarqan: <<Manam musyayätsu pï kachamushqantapis>>.
Jesúsnam nirqan: <<Noqapis manam willayashqëkitsu pipa poderninwan rantikuqkunata qarqushqäta>>.
Đang chọn:
Marcos 11: qwhB
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2018, Wycliffe Bible Translators, Inc. All rights reserved.
