ZLI VIRZI 38
38
Ɓi ngi Zuda ati Tamar
1Hirak ti nah na, Zuda a slikiɗ baɗ avu sukum naŋhaya, aru ngi hay mbur ada a Adulam, a zilaka Hira. 2Zuda a pur zuŋ ngi mbur Kanaˀan a diga, a zilaka Suwa. A zuɓa, a ɗuvaŋ. 3Ngwas tuwa, a gi hur, a yi mangal mizile, Zuda a zila Er. 4A gi hur ma, a yi mangal mizile tuwa ma, mumuŋ a zila Onaŋ. 5A dirba nah, a gi hur ma, a yi mangal mizile tuwa ma ni, mumuŋ a zila Sela. Naŋ miya Sela na, naɓa Zuda aro a Kezip zleˀe. 6Er mangal naŋ modogomo, Zuda a zuɓaŋ ngwas a zilaka Tamar. 7Er, mangal modogom ngi Zuda, a cira hiri da Bumbulvuŋ ta, a ga ɓa Er a mucu. 8Dar Zuda a ɓa Onaŋ na: «Aru ng'avu ngwas ngi vagay sukum ɗike, ngila kaɓa mangilam ngwas ngi sukumuŋ, ɓa ki yi ar deɗe ngi vagay sukum ɗike.» 9Amma Onaŋ a si na le, a sa yi di i tizer nga naŋ ta, da naŋ mira hin ti ngwas ngi sukumuŋ na, a pa vu naŋ nga hirwuy, ɓa a ya tizer ngi sukum naŋ ta. 10Gwat ngi gi naŋ hana, a cira hiri da Bumbulvuŋ ta, a ga ɓa naŋ vuna kwana, a muc aya. 11Dar Zuda a ɓa dideˀ naŋ Tamara: «Cifi wudiga a hay bunuku, hã mangal ɗu Sela a gil kwaɗay.» Naŋ kine, a ɓi zleˀe ti kwacay naŋ na: «Anja mangal ɗu hana, ara muc kaɓa sukum naŋhay na mata!» Dar Tamar a ru, ara cifi a hay cine. 12A zikam, a zikam na, zuŋ ngi Suwa, ngwas ngi Zuda a mucu. Hin ngi vagay mikiɗ mi na, Zuda a ram nga Timna ati ngama naŋ Hira mbur Adulam, ngi hay mizli misli ngwic ngi tumuŋ naŋhay. 13A ɓaka ɓi nah da Tamara: «Pura, dideˀ ɗik ara ru nga Timna, a sli ngwic ngi tumuŋ naŋhay.» 14A cuko zana ngi wudiga avra, a sirta vu sirit sirit ti lafaye, ko mbur a sinaŋ mata, dar ara cifi a mizlingre ngi walahay Enayim, a ciki jiviɗ ngi Timna. Asi a pura na, Sela a gil le ngbaŋ, amma ko a vulakaŋ di ɓa a gi di ngwasa ta. 15Zuda a pura Tamara, a wa kaɓa i burvula, asi a sirta hiri le tuwaŋ. 16A ngizli ng'ava a ciki jiviɗe, a ɓaŋ: «Haya! Puliy ɓa i hin ti ka!» Asi i dideˀ naŋ na, Zuda a si na ta. Tamar a mbiɗan di: «Ki sa vuliy mi ɓa ki hin ti ya vunaka?» 17Zuda a ɓaŋ: «I sa slinuw ti ˀaw minjaslsla ngir gezleŋ ɗu.» Tamar a ɓaŋ: «Haˀaw, sey ki jikiy gwat jak le ngi kutuko mislin ɗike.» 18A cufuɗaŋ: «I jukuw gwat mi ska?» A mbiɗaŋ di: «Gwat ngi ɗuva slimiɗ ɗike jom ti zeweɗ naŋ gar waɗ ganday mikaw a haŋ ɗik na.» Zuda a vulaŋ taŋ, a hin di, a gaŋ hur. 19Tamar a slikiɗ, a cuh, a cuko zana misirit sirit tuwa, avra. A ka zana ngi wudiga naŋ a muŋ. 20Zuda a slino ngama naŋ, mbur Adulam ti ˀaw minjaslsla tuwa, ɓa a tuɓo gwat naŋ mijika taŋ da ngwas tuwa ya, ko ngama naŋ a luuma ngwasa ta. 21Joˀ a cufuɗa mizli ngi kẽheye: «Burvula macifi zleˀe a jiviɗ ngi Nayim na, naŋ amaka?» A mbiɗakaŋ di: «i puram burvula ɗaˀ aka ta.» 22Hira a mo ng'avu Zuda, a ɓaŋ: «I luuma ta, yo mizli ngi digahay a ɓam ma na, a puram burvula ɗaˀ a diga ta.» 23Zuda a ɓi ma: «Anja a ndir ti gwataya. Anja mizli a singiram ar ndra ta, ani yi slinaŋ ti zuŋ ˀaw minjaslsla le, yo ka kwana, ki luuma ta.» 24A gi kiya makir a dirba naŋ na, mbur a sawa, a ɓa Zuda: «Dideˀ ɗik Tamar a gi sulome le, mukuy ta vuna ma na, a gi hur le ti sulome naŋ vuna!» Zuda a ɓi: «Bam di nga duba gala, ɗuvakaŋ vu ɓa a wur titiri.» 25Ti taŋ mabam di na, Tamar a slin ng'avi dideˀ naŋ, ɓa a ɓakaŋ: «Migiy huro i buy ngi gwat hanayna.» Dar a ɓi ma: «Gwat ngi ɗuva slimiɗ jom ati zeweɗ naŋ waɗ ganday hana, i ngi wahay ka, si na so!» 26Zuda a si na taŋ le, a ɓi: «Tamara naŋ jeŋŋe a finiy le, asi yi vulaŋ da mangal ɗu Sela ta.» A dirba nah Zuda a hin di ɗaˀ mata wãˀ. 27Tapas Tamar mayi muduba na, dambalaka i ziri misahay misi a kwacaya. 28Pal a bo ti haŋ. Ngwas miyi ngwasay, a jaŋ, a juwaŋ gugumay gagaza avu haŋ, a ɓi: «Hana a bo dumbuŋ.» 29Mangal tuwa, a mi ti haŋ muŋ, misa bawa i sukum naŋ. Ngwas miyi ngwasay a ɓi: «Kaɓa ki slino li mekelem ti slin mbrike?» A cakaŋ slimiɗe Peres, mbiɗeˀvra: «li mislina» 30A dirba nah, sukum naŋ misi gugumay gagaza a vu haŋ tuwa, a bawa ya. A cakaŋ slimiɗe Zera.
Đang chọn:
ZLI VIRZI 38: BEGDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Bible en Langue Guiziga © L’Alliance Biblique du Cameroun, 2011.