Marqoose 1

Xhamaqicha Yohanise oobaddho

Mat 3:1-12; Luq 3:1-18; Yoh 1:19-28

1Hayafa densi [Wonto yele maaqe] Yesuusi Kristosa gisha ohutta modhe odoko nu siine. 2-3Kaayaxi Isayase fissharowa

<<Ne buro ne buroydi handi oge naqara ta woosaxuko ta anxe. <Laaxi oge naquwayte, modhussi gizusuwayte> yeydi hissine saha melaa uwwara axi kato>>

hidi e diizuttechonike e maaddho. 4Hinneko Xhamaqicha Yohanisey <<Hi cubbo dhaddi maaddhi xhamaquttuwayte. Yeydi hi maaqete Wontoy hi cubbo <Attuwaye> hidiko e hine>> yeydi saha melaana oobadhisine e yoodo. 5Yuuda wudiyafani axi be yechoyna Yerusaleeme katamaafani uddina esuko yoodi be cubbo u bazzicha, Yohanisey Yordanose waassaa uso e xhamaqicha. 6Yohanisey gaalo ufuxuna meddhuttese maa'o maadhi be elfani kom'e zalabhitena e gixhicha. Booliyara ziizita degessi shidiyara e muucha. 7Esini <<Ullaydi e kobha tufe bircheshe tani bishuwashi taame mallay ta geedeko e yoone. 8Tani hinumba waaxunako ta xhamaqiya yese, esimay Ayaana Geeshunako hinumba e xhamaqe>> yeydi e oobadhicha.

Yesuusay xhamaquttosa

Mat 3:13-17; Luq 3:21-22

9Ye woggaaka Yesuusay Galila wudiyaka yese Nazrate katamaafa yoodine Yohanisey Yordanose waassaaka esa xhamadho. 10Xhamaqutti waassaafa e kessonike yenniyawo afay feedhuttine Ayaana Geeshi hade woyya bisshi be gara hodhusune e beedo. 11<<Ta eehe ta yeley nembako, neenna maggako ta magge>> yeydi hine katoy afaafa e sinto.

Humbayey Yesuusa naadhi beedosa

Mat 4:11; Luq 4:1-13

12Yenniyawo Ayaana Geeshi esa densi saha melaa etti e hando. 13Oyddi tammi wonta aallo Humbayey naadhi beesune yaha e dooddo. Bo'iti esaara yaha wolko yesune Wonto woosaxi yoodi esuse worgusesa u mahicha.

Oyddi axi xheyse

Mat 4:12-22; Luq 5:1-11

14Yohanisey aykutti tufe zawa gello geede Yesuusay Wontokofa anxutta modhe odo ohisine Galila wudiyaka e yoodo. 15Esini <<Wontay ellose, Wonto kaatetese woggay uddhose, hi cubbo dhaddi maaquwayte, ha modhe odo siidi <Aadeko> hissine ekkuwayte!>> yeydi e ohicha. 16Ye e geede Yesuusay Galila bagade da'aanna garichine Simooniyara esindo na'i Indiraasiyara e beedo. Usini gulxhe aykesa be maaqicho gisha esuna laga gulxhe be aykicho maarabe hissoosa aykese bagadiya u dakkicha. 17Yesuusani <<Taara yoowayte, tani hinumba gulxhe hi aykenike axita hi ooworosako ta mahe>> hidi e hido. 18Usini be maarabita yaha datti yenniyawo esaara u hando. 19Yahafa hagawo garichine lam'i wolindo na'axhe Yayqoobiyara Yohanisiyara e beedo. Usadeni Zabdoose e sungicha. Zabhaa yesine be maarabe u naqicha. 20Yesuusani yenniyawo uso xheydi <<Yoowayte taara>> hidi e hido. Usini biyade Zabdoose e hantaxaara zabhaa datti esaara u hando.

