ሉቃ̈ሳ 12

ዬሱ̈ሲ ፋራሳ̈ዋን ኦቲሪን ጋልዳፖ̇ ና̈ጊንቲ̇ብቴ̇ ጌይዴ

ማ̈ቶ̈ሳ 10፡26-33

1ዪና̇ ኢዝባራ ዎይሊን ሙኩላ ማ̈ቂ̇ዝ ዎርዦ ዎል ዎልኣ ዬንቲ̇ዝ ዲራ̈ስ ሺ̈ቃር ዎዶ̈ን፥ ዬሱ̈ሲ ቲ̈ኒታር ፌ ታማ̈ራንኮ ሶ̈ሊ̈ርዶሪ “ዪንቲ̇ ፋራሳ̈ዋን ኢርሺን ጋልዳፖ̇ ና̈ጊንቲ̇ብቴ̇፥ ኢዛር ኦቲራ። 2ፋላ̇ ጋልዳ ኬስካካ̇ይ ካጚንታ̇ር ኤሪንታ̇ካ̇ይ ኣ̈ሺንታ̇ር ኣቲ̇ዝ ባዚ ባዬ̇። 3ዪ̈ኮታ̇ቦ ም ጋርታ̇ ዪንቲ̇ ሶ̈ሊኖ ባዝ ዎይ ፎ̈ኢን ጋልዳ̇ ሲስኪ̇ንቲ̈ሬ። ኬ̈ ጋርታ̇ዶ̈ር ዋይ ጋርታ̇ ሳ̈ሲጛር ሶ̈ሊኖንዳ̇ ዎይሊን ኣሲ ሺ̈ቂዝ ቤስ̇ ጋልዳ̇ ሶ̈ሊንታ̇̈ሬ።

4“ታ ላጋ̇ን! ቴ ዪንታ̇ክ ጋ̈ዚንዳ፥ ዎ̈ርኮ ዪንታ̇ ኣይሺ̇ን ሙታ̇ ዎ̈ርዶኬ ኢናፖ̇ ዎሃ ዪንታ̇ ጋልዳ ሜላ ባዝ ኣባካር ዎታንዳ̇ብ ዳንዳኢባ̈ሶንቦ ኢ̈ጫፒ̇ቴ። 5ዎቲናካሬ ዪንቲ̇ ኦ̈ብ ኢ̈ጫ̇ንዳ̇ብ ኮሺ̇̈ርኮ ቴ ዪንታ̇ ቤይሳ̇ንዳ̇፥ ዪ̈ዳሬ ኣይሺ̇ን ዎኖፖ̇ ዓኒ ሼምፒ̇ን ቴይቂ̇ባ̈ሶ ታማ ጋርታ̇ ሚሻንዳ̇ብ ሲልጣ̈ና ዎ̈ቦ ኢ̈ጪብቴ̇። ኣ̈፥ ኢ̈ብ ኢ̈ጪ̇ብቴ̇።

6ኢሺ̇ን ሱ̈ና̇ን ፔቲ̇ ሳንቲ̇ ዎጚንቲ̈ር ባያ? ኢንታ̇ ጋርታ̇ፖ̇ ፔታ̇ኒንዳ̇ ጾ̈ሳ̇̇ ቲ̈ን ቦቲጚንታ̇ባሴ። 7ዪንታ̇ ጋልዳ ዎ ዪንታ̇ ቆሚ̇ን ኢሲንን ዎይ ኣታካ̇ይ ፋይዲንቲ̇ኔ። ዪዚ ዪ̈ኮታ̇ቦ ኢ̈ጫፒ̇ቴ፤ ዎይሊን ሱ̈ናንፖ̇ ዪንቲ̇ ሺ̈ሬ።

