ማ̈ርቆ̈ሳ 16
16
ዬሱ̈ሲ ዓይቃ ጋርታ̇ፖ̇ ዲንዲዴ
ማ̈ቶ̈ሳ 28፡1-8፤ ሉቃ̈ሳ 24፡1-12፤ ዋ̈ኒ̇ሳ 20፡1-10
1ሳምባታ ኣ̈̇ኖፖ̇ ዓኒ ማ̈ራማ ማግዳሎ̈ንዶ፣ ዓይቆ̈ባ ኢንዲን ማ̈ራሚኬ ሳሎ̈ሞ ዎል ማ̈ቃ̇ሪ ዬሱ̈ሳ ኣሂን ቆቲሳንዳብ ጋ̈ሪ ሺታ̇ ዎጚዴ። 2ዎጊ̇ ጋላስ ጌ̈ሽ ጌላፋ ቦይና ቢርት ኬስካ̇ምባራ ዬሱ̈ሳ ዱ̈ፊንኮ̇ ሉኪ̇̈ርዶ̈ር ጎይምጋልዳ፥ 3“ዱ̈ፊን ካሪን ጋልዶ ሹቺ̇ን ኦ ኑ̈ብ ፊሪሲ ፋይ̈ራ?” ጌዪ ዎልዎልኣ ሶ̈ሊንቲ̇ሙታ̇ ሉኪ̇ዴ።
4ኢናፖ̇ ኢንቲ̇ ሾክ ጋር ቤቃ̇ዚምባራ ሹቻ̇ ጴቻ̇ ፊራር ፋኪ̇ንዶ̈ን ቤቂ̇ዴ። 5ዶ̈ቺ̇ን ጋርታ ጌሊኖንዲፌ̈ኒ ፔቲ̇ ኣስ ናኢቲዶ̈ር ቦ̈ርስ ኣፊላ ማኣር ኡሻች ጎይ ዶኢንዶ̈ን ቤቃ̇ር ባቂቲዴ።
6ና̈ሳ ኢንታ̇ኮ “ባቂታፒ̇ቴ፤ ዪንቲ ሶቲንቲ̇ኖ ና̈ዝሬ̈ት ዬሱ̈ሳ ኮያዚን ቴ ኤራ̈ሬ፤ ኢ ዓይቃ ጋርታ̇ፖ̇ ዲንዲ̇ኔ፤ ዓይዲ ባዬ̇፤ ኢያ ዱ̈ኪ̇ኖ ቤሲ̇ን ዓኒ̇ሼ ቤቂ̇ብቴ። 7ዪንቲ̇ ዓት ሉካ̇ሪ ኢ ታማ̈ራንብኬ ጴ̈ጥሮ̈ሳቦ ‘ዓኒፖ̇ ቲ̈ን ዬሱ̈ሲ ዪንታ̇ብ ሶ̈ሊኖንዲፌ̈ኒ ዪንታ̇ፖ̇ ቲ̈ኒታር ጋሊላ ሉኪ̇ሬ፤ ኢና ዪንቲ ኢያ ዲጚ̈ሬ ጋ̈ር ሶ̈ሊብቴ’ ” ጌይዴ።
8ማጫ̇ን ኢ̈ችባራ ጋንዲ̇ ሙታ̇ዶ̈ሪ ዶ̈ቺ̇ን ጋርታፖ̇ ዎጺ̇ ኬስኪ̇ዴ። ኢንቲ̇ ዎይሊን ኢ̈ጪ̇ኖኮታ̇ቦ ኦ̈ባካር ኣባክ ሶ̈ላካ̇ይ ኣቲ̇ዴ።
[9ዬሱ̈ሲ ዎጊ̇ ጋላስ ጌ̈ሽ ጌላፋ ዓይቃ ጋርታ̇ፖ ዲንዲኖፖ̇ ዓኒ፥ ታብዛ ኢ̈ታ ኣያ̇ና ኢዝ ጋልዳፖ ኬሲ̇ኖን ማ̈ራማ ማግዳሎ̈ምቦ ቤንቲ̇ዴ። 10ኢዛ ሉካ̇ራ ሙርሚ̇፥ ዬ̈ኪ̇ ሙታ̇ ዎን ዬሱ̈ሳ ታማ̈ራንቦ ኢ ዓይቃ ጋርታ̇ፖ̇ ዲንዲኖንዲኬ ኢዝቦ ቤንቲ̇ኖንዶ ኢንታብ ሶ̈ሊን፥ 11ኢንቲ ኢዛ ጌይኖን ኪን ጋ̈ካ̇ይ ኣቲ̇ዴ።