Bidzi axi garafa xhoozi gooduttosa

Luq 4:31-37

21Yahafa gardi Qifirnahoome katamaaka u hando. Yaha e yesune sanbata wontay ello geede yenniyawo Ayhuda Bhikkilo Zawa gelli e erusso. 22Yesuusay Muse woga eruse geruke maaddho badi e yesune, hade erana axe durke afana maagituke e erusicho gisha siidasiti micco. 23Yenniyawo ye Bhikkilo Zawaaka xhoozi e gara yese axi e yecha. Esini 24<<Nazrataxi Yesuusa! Am nuuka niya gelsesa? Numba baysesuwa ne yoodo? Tani oone ne maaqesa nemba erako ta ere. Neni Wonto maaqe haylako>> yeydi hissine e uydo. 25Yesuusani ye xhooze <<Mikki hiwwa! E garafa kesuwa!>> hidi e kassho. 26Ye xhoozi ye ade olli fardunsi keddaysi uydi datti dhaddi e hando. 27Axiti be uddina micci <<Ha zeerey am? Xhooze be adetona e woose, fetto usini esuse siidi woosutte. Ha esi kille era maaquwaye?>> yeydi hissine sekke hanke wolla u zeericha. 28Yenniyawo ye e nashoy Galila wude googe uddi handi odusutto.

Laga hargaxiti loollosa

Mat 8:14-17; Luq 4:38-41

29Yesuusay ye e geede Ayhuda Bhikkilo Zawaafa be kessonike Yayqoobiyara Yohanisiyara etti Simooniyaxhi Indiraasiyaxhi zawa handi e gello. 30Ye zawaaka Simoone machindoy i garay michana hardine woy'iya i yecha. Hinne Yesuusako u otinne 31isuko gardi i kuche ayti e denso. Ye micha hargey yenniyawo dattine dendi ususe worguse base i hanto.

32Qoossi gelline qamese e hisune axiti Yesuusako hargaxaara xhoozi aytecho axaara uddina oowe u ayto. 33Ye katama axiti be uddina ye zawa karaaka u bhikkilutto. 34Yesuusay be bishana bishana hardi yecha laga hargaxita e loolusso. Laga xhoozita axi garafa e gooddo. Xhoozi oone e maaqenike esa ere gisha u zeeruwanike e tucco.

Yesuusay Galila wudiya erusso

Luq 4:42-44

35Wontaso haga wonto badi e yesune Yesuusay dendi kessi koysi baa godo handi Wonto e shidho. 36Simooniyara feditaaray Yesuusa worgisine u yoodo. 37Esa degessi <<Axiti be uddina nemba worgiyama yesesi>> hidi uydo. 38Yesuusay ususe <<Tani esume yoodosi axuse modhe odo ohese e maaqe gisha yoowayte, ohese assi fede ukke yese godita nu hammeese!>> hidi e hido. 39Handi seya haya hanti Ayhuda Bhikkilo Zawaa axe erusisiniyara xhooze u garafa goodisiniyara Galila wudiyaka uddi godo e hanticha.

Bidzi axi kom'e hargiyafa loollosa

Mat 8:1-4; Luq 5:12-17

40Kom'e harge keengicha bidzi adey Yesuusako yoodi e buro bocunti <<Odde, worgo'ayko ta hargiyafa taa geesheshuko#1:40 taa geesheshuko Mat 8:2 tokixo beewwa. ne danda'e!>> hidi yeetti e shidho. 41Yesuusay higilli be kuche ansi ayti <<Wordiko ta yese, geejhuwa!>> hidi e hido. 42Yenniyawo kom'e hargey dattine e geejjho. Hine ye adey loollo. 43-44Yesuusay ye ade <<Ha esa haliya hangisine seya haya odussofuna! Handi nemba Wonto zawa kahinese beysuwa! Loolli ne geejjho gisha Muse wogana ohuttesesa kaasha uqusuwa! Ye esini axuse atoko e maaqe>> hidi minsi oti e anso. 45Ye adey yahafa kessi axuse uddi oduse e gello. Ye micushe hantay uddi godo sinto. Ye e gisha Yesuusay addeydi aya katamani hamese dandadho baasso. Katamaame wude axi baa godo yese e ayto. Yeydi e maaddhakoni axiti aya e yese godo siidi be badena badena laddi esuko u yoocha.

Đang chọn:

Marqoose 1: KilleC

Tô màu

Sao chép

So sánh

Chia sẻ