8“ቴ ዪንታ̇ብ ሶ̈ላዚንዳ̇፥ ኣሳ ቲ̈ን ‘ቴ ዬሱ̈ሳዬ’ ጌዪ ማርኪቲዛ̈ቦ ዎይ ቴ ኣሳ ናኣ̈ዳር ማ ጾ̈ሳ̇̇ ኪ̈ታንቻ̇ን ቲ̈ን ‘ኢ ቴዬ̇’ ጋ̈ር ማርኪታ̈ሬ። 9“ኣሳ ቲ̈ን ታ̈ና ‘ቴ ኢያ ኤራባሴ’ ጌይኖ̈ዳ ጾ̈ሳ̇̇ ኪታንቻ̇ን ቲ̈ን ‘ቴ ኢያ ኤራባሴ’ ጋ̈ሬ። 10ቴ ኣሳ ናኣ ጋልዳ̇ ኢ̈ት ሶ̈ሊኖ ኣሳብ ዎይ ኣቶ̇ ጌዪንቲ̇̈ርዶ̈ን ጌ̈ሻ̇ ኣያ̇ና ቆ̈ኖ̈ቦ ኣቶ̇ ጌዪንቲ̇ባ̈ሴ።

11“ኣሳን ዪንታ̇ ኤ̈̇ሪ ኣይሁዳን ዎ̈ሳ ኬ̈ሳ̇ ጋርታ̇ ዎይ ጋዣን ቲ̈ንኬ ኣላቃን ቲ̈ን ዪንታ̇ ሺ̈ሻ̇ዚምባ̇ራ ዪንቲ̇ ‘ቴ ዓት ዎዛርጋ̈ኖ፤ ኣ ሶ̈ላኖ?’ ጋ̈ር ሜቲንታ̇ፒ̇ቴ። 12ዪና̇ ኢዝባራ ጌ̈ሻ̇ ኣያ̇ና̈ዲ ዪንቲ̇ ሶ̈ላንዳ̇ብ ኮሻ̇ዝ ባዚን ዪንታ̇ ታማ̈ርሲ̈ሬ” ጌይዴ።

ና̈ሳ ዱራ ዳሺቲ

13ዎርዣ ጊዳ̇ፖ̇ ፔቲ̇ ኣሲ ዬሱ̈ሳኮ “ኣስታማ̈ራ̈ዶ! ኑ ባ̈ባ̈ ኑ̈ብ ኬ̈ሂኖ ጋዲ ዎዶ̈ን ታ̈ብ ፋጋምፔ̈ኒ ዋ̈ዴ ቴ ኢሻ̈ቦ ሶ̈ሊሼ” ጌይዴ።

14ኢያር ና̈ሳ̈ክ ማሂ̈ርዶሪ “ታ̈ና ዪንታ̇ ጋልዳ ዳይና ማሂኖ ኦ̈ኖ?” ጌይዴ። 15ማ̈ቃ̇ር ኢንታ̇ክ ጋ̈ሪ “ኣሲ ሳ̈ዝ ጋልዳ̇ ዎይሊን ላይ ዶኢዛ̈ዲ ቆሊን ኢ̈ብ ዎይሊኖኮታ̇ብ ጊዳካ̇ዮን ኤሪብቴ̇። ዎይ ባዛብ ጊዥጊዥ ጋ̈ዚን ጋልዳ̇ፖ ና̈ጊንቲ̇ብቴ” ጌይዴ።

16ማ ኢናፖ̇ ሚሳ̇̈ሊ ኢንታ̇ብ ሶ̈ሊ̈ርዶሪ “ዎት ዎቲን ካ ዎይሊን ኢ̈ብ ካጺ̇ኖ ፔቲ̇ ዱር ኣሲ ዎ። 17ዪ ና̈ሳ̈ዲ ‘ቴ ካን ናቲዝ ቤሲ̇ ታ̈ብ ባዮ̇ኮታ̇ቦ ቴ ዓት ዪዚ ዎዛርታ̇ኖ?’ ጋ̈ሪ ፌ ቡ̈ዳ ጋርታ̇ ቆፒ̇ዴ።

18‘ቴ ዪዚ ዪስታ̇ስቶ፦ ታ̈ብ ዎ ዲኣን ኮራ ሜላ ሻኪሻክ ዲኢሳራ ኢናፖ̇ ቴ ካንኬ ቴ ቆሊንን ዎይ ኢና ሺ̈ሻ̇ንዳ̇ 19ኢናፖ̇ ቴ ሼምፒ̇ንኮ “ቴ ሼምፒ̇ንዴ! ዎይሊን ላይብ ጊዲዝ ካ ቴ ኔ̈ብ ሺ̈ሺ̇ኔ፤ ዪዚ ሼምፓ ዶኣራ ሙያ ኡሽካ̇ ኡፋይስባር ዶኣቤ” ጋ̈ንዳ̇’ ጌይዴ።

