ሮሜ 12
12
ጾ̈ሳ̇ ኦ̈ሲን ኦ̈ንዳቦ ኣሲ ዎዛርፌ̈ን ማ̈ቃ̇ር ዶኣንዳብ ኮሺ̈̇ራ?
1ዪዚ ቴ ኢሺንታን! ዪንታ̇ ኣሲቲ̈ንዶ ጾ̈ሳ̇̇ ኡፋይሲዝ ጌ̈ሽ ማ̈ቂ̇ኖ ሼምፓባሮ ዣርሻ ማ̈ሃሪ ጾ̈ሳ̇̈̇ቦ ሺ̈ሻ̇ምፔ̈ኒ ጾ̈ሳ̇ ኣሽኪቲምባራ ቴ ዪንታ̇ ጌሻ̈ሬ። ዪንቲ̇ ጾ̈ሳ̇̇̈ቦ ጎሽታ̇ንዳብ ኮሺ̇ዝ ኪን ጎይን ዓና̇ ኢዞ። 2ኮሽ̇ ማ̈ቂኖንዲኬ፥ ኡፋ̈ይሳዚን ማ ማዛ ኢዝ ጋልዳ ባዮ̇ን ጾ̈ሳ̇ ቆፊን ኤራንዳ̇ቦ ዪንታ̇ ቡ̈ዲን ኦ̈ራሙታ̇ዶ̈ሪ ዪንታ̇ ኣሲቲንባር ላ̈ሚንቲ̇ብትዶኬ ዓና ኣላሚን ጋልዳ ዎ ኣሳን ማይጻፒ̇ቴ።
3ማ ዪንቲ̇ ዎይን ጾ̈ሲ ዪንታ̇̇ቦ ኢሚ̇ኖ ኣማ̇ኒንዲፌ̈ን ዪንታ̇ ዪርክ ዎታሪ ቤቂ̇ብትዶኬ ዪንታ̇̇ቦ ኮሻ̇ዚምፖ ኣ̈̇ሪ ኦቲራ ቆፊ ቆፓካዮ̈ዲፌ̈ኒ ጾ̈ሲ̇ ታ̈ብ ኢሚ̇ኖ ኤሪቲንባራ ዪንታ̇̇ቦ ሶ̈ላ̈ሬ። 4ፔቲ̇ ኣሳ ጋልዳ ዱማ ዱማ ጋሊ̇ ዎ፤ ዪ̈ን ጋላ̇ን ኢንታ ኦ̈ሲንዳሬ ዱማ ዱማ። 5ዪና ኢዝፌ̈ን ኑ̈ናሬ ዱማ ዱማ ኣስዶ̈ን ክርስቶ̈ሳባራ ዎል ፔታ̇ኔ፤ ኑ̈ኒ ዎይን ፔቲ̈ ጋ̈ል ጋልዳ ዎ ጊሻ̇ቦ ዎልዎልኣ ኤ̈ንቲ̇ኔ። 6ጾ̈ሳ̇ ፌ ኣሽኪቲንዲፌ̈ኒ ኑ̈ቦ ዱማ ዱማ ኪልስ ኢሚ̇ኔ፤ ኑ̈ቦ ኢሚንቲ̇ኖን ጾ̈ሳ̇̇ ቃ̈ሊን ሶ̈ሊኮ ኑ ኣማ̇ኒንዲፌ̈ኒ ቃ̈ላ ሶ̈ሊስቶ። 7ኑ̈ቦ ኢሚንቲ̇ኖንዳ ሜ̈ላን ማ̈ዲ̇ዝባዝኮ ሚ̈ጛር ማ̈ዲስቶ̇፤ ታ̈ማር̇ሲኮ ሚ̈ጛር ታማ̈ርሲስቶ̇፤ 8ኣስ ዞሪኮ ዞሪሲቶ̈፤ ሜላንቦ ኢሚ̇ ማ̈ዲዝባዝኮ ኑ ቡ̈ዳፖ ኢሚ̇ስቶ፤ ኣስ ኣቂሲኮ ኮ̈ሽንቺ̇ ኣቂሲቶ፤ ኣሳብ ሚጪንቲ̇̈ርኮ ቡ̈ዳ ጋርታፖ ሚጪንቲ̇ስቶ̇።
