Be Mochi 5
5
Ananiya ngge gwa ye Safiratu
1Tea atan enò, nobǝ akan, a bè fǝ́ ye anga Ananiya ngge gwa ye, Safiratu, bè jwade etebwa sǝnsen mo be. 2Gè ti tse chá akan nyi a buetkwa ḿ mo chu ye adi eyim mo gwa ye, nè ti mò è dan shi ángá bwa a zǝn be etsonchi.
3Bitru è ká ye eka jan, “Ananiya, ano bwe a ge o gwa Shetan dwatì a tsuruku mbo, n du o o fe fwafe a zǝn Engǝ́ mo Ehwya, o ti chá akan mo tse a ò ben a chu etebwa sǝnsen hon ángá, ti nyi ḿ mo chu nye? 4Sǝnsen hon è no ye ḿ mbo sangǝ́ ò chà jwade ye ra? Atan a ò jwade etebwa sǝnsen hon ángá, tse hon è fwa ye mbo nwone a wa bwe mò e no engǝ ra, a o dgyan ra? Mò hon e bwe o, o pa jan we bwe mò yishwa ena ángá, a ano? O fe mbo fwafe ena a chu nobǝ ra, tea a chu Ehwya.”
5Abu Ananiya è fo enò ángá, gè kposhi a sen nè fǝ ara. Be ya è fo mò è bwe ángá è tsen etsentsen àywá. 6Ekǝnggwa be ezon-ndedon ya è no a zǝn ángá è bwa binpe ye ju ngge adanmo, nè kan ye vǝ́ a je, ti ken di.
7Awa ta chashin mo nó, gwa ye Safiratu, è kwashi a àtá a zǝn a be etsonchi è no ángá, gè yi ye mò è bwe ángá ra. 8Bitru è ká ye eka jan, “Jan m, ena a binbin mo tse a abo ngge don o ben a chu etebwa sǝnsen hon a nyè jwade ángá?”
Gè janfwe ye, “Ee, a binbin mo mò a jè ben ángá.”
9Bitru è jan ye, “Ano bwe a ge, a bo ngge don o, nye chadwa nye e mbwà e di Engǝ́ mo Ehwya? Fo aken mo be fù mo be ezon-ndedon ya é di don o ángá, be no a tafǝmo. Ba kan o a vǝ́ a je gaten.”
10Kè akan, gè kposhi a sen chafya mo Bitru nè fǝ ara. Ekǝnggwa a be ezon-ndedon hon è kwashi a zǝn, bè di ndegwa hon è fǝ ara. Bè kan ye tivǝ́ a je, nè di ye a buetkwa mo don ye. 11Binbin mo be ya ekǝ̀n-etsǝ́m ngge binbin mo be ya è fo fwa hon ángá, è tsen etsentsen àywá.
Be etsonchi è matswa be nobǝ embo
12Be etsonchi è bwe be mò echi ngge be moeditanm embo a engga mo be nobǝ. Binbin mo be ya ekǝ̀n-etsǝ́m è fǝn bwi chu anga a zǝn a bè fǝ́, Afku mo Sulemano, è no a tswa chuukwa mo Àtá mo Ehwya ángá. 13Ende akan è bon ti ye ekǝ̀n ge e fǝnchu ngge be ra, bi adia bè no digǝ̀n be anga. 14Tea be nobǝ embo ndedon èé ndegwa è tsǝ́ekǝ̀n a chu Etsodwe, efim mo be ya ekǝ̀n-etsǝ́m hon è no tubi anga nogwa nogwa. 15A chu be mò a be etsonchi è bwe anga, be nobǝ embo è kpu be ya modwa mo be bwa a tswa be efǝku, a tswa eten nè kpu be twà a chu be sǝ ngge be etwadwa abu atan a Bitru bwa twafǝ̀ nyaken, engǝ́ mbwe a shwa be a ju, ba ben ematswam. 16Be nobǝ embo a tswa be eten nwofyan éè ngàhwya Urishelima ángá, è kpu be ya modwa mo be tangge ya a engǝ́ esera è tswa be ekan anga ángá bwa. Binbin mo be ya modwa hon è ben ematswam.
Be tswa be etsonchi fí
17Ekǝnggwa Chu mo ekǝ́n ngge be ya emmeken mbwe ya è no adi etso mo be Sadosi ángá, è mbo ara ngge eze a chu be etsonchi. 18Enona, bè fu be etsonchi nè kpu be nggwa a àtá ehwyatu. 19Tea etsǝ maleka mo Ehwya è bwa fki tafǝmo mo àtá ehwyatu hon nè kpu be gwa a je, nè jan be, 20“Nye kwashi ywa a tswa chuukwa mo Àtá mo Ehwya, nye e jan be nobǝ binbin mo Fwa Esese a chu nya efwe ena.”
