ᒐᓔᑎᐊᒥᐅᓄᑦ 6

ᐃᑲᔪᖃᑦᑕᐅᑎᒋᑦᓯ ᐅᖁᒤᒃᓴᕐᑐᖃᕈᑦᓯ

1ᐅᒃᐱᕐᑑᖃᑎᒃᑲ, ᑕᒻᒪᕐᓂᕐᒧᑦ ᓵᓚᐅᔪᖃᕐᐸᑦ, ᐅᒃᐱᕐᓂᖃᑦᓯᐊᕐᑐᓯᒍᑦ ᐋᖅᑭᓱᒐᒃᓴᕆᕙᓯ ᐊᓂᕐᓂᒃᑯᑦ ᓂᖃᒋᓗᒍ ᓱᐊᖓᑐᐃᓐᓇᖏᓪᓗᒍ. ᓇᖕᒥᓂᕐᓗ ᖃᐅᔨᓴᑦᓯᐊᕐᓗᑎᑦ, ᐱᐅᓐᖏᑐᒧᑦ ᐱᔪᒥᓵᕐᑕᐅᓕᖁᓇᑎᑦᑕᐅᖅ ᑍᒤᑦᑐᒧᑦ. 2ᐅᖁᒤᑦᑐᑎᒍᑦ ᐃᑲᔪᖃᑦᑕᐅᑎᖃᑦᑕᕆᑦᓯ, ᑍᒤᓕᐅᕈᑦᓯ ᑕᕝᕙ ᙭ᔅᑑᓯᐅᑉ ᐱᖁᔭᖓᓂᒃ ᓈᓚᖕᓂᐊᕐᐳᓯ. 3ᐱᐅᔪᕆᔪᖃᕐᐸᓪᓕ ᓱᓇᐅᖏᑦᑑᒐᓗᐊᕐᓗᓂ, ᑖᓐᓇ ᓇᖕᒥᓂᕐᒥᓂᒃ ᐅᐃᕕᕐᕆᕗᖅ. 4ᓇᖕᒥᓂᕐᓕ ᐱᓂᐊᕐᓂᒥᖕᓂᒃ ᖃᐅᔨᓴᕐᓕᑦ, ᐱᓂᐊᕐᓂᖓ ᐱᐅᔫᒃᐸᑦ, ᑕᕝᕙ ᐱᓇᓱᐊᓚᐅᕐᑕᒥᓂᒃ ᐅᐱᒍᓲᑎᖃᕈᓐᓇᕋᔭᕐᐳᖅ, ᐊᓯᒥ ᐱᓂᐊᕐᓂᕆᓯᒪᔭᖏᓐᓂᒃ ᐃᓱᒪᖏᓪᓗᓂ. 5ᐃᓄᐃᑦ ᑕᒪᕐᒥᒃ ᐊᒡᔭᒐᒃᓴᒥᖕᓂᒃ ᐊᑐᓂᑦ ᐊᒡᔭᕐᓯᔭᕆᐊᖃᕐᒪᑕ.

6ᐅᒃᐱᕐᓂᕐᒥᒃ ᐊᔪᕆᕐᑐᕐᑕᐅᔪᖅ ᐃᓕᓮᔨᒥᓂᒃ ᑲᑐᑦᔨᖃᑎᖃᕐᑐᒃᓴᐅᕗᖅ ᐱᐅᔪᓂᒃ ᐱᓯᒪᔭᓕᒫᒥᓂᒃ.

7ᐅᐃᕕᕐᕆᔭᐅᑦᑍᓕᒋᑦᓯ; ᒎᑎ ᒥᑕᐅᑎᒋᔭᒃᓴᐅᖏᒻᒪᑦ, ᐃᓄᒃ ᓇᖕᒥᓂᖅ ᑲᓐᖓᕐᓲᑎᒋᓚᐅᕐᑕᒥᓂᒃ ᑲᑎᕐᓱᐃᔪᒫᕐᒪᑦ. 8ᑎᒥᐅᑉ ᐱᔪᒪᔭᖓ ᒪᓕᒡᓗᒍ ᑲᓐᖓᕐᓱᐃᔪᖅ ᑲᑎᕐᓱᐃᔪᒫᕐᐳᖅ ᐊᓯᕈᕐᑕᐅᑦᔪᑎᒃᓴᒥᓂᒃ; ᐊᓂᕐᓂᕐᒧᓪᓕ ᑲᓐᖓᕐᓱᐃᒃᐸᑦ ᐊᓂᕐᓂᕐᒥᑦᑕᐅᖅ ᑲᑎᕐᓱᐃᔪᒫᕐᐳᖅ ᐃᓄᓯᕐᒥᒃ ᓄᖑᓱᐃᑦᑐᒥᒃ. 9ᑍᒤᒻᒪᑦ ᐱᐅᔪᒥᒃ ᐱᓇᓱᐊᕐᓂᕆᔭᕗᑦ ᐃᕿᐊᓐᖒᑎᑦᑍᓕᓚᕗᑦ; ᓄᖅᑲᐅᑎᖏᒃᑯᑦᑎᒍ, ᑕᕝᕙ ᑲᑎᕐᓱᓕᕈᒫᕐᐸᕗᑦ ᑲᓐᖓᕐᓲᑎᒋᓯᒪᔭᕗᑦ. 10ᑍᒤᒻᒪᑦ, ᐱᕕᒃᓴᖃᕐᓂᑦᑎᓐᓂ, ᐃᓅᖃᑎᓕᒫᑦᑎᓐᓂᒃ ᐱᓂᐊᕐᕕᖃᑦᓯᐊᕐᑐᒃᓴᐅᕗᒍᑦ, ᐅᒃᐱᕐᑑᖃᑎᕗᓪᓕ ᐱᓗᐊᕐᓗᒋᑦ.

ᑭᖑᓪᓕᕐᐹᑦ ᐅᖃᐅᓰᑦ ᑕᕝᕙᐅᕗᑏᕐᓃᓪᓗ

11ᑕᑯᕗᓯ ᑎᑎᕋᕐᑕᒃᑲ ᐊᖏᔫᑕᐅᖕᒪᑕ ᓇᖕᒥᓂᖅ ᑎᑎᕋᕋᒃᑭᑦ. 12ᑍᒃᑯᐊ ᑎᒥᒃᑯᑦ ᖁᕕᐊᒋᔭᐅᔪᒪᔪᑦ ᐃᓕᑦᓯᓐᓂᒃ ᑭᐱᔭᐅᖁᔨᕗᑦ, ᑍᒤᓕᐅᕐᐳᓪᓕ ᐊᑭᕋᕐᑐᕐᑕᐅᔪᒪᓇᑎᒃ ᙭ᔅᑑᓯᐅᑉ ᓴᓐᓂᖓᔪᓕᖓ ᐱᓪᓗᒍ. 13ᑭᐱᔭᐅᓯᒪᔫᒐᓗᐊᑦ ᐱᖁᔭᓂᒃ ᓈᓚᒃᐸᖏᒻᒥᖕᒪᑕ; ᑭᐱᔭᐅᓯᒪᖁᕚᓯᓗ ᓂᕐᑐᕐᓇᐅᑎᖃᕈᒪᓪᓗᑎᒃ ᑭᐱᔭᐅᓂᐅᑉ ᐊᑐᕐᑕᐅᔭᕆᐊᖃᕐᓂᖓᓂᒃ ᐊᑐᕐᑎᑦᓯᓂᕐᒥᖕᓂᒃ ᐃᓕᑦᓯᓐᓂᒃ. 14ᐅᕙᓐᓄᓪᓕ, ᓂᕐᑐᕐᓇᐅᑎᒃᓴᑑᕗᖅ ᐊᑕᓂᑦᑕ ᔩᓱᓯ ᙭ᔅᑑᓯᐅᑉ ᓴᓐᓂᖓᔪᓕᖕᒥ ᑐᖁᓂᕆᓚᐅᕐᑕᖓ; ᓴᓐᓂᖓᔪᓕᖕᒥᓗ ᑐᖁᓚᐅᕐᓂᖓᓄᑦ ᓯᓚᕐᔪᐊᖅ ᑐᖁᖓᔪᑎᑐᑦ ᐅᕙᓐᓄᑦ ᑍᒤᑉᐳᖅ, ᐅᕙᖓᓗ ᑐᖁᖓᒋᓪᓗᖓ ᓯᓚᕐᔪᐊᕐᒧᑦ. 15ᑭᐱᓯᒪᒐᓗᐊᕐᐸᑕ ᑭᐱᓯᒪᖏᒃᑲᓗᐊᕐᐸᑕᓘᓐᓃᑦ ᐊᑐᓐᖏᓚᖅ; ᓄᑖᓐᖑᕐᑎᑕᐅᓂᕐᓕ ᐊᑐᕐᑐᑑᕗᖅ. 16ᑕᒪᑐᒥᖓ ᒪᓕᒡᓗᑎᒃ ᐃᓅᔪᑦ ᖃᓄᐃᖏᑦᓯᐊᕐᓇᕐᑑᑉ ᓈᒃᑭᒋᔭᐅᓂᐅᓪᓗ ᐃᓚᒋᓕᒋᑦ, ᒎᑎᐅᓪᓗ ᐃᓄᖁᑎᓕᒫᖏᑦ ᐃᓴᕆᐊᓕᒥᐅᑦ.

17ᑭᖑᓪᓕᕐᐹᒥᒡᓕ ᓇᓕᑦᓯᓐᓄᑦ ᐅᖁᒤᓐᓇᕐᑐᒥᒃ ᐱᑎᑕᐅᔪᒪᓂᐊᕈᓐᓃᕐᐳᖓ; ᑎᒥᓐᓂ ᕿᓕᕈᒃᑲ ᔩᓱᓯᒥᐅᑕᐅᓂᕐᒥᒃ ᓴᖅᑭᑎᑦᓯᖕᒪᑕ.

18ᐊᑕᓂᑦᑕ ᔩᓱᓯ ᙭ᔅᑑᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᐃᓚᒋᓕᓯ ᑕᒪᑦᓯ, ᐅᒃᐱᕐᑑᖃᑎᒃᑲ. ᐂᒥᓐ.

Đang chọn:

ᒐᓔᑎᐊᒥᐅᓄᑦ 6: EAIB

Tô màu

Sao chép

So sánh

Chia sẻ