ፓይዱዋ 15
15
ያርሹዋ ሺሻናዉ እመቴዳ ህግያ
1መና ጎዳይ ሙሳ ሀዋዳን ያጌዳ፤ 2“እስራኤልያ አሳዉ ሀዋዳን ያጋ፤ ‘ህንተ ደአና ማላ፥ ታን ህንተንቶ እምያ ቢታ ገልያ ዎደ፥ 3መህያፐ ዎይ ዶርሳፐ፥ ጹግያ ያርሹዋ ግድና፥ ዎይ ሺቆዋ ጋናዉ ያርሽያ ያርሹዋ ግድና፥ ዎይ መና ጎዳይ ኬሬዳ ባላ ጋላሳቱዋን ህንተ ዶሱዋን ጮ እምያ ያርሹዋ ግድና፥ መና ጎዳዉ ታማን ጹግያ፥ ሳዉዋ ቶሹኩ ግያ ያርሾቱዋ ያርሽተ። 4ያርሹዋ ሺሽያ ኡራይ ካ ያርሾ እት ኪሎ ግራመ ልያ እት ሊትሮ ዎጋራ ዛይትያን ሙናቄዳዋካ መና ጎዳዉ አሆ። 5ቃይ ጹግያ ያርሾ፥ ዎይ ሀራ ያርሾ አህያ እት እት ዶርሳና እት ሊትሮ ዎይንያ ኤሳ ኡሻ ያርሹዋ ኦደ ጊግስተ።
6“ ‘ዶርሳ ኦርግያ ያርሻናዉ ሺሽያ ዎደ፥ ካ ያርሾ ላኡ ኪሎ ግራመ ልያ እት ሊትሮነ ባጋ ዎጋራ ዛይትያን ሙናቄዳዋነ 7እት ሊትሮነ ባጋ ዎይንያ ኤሳ ኡሻ ያርሾ አህተ። መና ጎዳዉ ሳዉዋ ቶሹኩ ግያ ያርሹዋ ያርሽተ።
8“ ‘እት ኮሩማ ጹግያ ያርሹዋ፥ ዎይ ሺቁዋ ጋያ ያርሹዋ፥ ዎይ እትፐተ ያርሹዋ ኦደ ያርሻናዉ መና ጎዳዉ አህያ ዎደ፥ 9ኮሩማና እትፐ ካ ያርሾ ሄዙ ኪሎ ግራመ ልያ ላኡ ሊትሮ ዎጋራ ዛይትያን ሙናቄዳዋነ 10ኡሻ ያርሾ ላኡ ሊትሮ ዎይንያ ኤሳካ አህተ። መና ጎዳዉ ሳዉዋ ቶሹኩ ግያ ያርሹዋ ታማን ያርሽተ።
11“ ‘እት እት ኮሩማ ቦራ፥ ዎይ እት እት ዶርሳ ኦርግያ፥ ዎይ ያላጋ ዴሻ ኦርግያ፥ ዎይ አቱማ ዶርሳ ማራ ያርሻናዉ ሺሽያ ዎደ፥ ካ ያርሹነ ኡሻ ያርሹ ሀዋዳን እትፐ ሺቄ። 12እት መህያፐ ዳሩ ሺቅያ ዎደ፥ ካ ያርሹነ ኡሻ ያርሹ ሄዋዳን ዳሪደ ሺቄ። 13እስራኤልያ አሳ ግድያ ኦንነ ታማን ጹግያ፥ ሳዉዋ ቶሹኩ ግያ ያርሹዋ መና ጎዳዉ ሺሽያ ዎደ ኡባን፥ ሀዋዳን ኦናዉ ኮሼ። 14ስንፐ ያና የለታን ህንተ ግዶን ደእያ በቲ ዎይ ሀራ አሳይ ኦንነ ጹግያ፥ ሳዉዋ ቶሹኩ ግያ ያርሹዋ መና ጎዳዉ ሺሻናዉ ኮዮፐ፥ እካ ህንተ ኦያዋዳን ኦናዉ ኮሼ። 15ህንተዉካ ህንተ ግዶን ደእያ በተቶካ ሀ ዎጋይ እቱዋ፤ ሀዌ ስንፐ ያና የለታዉካ ኤቂደ ደእያ ዎጋ። ህንተካ በተቱካ መና ጎዳ ስንን እቱዋ። 16ህንተዉካ ህንተ ግዶን ደእያ በተ አሳቶካ ህጊነ ዎጋይ እቱዋ ግዳና’ ያጋ” ያጌዳ።#ዎጋ 24:22