20ጾ̈ሲ̇ ኢ̈ክ ጋ̈ሪ ‘ኣ̈ን ዳሻ̈ዲ! ዓታ̇ብ ቃም ኔ ሼምፒ̇ን ኔ ጋልዳ̇ፖ ኤኪ̇ንታ̇̈ሬ። ዪዚ ኔ ኔ̈ብ ሺ̈ሺ̇ኖ ዎይ ኦ̈ብ ኣቲ̇̈ራ?’ ጌይዴ። 21ዪዚ ጾ̈ሳ̇̇ ቲ̈ን ዎርባያ ማ̈ቃ̇ር ሳ̈ዝ ጋልዳ̇ ፌ̈ቦ ቆሊን ሺ̈ሺ̇ዝ ኣሲ ኢ ዉርሲንዳ̇ ዪኒ̇ፌ̈ን ማ̈ቃ̇̈ሬ” ጌይዴ።

22ኢናፖ̇ ዬሱ̈ሲ ፌ ታማ̈ራንኮ “ዪዚ ቴ ዪንታ̇ብ ሶ̈ላዚንዳ̇ ‘ኑ ኑ ጋርሳ̇ብ ኣ ሞ̈ኔ? ጋላ̇ብ ኣ ማኣኔ?’ ዪዝ ጋ̈ሪ ዪንታ̇ ቡ̈ዳ ኣፒቴ። 23ኣባ ጌይን ፊ̈ሻፖ̇ ሼምፓ፤ ኣፊላፖ̇ ጋሊ̇ ሺሬ። 24ቁ̈ራን ቤቂ̇ብቴ!̇ ካ ዋባ̈ሲ ዎይ ቴይሲ̇ባ̈ሲ፤ ካ ሺ̈ሺ̇ዝ ቤሲ̇ ዎይ ዲኢ ኢንታ̇ብ ባዬ̇። ዎቲናካሬ ጾ̈ሲ̇ ኢንታ̇ ሙሲ̈ሬ፤ ካፊፖ ዪንቲ̇ ሺባ̈ሳ? 25ዪንታ̇ ጋርታ̇ፖ̇ ጫና̇ቂንታ̇ሪ ፌ ላይን ጋልዳ̇ ፔቲ̇ ላይ ጉጃ̇ንዳ̇ብ ዳንዳኢዛ ኦ̈ኖ? 26ዪንቲ̇ ዪዚ ዪኒ̇ፌ̈ኖ ጊሊ̇ ባዚን ኦ̈ንዳብ ዳንዳኢባ̈ስኮ ሜላ ባዛብ ኣባብ ዪንታ̇ ቡ̈ዳ ኣ̈̈ራ? 27“ዪዚ ማ̈ቲ̇ቶ̇ ቡናን ዎዛርፌ̈ን ዲጪ̇̈ርኮ̇ ዪንቲ̇ ቤቂ̇ብቴ̇። ዋ̈ይባ̈ሲ፤ ፉ̈ታ̇ ሱኪ̇ባ̈ሲ፤ ዎቲናካሬ ካ̈ታ ሶሎሞ̈ኒ ዎይሊን ቦንቺንቲ̇ኖ ኣስዶ̈ሪ ዪን ቡናን ጋርታ̇ፖ̇ ፔታ̇ኒንዲፌ̈ን ቆይሲዝ ኣፊላ ማኣካ̇ዬ። 28ጾ̈ሳ̇̇̈ባር ኣማ̇ኒንቲ̇ባ̈ሶ ኣሳን! ዓታ̇ብ ቤንታ̇ር ጊያ̈ብ ታሚታ̇ ጌላር ሚጫ̇ር ዪዝ ማ̈ታን ጾ̈ሲ̇ ዪ̈ዲፌ̈ን ማኢሲ̈ርኮ፥ ዪንታ̇ ዎዛርፌ̈ን ሺሻር ማኢሲባ̈ሳ? 29ዪዚ ዪንቲ̇ ‘ኑ ኣ ሞ̈ኔ፥ ኣ ኡሽካ̇ኔ’ ጌ̈ይዝ ቲ̈ሪስባር ዪንታ̇ ቡ̈ዳ ኣ̈ፒ̇ቴ። 30ዪዚ ኣላማ ጋልዳ̇ ዎ ኣሲ ዎይ ዪኖ̇ ዲጛንዳ̇ብ ዎጺቲ̇̈ሬ፤ ዎቲናካር ዪንታ̇ ባ̈ባ̈ዲ ዪኖ̇ ዪንታ̇ብ ኮሻ̇ዚን ኤሪ̈ሬ። 31ዪዚ ዪንቲ̇ ዪኒ̇ፖ ጾ̈ሳ̇̇ ካ̈ቲቲን ኮዪብቴ̇፤ ሜላ ባዝ ዪን ዎይ ዪንታ̇ብ ጉጂንቲ̇̈ሬ።