12ኢናፖ̇ ዓኒ ዬሱ̈ሳ ታማ̈ራን ጋርታፖ̇ ናምኣን ጋጻራ ጎይ ሉካ̇ምባራ ዬሱ̈ሲ ሜላ ኣስ ማይጻር ኢንታ̇ብ ቤንቲ̇ዴ። 13ኢንታ̇ሬ ኢናፖ̇ ማ̈ቃ̇ሪ ፌ ቤቂ̇ኖን ኣቲ̇ኖ ታማ̈ራንብ ሶ̈ሊን፥ ዪንር ሶ̈ሊኖን ኪን ጋካ̇ይ ኣቲ̇ዴ።
14ኢናፖ̇ ዓኒ ዬሱ̈ሳ ታማ̈ራን ጋርታ̇ፖ̇ ታጶ̇ ፔታ̇ናን ቡና ኡሽካ̇ንዳቦ ዎልኣ ዶኢንዶ̈ን ኢንታብ ቤንቲ̇ዴ። ኣሳን “ዬሱ̈ሲ ዓይቃ ጋርታ̇ፖ̇ ዲንዲኔ፥ ኑ̈ናር ኢያ ኑ ኣ̈ፍባር ቤቂ̇ኔ” ዪዝ ጌዪ ኢንታ̇ብ ሶ̈ሊኖን ኢንቲ ኪን ጋ̈ካ̇ይ ኣቲ̇ኖኮታ̇ብኬ ኢንታ ቡ̈ዳ ዛቢኖ̈ቦ ዬሱ̈ሲ ኢንታ ቦሪዴ። 15ኢናፖ̇ ኢንታ ኪ̈ቲ̇ርዶ̈ሪ “ሳ̈ዝ ኤ̈ሻ̇ ዎይ ጋልዳ ሉኪ̇ብቴ፤ ዎጛሊንዶ ኣሳ ዎይ̈ቦ ሶ̈ሊብቴ፥ 16ኣማ̇ናር ጻማ̇ቂንቲኖ ኣስ ፋጺ̈ሬ፤ ኣማ̇ኒባ̈ሶ ኣሲ ፊርዲንቲ̈ሬ። 17ታ̈ና ኣማ̇ኒዛን ዎይንቦ ዪን ማላ̇ን ኢንታ̇ብ ዶኢ̈ሬ፡ ቴ ሱምንባራ ኢ̈ታ ኣያ̇ና ኬሲ̇̈ሬ፣ ኦራ ኖ̈ና ሶ̈ሊሬ፣ 18ሾ̈ሽ ፌ ኩሽባር ኤ̈̇̈ሬ፣ ዎዝ ጋ̈ላ̇ ኡሽኪናካሬ ኢንታ ዎባሴ፣ ፌ ኩሺን ማዝ ኣስ ጋልዳ ጋዳ̇ር ዎ̈ሴ̈ጌይን ማዛን ፋጺ̈ሬ” ጌይዴ።
19ጎዳ ዬሱ̈ሲ ኢንታብ ዪኖ ሶ̈ሊኖፖ̇ ዓኒ ኣፋ ሉካ̇ሪ ጾ̈ሳ̇̇̈ቦ ኡሻች ጎይ ዶኢዴ። 20ኢ ታማ̈ራን ዎይ ቤስ̇ ሉካ̇ሪ ጾ̈ሳ̇̇ ቃ̈ላ ታማ̈ርሳምባራ፥ ጎዳ ኢንታባር ማ̈ቃ̇ር ኦ̈ዴ። ኢንቲ̇ ታማ̈ርሳምባራ ዱማ ዱማ ማላ̇ን ቤንቲ̇ ሙታ̇ ኢንቲ ታማ̈ርሲኖ ቲሚርቲ̇ን ኪን ማ̈ቂ̇ኖን ኤሪሲዴ።]
Đang chọn:
ማ̈ርቆ̈ሳ 16: ኦጫ̈ቃማ
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