9ዪንታ̇ ካንንዳ ሲሊ̇ፖ̇ ፉዳ ማ̈ቃፖ̇ጋ̈ቤ። ኢ̈ት ባዝ ሺርንቲ̇ብቴ፤ ኮሽ̇ ባዚን ሚ̈ንር ኤ̈ብቴ̇፤ 10ዎል ዎልኣ ኢሺክ ጌ̈ዲክፌ̈ን ዶ̈ሲንቲ̈ብቴ፤ ዎልዎልኣ ቦንቺ̇ንቲ̇ብቴ። 11ዳ̈ቡራካ̇ይዶር ኡፋይስባር ኩሚኖ ቡ̈ዳባራ ጎዳ̈ቦ ኦ̈ብቴ። 12ዪንታ̇ብ ዎ ታስፊንባራ ኡፋይቲ̇ብቴ፤ ሜታ ዪ̈ንታ ዬ̈ሌ̇ጌይን ጋ̈ርዢብቴ፤ ዎይ ጋላስ ዎ̈ሲ̇ብቴ። 13ኣማ̇ኒኖ ኣሳን ኢንታ̇ ሜቲን ጋ̈ርታ ኢንታ̇ ማ̈ዲ̇ብቴ፤ ዛቃ̇ ማ̈ቂ̇ ዬይዛን ሞኪ̇ ኤኪ̇ብቴ̇።
14ዪንታ̇ ዳኪ̇ዛን ኣንጂ̇ብቴ፤ ኣንጂ̇ብቴዶኬ ባ̈ዳፒ̇ቴ። 15ኡፋይቲ̇ዛንባራ ኡፋይቲ̇ብቴ፤ ዬ̈ኪ̇ዛንባራ ዬ̈ኪ̇ብቴ። 16ዪንቲ̇ ዎል ዎልኣ ፔቲ̇ ቡ̈ዳባር ማ̈ቃ̇ር ዶኢብቴ̇፤ ዪንቲ ኦቲርቂ̇ዛ ኣሻ̇ሪ ዎርባያንባር ዎልኣ ዬ̇ንዳቦ ኢጻፒ̇ቴ፤ ኑ̈ኒ ኤራ ጋ̈ሪ ዪንታ̇ ሾክ ሾክ ዎታፒ̇ቴ።
17ኣስ ጌ̈ይዛ ዎይ ቲ̈ን ኮሽ ማ̈ቂ̇ኖ ባዝ ኦ̈ብቴዶ̈ኬ ኣሲ ዪንታ̇ ጋልዳ ኢ̈ታባዝ ኦ̈ጌይን ኢንታ̇ቦ ኢ̈ት ኦ̈ር ማሃፒ̇ቴ። 18ዪንታ̇̇ብ ዳንዳኢንቴጌይንዶ ኣስ ዎ̈ይባር ሳሪቲባራ ዶኣንዳ̇ቦ ኮሺ̇ዝ ባዝ ዎይሲ ዎቲብቴ̇። 19ታ ላጋን! “ኣሳብ ኣሳ ኦ̈ሳፌ̈ኒ ጪጊ̇ዛ ታ̈ና ጌይሬ ጎዳ ጾ̈ሳ̇̇̈ዲ” ጌዪ ጻ̈ፊንቲ̇ኖኮታ̇ቦ፥ ጎይላ ጾ̈ሳ̇̇ብ ኣሺ̇ብቴ፤ ኣሲ ዪንታ̇̇ቦ ኢ̈ት ኦ̈ኖ ባዚምቦ̇ ዪንቲ̇ ኢ̈ት ኦ̈ ማሃንዳ ጋ̈ፒ̇ቴ። 20ዪኖ̇ ዎታናፖ̇ ኔ̈ብ ኢ̈ት ኦ̈ኖ ና̈ሳ ጋፊቴጌይን ኢያ ሙሳቤ፤ ባ̈ርሲንቴጌይን ኢያ ኡሻ̇ቤ፤ ኔ̈ኒ ዪኖ̇ ዎቴጌይን ዬሎ̇ ታማ ዬርጭፌ̈ን ኢያ ሚቺ̇̈ሬ። 21ኢ̈ት ማ̈ቂ̇ኖ ባዚን ኮሽ ባዝባራ ጋማብዶኬ ኢ̈ት ባዝባራ ጋሚንታ̇ፔ̇።
Đang chọn:
ሮሜ 12: ኦጫ̈ቃማ
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập