2 คร 6
6
1โกบ มูห เย ดูอี อี โบง รึม ฆาน โดบ เฌาพรา, เย บอ กาซูห เบ, แตห เบ ดึห ปี เฆฌู เฌาพรา, แกวะ แตห อึณ ชึม ปีเยณ. 2แตห เบ โทม โฆรห อัน เฌา อี แฮะ ต็อห, “อาคราว ดอ ซังโดว, โอว แฮะ โทม โฆรห แม. ซีแง แฮะ คยอด โอว ดี อี, โอว แฮะ จอย แม.” โอว ยี ต็อห, แฮะ มูห ดอ ตี นี, แฮะ ซังโดว. แฮะ มูห อาตึร นี, อัน เฌา ดี คยอด เบ.
3เย มืร ตู โบง แตห อึณ แร, แตห อึณ ฆีด อาเซ, แกวะ แตห อาเซ ปึอน ดี แน ฆาน ปี โบง เย.
4เย มูห ดูอี อี โบง ฆาน เฌาพรา. โคว, แคะ ปี โบง เย ดอน โมยว, เย โฆยวฆยา ดี โบง, แตห อึณ มูห แตห อึณ หมาน. เย มืร แฮะ ดึอม คัม ดี ยืน เหลณ กาเซา, บอ คัม ดูก แบน โมยว แบน โมยว, ตู นับ เหมา ดี ปาย ดี โบง, บอ กาดูห ดูก อี หณาบ กาเซา แบน โมยว แบน โมยว. ปี บอ แฮะ ปาย ตี มืร, เย ยี ซี แนะ โบง แคะ ปี กาอาบ โบง ดูอี อี โบง ฆาน เฌาพรา. 5เย แฮะ คัม แตห อี มัห เย, แตห อี เฮา คร็อง เย แคง กาปึม. ดูอี บอ มาน บอ มืง แฮะ โบง แตห อึณ ซีนัน ซีนืง, แบน ดูก ดี เย. เย มืร แฮะ โบง ฆาน จัน กาเซา กอ ฮู ปึอน ดี อีด ซีคยา, กอ ฮู ปึอน ดี โฮม ดี เดียง มาเซ. 6เย แฮะ มึห น็อห ซีงา, แฮะ มึห อางยาน, บอ แป ดี ยืน, บอ โบง นา หมึอม ดี อี เฮา. เย มืร แฮะ โบง แตห น็อห พึอม เฌาพรา บยัะ ปวน อัน. เย มืร ร็อก เบ อาคาคัร หมาน. 7เย แฮะ กาลาง นา หมาน ดี เบ, แฮะ บยัะ บอ ปี ปาย ปวน เฌาพรา. เย แฮะ โบง นา มูห นา หมาน เซเซ, แตห อึณ ปี ครึง กาโฆห แฮะ กอย แคง แด เย บอ อา บลาก. 8เย แฮะ คัม แตห อี เฮา อืบ เย บอ คัม แตห ซาเร เย พยาก. อี เฮา แฮะ กาลาง จาว เย, บอ กาลาง นา หมึอม เย. อี เฮา ปี บอ แฮะ ทาง เย มูห ดูอี อี ซีมา กาโลว, เย ยี กาลาง โฆรห มูห โฆรห หมาน. 9อี เฮา ปี ซัะ ซี นับ เย มืร, ดูอี กืน ยี แฮะ วี นับ. อี เฮา ปี บอ แฮะ ทาง เย แฮะ ยัม มืร, เย ยี ซี อีม. เย ปี บอ แฮะ กาดูห ดูก มืร, เย ยี แฮะ ลอด ยัม. 10น็อห เย ปี บอ แฮะ กลึร มืร, เย ยี โคย ดาคึย. เย ปี บอ แฮะ ฆีน มืร, เย ยี โบง แตห ดูอี กืน วี ครัม. เย ปี ซัะ มึห มาเซ มืร, เย ยี แฮะ มึห แคะ ปี โลว เย ดอน โมยว.
11อึย เบ บีนอง อี กอย แคง มืง โควรีนทู, เย แฮะ กาลาง โตต ปี ปาย แคง น็อห เย, แตห เบ นับ ซีคยา. 12เย ตู มูห ดูอี น็อห กาเคียะ กาคัณ ตู ร็อก เบ. เบ ยี ตู บยัะ น็อห ร็อก เบ ดี เย. 13โอว แฮะ มาด เบ ปี ฆอน โอว. โคว, แตห บอ เบ วี กาลาง ปี ปาย แคง น็อห เบ ดี เย.
14แกวะ แตห เบ โบง ฆาน มาเซ อี แตห เบ ดูอี อี แฮะ หณึม โลว วี กาโดบ ดี ดูอี อี ตู หณึม. แกวะ โบง มาเซ อี ปี มามัก อา โดว แฮะ ชึบ แอะเมา อู โบ็ง. โคว, นา หมาน ฆาย นา ตู หมาน อาว ปึอน กอย รึม. บอ บลาง ฆาย อับ ว็อง อาว ปึอน กอย กาโดบ. 15เฌา เยซู ฆาย โบว กานัม ตู ปึอน ลาย โพรม รึม. ดูอี อี หณึม ฆาย ดูอี อี ตู หณึม ตู ปึอน แบน อู น็อห. 16บอ อารึบ ราง อาว ปึอน กอย แคง โฮว เฌาพรา. โคว, เอ แฮะ ปี โฮว เฌาพรา อี มูห เฌาพรา อีม. เฌาพรา แฮะ กาลาง แคง บับ อัน ต็อห, “โอว ดี กอย รึม โดบ เฆ. โอว ดี ฮาว วีว ฮาว เวณ โดง กอย เฆ. โอว ดี แบน เฌาพรา ปี กรึบ เฆ, เฆ มืร ดี แบน ดูอี ปี อึบ โอว.” 17เฌาพรา ปี วี กาลาง ปอ อึณ ปัว ต็อห, “แตห เบ เลห ตัะ เฆ. แตห เบ กอย ราง เบ. แกวะ แตห เบ ปา อี ตู ซีงา คอ อู โมยว. เซ เบ โบง ปาย ตี, โอว ดี บอ รวห เบ. 18โอว ดี แบน ฆูณ เบ. เบ ดี แบน ฆอน โอว บอ อีบึณ อีมาย. เฌาพรา อี อึบ โตต ดอน โมยว, อัน แฮะ กาลาง อูน ปาย ตี.”
Đang chọn:
2 คร 6: pce
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2021, Wycliffe Bible Translator, Inc. All rights reserved.