Be Mochi 1
1
Yeso è senvǝ jan ga tson Engǝ́ mo Ehwya hon a bwa
1Ya edgwa Tiyofilo, adi afketa mam ekwafya, m̀ bá mò a chu binbin mo be mò a Yeso è tke ebwem ngge etum, 2ti kengga nò a bè ti ye nyi etkyen vǝ́ a kpe ángá. A bè chà ti ye vǝ́ be a kpe ra, Engǝ́ mo Ehwya è bwejwa ye, gè twa be etsonchi mbwe a gè swa ángá echa. 3Chashin mo fǝ mbwe, gè mbwibwa a zǝn be etsonchi hon nè tú be echi àywá e tú jan ge chà no angǝ ángá. Gè ti be tsǝnò gwi ndwe nè no tú chu ye anga, nè no jan be fwa anga a chu zǝnotì mo Ehwya. 4Adi engga akan, atan a gè chà fǝ ye ra, a gè de mode anga ngge be, Yeso è jan be jan, “Nye e nya e gwa nye Urishelima ra, tea nye e no e bà edwe hon a Àtà m è senvǝ jan ga dwe nye nwone a nyè fo m̀ jan fwa a chu mo nó ángá. 5Adia Yohana è bwe batisǝma ngge mbǝ, tea adi be tsǝnò nwofyan e nyabwa ángá, ba bwe nye batisǝma ngge Engǝ́ mo Ehwya.”
Abu bè ti Yeso vǝ́ a kpe ángá
(Marku 16:19-20; Luka 24:50-53)
6Nò kè akan, atan a be etsonchi hon è no ngge Yeso ángá, bè ká ye eka jan, “Etsodwe, mò hon a adi ekpengga ena, a wa bwe be ya a Esǝrela be e twanga e ben zǝnotì mo be?”
7Gè janfwe be, “Fwa ye mochi mo nye a nye e yi be ekpengga ngge be tsǝnò hon a Àtà è panyi ara adi echakpo mbwe ángá ra. 8Tea nya cha echakpo atan a Engǝ́ mo Ehwya shwa ara nye a ju ángá. Nya no be eyifwa mam, ya a jan be nobǝ fwa a chu m, tke a Urishelima ngge binbin efa mo Yahudiya tangge Samariya ti ken a ngga ekǝn-etkyen mo zǝnchaje.”
9Chashin a gè jan fwa ara be fwa ena ángá, Ehwya è ti ye vǝ́ chà kpe. Bè no di ye nyavǝ́ ngge fǝzǝn mo be, kengga atan a edwe è bwipe ye ángá.
10A bè no di zǝn vǝ́ anga chá kpe abu gè nyavǝ́ ángá, kè akan be ndedon fà è nggwa mokàn etenten no a ju be è mbwibwa ywano a buetkwa mo be. 11Be nobǝ fà hon è jan, “Be ndedon ya a Galili, ano bwe a ge nye ywano ana, no di zǝn vǝ́ anga chá kpe? A ge Yeso hon a be ti ye a zǝn nye vǝ́ ara a kpe na, twabǝ a bwa abu nye di ye anga na.”
Abu bè swa Matiya ge e fwe-echi mo Yahuda ángá
(Matiyu 27:3-10)
12Kǝnggwa be etsonchi mo Yeso è twagwa hwì mo be tu zetu nè twabǝ shi a eten efifi a Urishelima. Hwì mo Zetu hon no tenten a zǝn eten efifi a Urishelima. Ge dgyen no abu lamba akan. 13Atan a bè bwangga a tswa eten efifi hon ángá, bè ken tonvǝ́ kwa a tswa àtá a kpe, zǝn a bè no anga. Be ya è no a zǝn ángá, a be:
Bitru, Yohana, Yakubo, ngge Andoro, Filibu ngge Toma, Batolomi ngge Matiyu. Ya ehwyà a be Yakubo (nwen Alfiyu) ngge Sima (achifǝ eten) ngge Yahuda nwen Yakubo.
14Binbin mo be ya ena è fǝn bwi chu nogwa nogwa ngge ebgo ebgom anga a zǝn. Meri ayi Yeso ngge be ndegwa ya ehwyà tangge be ndedon nwenjwa Yeso è no a zǝn èé be.
15Nò kè akan, adi be tsǝnò hon, be ya ekǝ̀n-etsǝ́m gwé akan ngge gwi fà (120) è fǝnno a zǝn akan. Bitru è nyi etkyen nè jan, 16“Be nwenjwa m ya, ge no ara jan be Fwaebam a Engǝ́ mo Ehwya è jan ekpe chá kpevǝ mo Dawuda a chu Yahuda è kpu be nobǝ bwa fu Yeso ángá ge e de e fǝ. 17Gè no akan a engga mo je, adia Yeso è swa ara ye ge e bwe mochi ena abibi ngge je.”
18(Ngge buhwen mbwe a chu mofǝ̀ mbwe a gè bwe ángá, Yahuda è jwa ekǝn sǝnsen. A zǝn hon a gè kposhi a sen ngge chu, dgyèn mbwe è bwíkwa, mò a dgyèn mbwe è mbo gwa gu a je. 19Egwa egwa a Urishelima è fo etkyen mo yishwa fǝ ena, enona, bè fǝ́ zǝn hon adi hwi mo be, Akedama engà mo nó jan sǝnsen mo ngǝ.)
20Bitru è jan efwe jan, “Ge no ebam adi afketa mo Bón jan,
“ ‘Echizǝn enom mbwe e nga shinmu,
be e ben e didi be nobǝ akan a dwa a zǝn ra.’
Be bá no efwe jan,
“ ‘Nobǝ efki e fwe-echi
adi mochi mbwe.’
21Enona, ge no ara jan je e swa e vǝ́ akan a engga mo be nobǝ ena, ya è no bwa ngge je binbin mo ekpengga a jè ken anga ngge Yeso Etsodwe je ángá, 22tke atan a Yohana è bwe be nobǝ batisǝma anga ti kengga atan a bè ti Yeso a zǝn je vǝ́ a kpe ángá. Adia ge no ara kenm, je e swa akan a engga mo be, ge e no eyifwa ngge je a chu etkyen enyim mo Yeso a dì.”
23Enona, bè vǝ nobǝ fà, Esufu a bè fǝ ye anga Basaba (efwe bè fǝ ye anga Justu) ngge Matiya, gwa a je. 24Kǝnggwa bè bgó ebgo jan, “Etsodwe, o yi gu tsuruku mo egwa egwa. Tú je a engga mo nobǝ fà ena, ende a o swa ara ángá, 25ge e nga etsonchi mbo nwene a fwe e chi mo Yahuda, adi mochi chí etsonm hon a gè twagwa nè twabǝ nya ara chá zǝn a gè defǝ ángá.” 26Enona, bè twa etwadem a chu be evǝa be swa akan a engga mo be. Matiya è devǝ́ a ge adi etwadem hon, kǝnggwa bè ti ye twatan ngge be etsonchi gwi chu akan hon.
Đang chọn:
Be Mochi 1: ICH
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 Luke Initiative for Scripture Translation