32ዪንቲ̇ ጊላ̇ ዎርዣን! ኣፋ ዎ ዪንታ̇ ባ̈ባ̈ዲ ፌ ካ̈ቲቲ ዪንታ̇ብ ኢማ̇ንዳብ ኮዪኖኮታ̇ቦ ኢ̈ጫፒ̇ቴ። 33ዪንታ̇ብ ዎ ባዝ ጌዳ ዎ̈ጛሪ ዎርባያንቦ ኢሚ̇ብቴ̇። ዉሲ̇ ኤኪ̇ባ̈ሶ ቤሲ̇፤ ቢላ ሞ̈ባሶ ቤሲ̇፤ ሲሊቲባ̈ሶ ኮራጃ ዪንታ̇ብ ጊ̈ጊሳሪ ኢዝ ጋርታ̇ ዪንታ̇ብ ዉሪባ̈ሶ ቆሊን ኣፋ ዪንታ̇ብ ሺ̈ሺ̇ብቴ̇። 34ኣባ ጌይን ዪንታ̇ ቡ̈ዲንዳ̇ ዪንታ̇ ቆሊንን ዎ ቤሲ̇ን ኢዞ ቆፓ̇̈ሬ።

ሚ̈ጛር ና̈ጊ

35ዪንቲ̇ ዎይ ጋላስ ኦ̈ሳብ ጊጺ̇ ዲንዲ̇ኖ ኣስ ማ̈ቃ̇ር ዶኢብቴ̇። ዪንታ̇ ፎ̈ኢንንዳ̇ሬ ፎ̈ኣሙታ̇ ዶኣጋ̈ቤ። 36ላ̈̈ዲ ኢሳ̇ ጋርታ̇ ሉካ̇ር ዲጊ̇ሳ ሙዪ ማ̈ቂ̇ ዬይዝ ዲራ̈ስ ናጊ ዶኣሪ ኢ ዬ̈ር ካሪን ቆንኬጌይን ኤሊ̇ባር ፊርቃ̇ንዳብ ና̈ጋር ዎ ኣሳን ማይጺብቴ። 37ላ̈ ዬ̈ዚምባ̇ራ ሱርቃካ̇ይ ና̈ጋር ዎ ኣይላን ኢንቲ̇ ኣንጂንቲ̇ኖን። ቴ ዪንታ̇ክ ኪን ጋ̈ሬ፥ ላ̈̈ዳሬ ኢንታ̇ብ ዎ̈ሲንታ̇ንዳብ ዲንዲ̇̈ሬ፤ ኢናፖ̇ ኢንታ̇ ሙሲ ኡሺ̇̈ሬ። 38ላ̈̈ዲ ቃም ጊዲ̇ቢላር ማ̈ቆ̇ ዎንማ̈ር ማ̈ቆ̇ ዬ̈ዚምባ̇ራ ሱርቃካ̇ይ ና̈ጋር ዎ ኣይላን ዪን ኣንጂንቲ̇ኖን። 39ዪንቲ̇ ዪኖ̇ ኤሪብቴ̇፥ ሶሎ ኣ ሳኣ̈ታ ጋርታ̇ ዬይርኮ ኣ̈ሊን ባ̈ባ ኤሪኖኮ ኢ ቦ̈ካ̇ዚምባ̇ር ዚምዶኢባ̈ስዶ̈ን። 40ታ̈ኒ ኣሳ ናኣ̈ዲ ዪንቲ̇ ቆፓ̇ካ̇ዮ ኬል̇ባራ ዬ̈ይዛኮታ̇ቦ ጊ̈ጊንታ̇ር ና̈ጊብቴ̇” ጌይዴ።