17ሄዋፐ ጉይያን፥ መና ጎዳይ ሙሳ ሀዋዳን ያጌዳ፤ 18“እስራኤልያ አሳዉ ሀዋዳን ያጋደ ኦዳ፤ ‘ታን ህንተና አፍያ ቢታ ህንተ ገሊደ፥ 19ሄ ጋድያን ሞክያ ካ ምያ ዎደ፥ ሄ ካፐ ጼራ ከሲደ፥ ህንተ መና ጎዳዉ ያርሹዋ ኦደ ሺሽተ። 20ሄዌካ፥ ባይራ ካኤዳ ካፐ ኡኬዳ ኮይሮ ኮምፑዋ፥ ካ ቡክያ ኡዱማፐ እምያ ያርሹዋ ኦደ ሺሽተ። 21ያና የለታ ኡባን ህንተ ህንተ ጋድያን ሞኬዳ ካፐ ጼራ ከሴዳ ኮምፑዋ፥ መና ጎዳዉ ያርሹዋ ኦደ ሺሽተ።
22“ ‘መና ጎዳይ ኦዴዳ ሀ አዛዞቱዋ ኡባ ህንተ ኤራና ዪደ፥ ናገናን አጎፐ፥ 23መና ጎዳይ አ ባጋና ህንተና አዛዜዳ አዛዞቱዋ ኡባ፥ መና ጎዳይ እሜዳ ጋላሳፐ ዶሚደ፥ ያና የለታ ጋካናዉ፥ ፓጨናን ናገናን አጎፐ፥ 24ቃይ ሄዋ ማባራይ ኤረናን ኦዳዋ ግዶፐ፥ ማባራይ ኡባይ መና ጎዳዉ እት ኮሩማ ጹግያ፥ ሳዉዋ ቶሹኩ ግያ ያርሹዋ ኦደ፥ አዉ ዎጋይ አዛዝያዋዳን፥ ካ ያርሹዋናነ ኡሻ ያርሹዋና ሺሾ፤ ቃይ ናጋራ ያርሹዋ ኦደ፥ እት ዴሻ ኦርግያ ሺሾ። 25ያቶፐ ቄሲ ኩመን እስራኤልያ ማባራ ናጋራ አቶ ጊስያ ዎጋ ፖሎ፤ ኡንቱንቱ ናጋራይ አቶ ጌተታና። አያዉ ጎፐ፥ ኡንቱንቱ ኤሪደ ኦበይክኖ፤ ቃይ ኡንቱንቱ ባረንቱ ባይዙዋ ድራዉ፥ መና ጎዳዉ ታማን ጹግያ ያርሹዋነ ባረንቱ ናጋራ ያርሹዋ ሺሼድኖ። 26አሳይ ኡባይ ኤረናን ሄ ባይዙዋን ሀምባላቼቴዳ ድራዉ፥ ኩመን እስራኤልያ ማባራዉካ ኡንቱንቱ ግዶን ደእያ በተ አሳዉካ አቶ ጌተታና።
27“ ‘እት አሳይ ባረካ ኤራና ዪደ ናጋራ ኦፐ፥ የለቶደፐ እት ላይ ግድያ እት ዴሻቶ ናጋራ ያርሹዋ ኦደ ሺሾ፤#ዎጋ 4:27-31 28ኤረናን ደኢደ ናጋራ ኦዳ ኡራዉ ቄሲ መና ጎዳ ስንን ናጋራ አቶ ጊስያ ዎጋ ፖሎ፤ አ ናጋራይ አቶ ጌተታና። 29ኤረናን ደኢደ ናጋራ ኦያ አሳ ኡባዉ፥ የለታን እስራኤልያ አሳ ግድናካ በተ አሳ ግድናካ ሀ ህጊ እቱዋ።