21Abu zǝn e ngga nyabwa ángá, be etsonchi hon è ken kwashi a tswa Àtá mo Ehwya abu bé jan be ángá, nè kwa ara be nobǝ moetum. Atan a Chu mo ekǝ́n ngge be ya emmeken mbwe è fǝn ara ángá, bè fǝ fǝn binbin mo be atkwen nobǝ mo be ya a Esǝrela (Atkwentì mo be ya a Yahuda) nè tson jan be e ken e kpu be etsonchi hon ya éè no a àtá ehwyatu ángá e bwa. 22Tea atan a be edgonzǝn mo Àtá mo Ehwya è kengga a àtá ehwyatu ángá, bè ben be be a zǝn ra. Enona, bè twabǝ nya nè ken jan be Atkwentì mo be ya a Yahuda jan, 23“Je ben tafǝmo mo àtá ehwyatu hon no ekenpepe. Be edgonzǝn mo nó è ywano a zǝn be tafǝmo hon, tea atan a je fki be tafǝmo hon ángá, nobǝ akan è fwa ye a tswa mo nó ra.” 24Abu chu mo be edgonzǝn mo Àtá mo Ehwya hon ngge be Ekǝ́n echa è fo enò ángá, binbin mo be e tàn ebwikpe àywá nè no ka anga abu fwa ena bwa a kǝn-etkyen ángá.
25Ekǝnggwa nobǝ akan è bwa a zǝn, nè jan, “Nye di, be nobǝ a nya kpu du no a àtá ehwyatu ángá, ywano a chuukwa mo Àtá mo Ehwya, n no tú be nobǝ hon mò anga.” 26Atan a chu mo be edgonzǝn è fo enò ángá, gè ken ngge be ya emmeken mbwe adi mochi nè kpu be etsonchi hon bwa. Bè fa be be efam ra, adia bè tsen anga be nobǝ a twa be ten.
27A be kpu be etsonchi hon bwa ara ángá, bè du be be e ywa a chafya mo be Atkwentì, evǝa Chu mo ekǝ́n e ká be eka. 28Gè jan, “Jè twa nye edon echakpokpo jan nye e tú nye mò adi ti ena ra, tea nye tkukwa gu ara Urishelima ngge moetum ena, nye nda anga nye e tso je efya mo fǝ mo ndedon ena.”
29Bitru ngge be etsonchi efki hon éè no ngge ge ángá è janfwe be jan, “Ge no kenm je e tse Ehwya, fwa ye be nobǝ ra. 30Ehwya a be ebǝ ata mo je è fen ángá, è ti Yeso nwene a nye gu adi ekenfum a chu eswafǝ ángá, nyi etkyen a dì. 31Ehwya è no ye egǝ̀n nè ti ye vǝ́ chu cha budgo mbwe abu Ehwyatì ngge Etivǝ́, evǝa ga du be ya a Esǝrela a twa etwa mo be ebgen ngge be e gwa e no be ebgen mo be. 32A je ngge Engǝ́ mo Ehwya ja be eyifwa a chu be fwa ena. A Engǝ́ hon nwene a Ehwya no ara be ya e tse ye anga.”
33Atan a be Atkwentì è fo enò ángá, binbin mo be è vǝ́ engo nè dgyan anga be e gu be etsonchi hon. 34Tea akan mo be, Farisi a bè fǝ́ anga Gamaliya, etumo mo edon, a binbin mo be nobǝ è digǝ̀n ye ángá, è nyi etkyen a tswa mo be Atkwentì mo be ya a Yahuda. Gè bgó jan be e kpu be etsonchi hon e vǝ́ a je sangǝ́. 35Ekǝnggwa gè jan be Atkwentì mo be ya a Yahuda jan, “Be nwenjwa m ya, ya a Esǝrela, nye e ka e seshi mò a nye nda anga nya bwe be nobǝ ena ángá. 36Ekpe ekpe, nobǝ akan a bè fǝ́ anga Tadiu è mbwibwa nè tú anga jan ga nobǝ èé ge. Be ndedon abu gwé ndwe (400), è ba ye. Bè gu ye. Binbin mo ya è ba ye anga è bushan. Ena abu fwa mbwe è kǝn-etkyen ángá.
37“Chashin mbwe, nobǝ akan ya a Galili a bè fǝ́ anga Yahuda è mbwibwa adi ekpengga mo be nobǝ ekam nè du be nobǝ ya è ba ye anga, tke etkekàn. A ge gaten, bè gu ye ngge be ya è ba ye anga è bushan gu. 38No enona, a chu fwa ena m pa anga jan nye e bwe nye be nobǝ ena, mò akan ra, nye e gwa be be e nya. Ano mò a be bwe anga no ḿ mo nobǝ, ga vǝ́ ye chu ra. 39Tea ano ge vǝ a zǝn Ehwya bwa, nye dòn a ti nye be ra. Ano nye tkyan nye e dòn be, nya yi jan nye twa ese anga ngge Ehwya.”
40Be ya e dan ángá è chadwa ngge fwa a gè jan ángá. Bè fǝ́ be etsonchi hon dwa kwashi nè du bè bu be akpan. Ekǝnggwa bè twa be echa jan be e jan be fwa adi ti mo Yeso ra, nè twagwa be be e nya.
41Be etsonchi hon è gwa be Atkwentì mo be ya a Yahuda a tswa vǝtsen nè no shánju anga adia Ehwya è ká ara be a engga mo ya a ngǝ ekan adi ti mo Yeso ángá. 42Nogwa nogwa bè no ken anga a chuukwa mo Àtá mo Ehwya ngge a mu a mu, nè kpo didi be nya mo moetum ngge edgon edum a chu Fwa Esese, jan Yeso a Kristi hon ra.
Đang chọn:
Be Mochi 5: ICH
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 Luke Initiative for Scripture Translation