41ጴ̈ጥሮ̈ሲ ኢ̈ኮ “ጎዶ! ዓና̇ ሚሳ̇̈ሊን ኔ ሶ̈ላዚንዳ ኑ̈ብ ሙታ̇ቤ ሜላንባር ዎይያ?” ጌይዴ 42ኢናፖ̇ ጎዳ̈ዲ ማሂ̈ርዶሪ “ዪዚ ፌ ኣ̈ሎ ኣሳንብ ኢንቲ̇ ሞ̈ዝ ቃላ̇ቢን ኢንታ̇ብ ኮዪሳዝ ኬሊ̇ንባራ ኢሚ̇ዛ ላ̈ ሹ̈ሚኖ ኣማ̇ኒንቲ̇ኖ̈ዲኬ ኤጫ ማ̈ቂ̇ኖ ኣይላ̇ ኦ̈ኖ? 43ላ̈ ማ̈ቂ̇ ዬ̈ዚምባ̇ራ ዪኒ̇ፌ̈ኒ ዎቲ ሙታ̇ ና̈ጊዝ ኣሲ ኢ ኣንጂንቲ̇ኖ̈ዳ። 44ቴ ዪንታ̇ክ ኪን ጋ̈ሬ፥ ዪ ፌ̈ኖ ና̈ሳዲ ላ̈̈ብ ዎ ቆሊን ዎይ ጋልዳ̇ ሹ̈ሚንቲ̇̈ሬ። 45ዪ ኣይላ̈ዲ ‘ቴ ላ̈ ኤሊ̇ ዬ̈ባሴ ጋምኢ̈ሬ’ ጋ̈ር ቆፓ̇ሪ̇ ኣቲናኬ ማጫ̇ ኣይላን ኤ̈̇ ቡኪ̇ ማ ፌ ኮዪኖ̈ዲፌ̈ኒ ሙዪ ኡሽኪ̇ ማሲቲ ኤ̈̇ጌይንዶ̇፥ 46ኢ ላ̈ ኢ ቆፋካ̇ዮ ጋላስ ዬይሬ። ዬ̈ሪ ፌ ኣይላ ኢ̈ት ቡኪ̇ ኢያ ፋባ̈ሶ ኣሳንባር ፋይዲ̈ሬ። 47ኢ ላ̈ ኮያዝ ባዚን ኤሪሙታ̇ዶ̈ሪ ጊጊንቲ̇ባ̈ሶ̈ዲኬ ኢ ቆፊን ኦ̈ባ̈ሶ ኣይላ ዪ ኢ̈ት ጋራ̇ፊንቲ̇̈ሬ። 48ማ ዪኖ̇ ኤራካ̇ይ ኣታ̇ሪ ጋራፊሲዝ ባዝ ኦ̈ኖ ኣይላ̈ዲ ጊላ̇ ጋራ̇ፊንቲ̇̈ሬ። ዎይሊን ኤኪ̇ኖ ኣሳፖ̇ ዎይ ዎይሊን ኮዪንቲ̇̈ሬ። ዎይሊን ዓዳራ ኤኪ̇ኖ ኣስ ጋልዳፓ̇ሬ ዎይሊን ባዚ ኮዪንቲ̇̈ሬ።