30“ ‘ሽን የለታን እስራኤልያ አሳ ግድናካ በተ አሳ ግድናካ ኤሪደ ኦቶሩዋን ናጋራ ኦያ ኡራይ መና ጎዳ ቦሬ። ሄ ኡራይ ባረ አሳ ግዶፐ ቦሄቶ። 31ሄ አዉ መና ጎዳ ቃላ ካዳ ድራዉነ አ አዛዙዋ መንዳ ድራዉ፥ እ ቱሙዋፐ አሳ ግዶፐ ቦሄታናዉ በሰ፤ አ ባይዙ አና’ ያጋ” ያጌዳ።
ሳምባታ ዎጋ መንዳ ብታንያ
32እት ጋላስ እስራኤልያ አሳይ መላ ቢታ ደእሽን፥ እት ብታኒ ሳምባታን ም ምጺደ ቤቴዳ። 33ም እ ምጽሽን ደሜዳ አሳቱ ሙሴኮ፥ አሮነኮነ ኩመን ሽቁዋኮ አ አሄድኖ። 34ኡንቱንቱ አ ኦናዋ ኤርቤና ድራዉ፥ ቃሹዋን ታክሴድኖ። 35ሄዋፐ ጉይያን መና ጎዳይ ሙሳ፥ “ሀ ብታኒ ሀይቃናዉ በሰ፤ ኩመን ያአይ ባረንቱ ዱንካኔዳ ሳኣፐ ጋጻ ከሲደ፥ ሹቻን ጫዲደ አ ዎ” ያጌዳ። 36ኩመን ያአይ መና ጎዳይ ሙሳ አዛዜዳዋዳን፥ ዱንካኔዳ ሳኣፐ ጋጻ ከሲደ፥ ሹቻን ጫዲደ አ ዎዳ።
ማዩዋ ማጫራ ዎጋ
37መና ጎዳይ ሙሳ ሀዋዳን ያጌዳ፤ 38“እስራኤልያ አሳዉ ሀዋዳን ያጋደ ኦዳ፤ ‘ህንተካ ስንፐ ያና የለታይካ ህንተ ማዩዋ ጋጻ ጼራን ጼራን ማጫራ ከስተ፤ ሄ ማጫራ ቦላ ሳሉዋ ማላትያ ቃጭና ስክተ።#ዛረ. 22:12 39ሄ ማጫራ ህንተ በእያ ዎደ ኡባን መና ጎዳ አዛዞቱዋ ሀሳዪደ ፖልተ፤ ያቶፐ፥ ህንተ ህንተ አይፍያነ ህንተ ዎዛና አሙዋ ካሊደ፥ ታፐ ዎራ ስምክታ። 40ሄ ማጫራ በእያዋን ህንተ ታ አዛዞቱዋ ኡባ ሀሳዪደ ፖላናነ ህንተ ህንተ ጾሳዉ ጌሻ ግዳና። 41ታን መና ጎዳ፥ ህንተ ጾሳቴ፤ ታን ህንተ ጾሳ ግዳናዉ፥ ህንተና ግብጼፐ ከሳድ። ታን መና ጎዳ፥ ህንተ ጾሳ’ ያጋ” ያጌዳ።
Đang chọn:
ፓይዱዋ 15: DFBE
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
The Word for the World Ethiopia