ዬሱ̈ሳ ጊሽ ኣሲ ዎል ዎልኣ ፋጊንቲ̈ሬ

ማ̈ቶ̈ሳ 10፡34-36

49ታ̈ኒ ዬይኖንዳ ̇ሳ̈ዝ ጋልዳ ታማ ኤይሲንዳቦ፤ ኢዛ ዓት ዪዚ ኤሊ̇ባር ኤ̈ንታ̇̈ርኮ ታ̈ና ዎዝርፌ̈ን ኡፋይሳ̇ና! 50ዎቲናካር ቢርት ታ̈ና ዬሊ̇ዝ ሜታ ዎ። ዪና̇ ፎቲንታ̇ዝ ዲራ̈ስ ታ̈ና ጫናቂሺኔ። 51ታ̈ኒ ሳ̈ዝ ጋልዳ̇ ሳሪቲ ኤሄ̈ንዳ̇ብ ዬይኖ ዪንታ̇ብ ማይጺ̈ራ? ዪዝ ጊዳካ̇ዬ። ታ̈ኒ ሳ̈ዝ ጋልዳ̇ ኣስ ዎል ዎልኣ ፋጋንዳ̇ቦ ዬይኔ። 52ዓኒ̇ፖ̇ ኤ̈̇ሪ ፔቲ̇ ኣ̈ላ ጋርታ̇ ዎ ኢሺ̇ን ኣሳን ዎል ዎልኣ ፋጊንቲ̇̈ሬ። ዓይዛን ናምኣን ጋልዳ̇ ናምኣን ዓይዛን ጋልዳ̇ ጎይል ዲንዳ̇ሪ ዎል ዎልኣ ፋጊንቲ̇̈ሬ። 53ባ̈ባ̈ ፌ ናኣ ጋልዳ̇፣ ናኣ̈ዲ ፌ ባ̈ባ̈ ጋልዳ̇፣ ኢንዲ̇ን ፌ ናኢን ጋልዳ̇፣ ናኢን ፌ ኢንዲ̇ን ጋልዳ̇፣ ኣ̈ኪ̇ን ፌ ናኣ ማጪ̇ን ጋልዳ̇፣ ናኣ ማጪ̇ን ኣ̈ኪ̇ን ጋልዳ̇ ጎይል ዲንዳ̇ሪ ዎል ዎልኣ ፋጊንቲ̇̈ሬ” ጌይዴ።

ኬሊ̇ን ኤራንዳ̇ብ ኮሺ̇̈ሬ

ማ̈ቶ̈ሳ 16፡2-3

54ዬሱ̈ሲ ማ ዎርዣ̈ኮ ጋ̈ሪ “ሻ̈ራ ኣዋ̈ፍ ጌላ ጎይ ሻ̈ሪቴጌይን ቤቃ̇ሪ ዪንቲ̇ ‘ኢሪ ኬዳ̇ንዳ̇ብ ዎቲ̈ሬ’ ጌይሬ። ዪንቲ̇ ጌይኖንዲ̇ፌ̈ኒ ኢሪንዳ̇ር ኬዳ̇̈ሬ። 55ኣይጊ ሲጛል ጎይፖ̇ ዓኒ ባቄ̇̈ጌይንዶ̇፥ ዪንቲ̇ ‘ዓታ̇ብ ሳ̈ዚ ሚ̈ን ኣውቲ̇̈ሬ’ ጌይሬ። ኢዛር ኪን ዪንቲ̇ ጌይኖንዲ̇ፌ̈ኒ ኣውታ̇̈ሬ። 56ዪንቲ̇ ኣሳ ቲ̈ን ኮሽ ማይጻር ቤንታ̇ንዳብ ኮዪዛን፥ ሳ̈ዝ ጋልዶ̇ ባዝኬ ኣፎ ኢሪ ኬዳ̇ዚንዲኬ ኣዋ ኣውታ̇ዚን ኤሪ̈ርዶሪ፥ ማ ዓና̇ ዓቶ̇ ኬሊ̇ን ኤራንዳ̇ብ ዎዛርታ̇ር ዪንታ̇ ጋማ?

57“ዪዚ ዪንቲ̇ ኪን ማ̈ቂ̇ኖ ባዝ ኤራር ኣባብ ኦ̈ባ̈ሳ? 58ኔ ጻላ̈ታባር ሞ̈ቲንታ̇ንዳ̇ቦ ዳይና ቲ̈ን ሉካ̇̈ርዶራ ጎይም ጋልዳ̇ ኢባር ኢጊንቲ̇ዝ ጎይ ኮያቤ። ዪኒ̇ፖ ኣቴጌይን ኢ ኔ̈ና ዳይናኮ ኤ̈ጚ̈ሪ ዳይና̈ዳሬ ፖ̈ሊሳብ ኣ̈ ኢሚ̇̈ሪ ኢያር ኔ̈ና ቃሺ ኣ̈ል ጌልሲ̇̈ሬ። 59ዪዚ ቴ ኔ̈ክ ጋ̈ዚንዳ ኔ̈ና ጪጎ̇ ጌይኖን ዎይ ዉርሳ ጪጋካ̇ይዶራ ኢናፖ̇ ኬስካ̇ባሶን ኤራቤ” ጌይዴ።

Đang chọn:

ሉቃ̈ሳ 12: ኦጫ̈ቃማ

Tô màu

Chia sẻ

Sao chép