Markus 4

Bazlam minew meslìgè daw

Mata 13:1-9; Luka 8:4-8

1A pat duwa, Yesuw a mbəɗ gər aà gùva duluv Galile asa. A waya metsìkè guma ŋgar a mburma. Gà mburma hinne virisìkw tə daha a təv ŋgar. Aɗaba taŋa, a daha, a tsəl a slə̀làh yam duwa a riŋ aà gùva duluv ata ika gər yam. A sìrìk dər aà gìgìze ya aka gər yam zaakwa. A ndza aɗəm a fata. Gà mburma mandza ŋa ɗa ika gìgìze. 2Dite a ɗe a tarra iɗəm à guma ŋgar a hinne ndaka bazlam minew a. I huɗ guma ŋgar ata ya ka, a gwaɗa a tar: 3«Tsarakum, dzùmar zləm lele. Wele duwa a riŋ, a ndzək hwife daw. A da dər a dala aà meslige. 4I təv ana a riŋ a slige a ya ka, wur daw ata a dza aka vatwa. Gà ɗiyeŋ tə daha, ta pala. 5Asiŋ ŋa a dza aà sik kuvəl, a təv ana ahəɗ ikəka hinne tsiye. A ɗeba bise, a sləl tsara, aɗaba ana biye iɗəm tsiye. 6Aləka pat a zlara ahər a mbulum a ka, a wànà daw ata, a kula tsara, aɗaba ahəɗ ata ka, ɗùɗùrwàkùŋŋa biye iɗəm tsa. 7Wur ŋa i ŋgiɗ pam asa, a dza aà huɗ adak. Adak ata a zlala aakahər zlàlaw zlàlaw, a dza aaka mezite. Daw ata aka ge ba asa tsa, a mətsaha siter. 8Ama wur ŋa i ŋgiɗ pam asa, a dza aka ahəɗ ana ŋgwal ŋa ya. Ŋgat ka, a sləl, a gəl ba kwitsikw, a da a bəra, dite a ge ba hinne: biy ŋgiɗ dzìsl gèher a kəzləm, biy ŋgiɗ asa fàhha, biy ŋgiɗ ibam, tìs aɗəm.» 9I dəba ŋa ya, Yesuw a gwaɗa a tar: «Dzùmar zləm lele, na gər kurum aka ge aà metsereke ya.»

Aɗaba la na Yesuw a fàfəl ndaka bazlam minew a

Mata 13:10-17; Luka 8:9-10

10Aləka i dəba ŋa ya, gà Yesuw nda gà ɓəzla mazazama ŋgat a kurwa gəra sula ŋa aaha, dite nda gà asiŋ gà mburma ana tə tsaraka bazlam ŋgar ata ya, ta hitse i fataya, tə da. A təv ana ti de a, ti ndze diriŋ aà gà mburma ya ka, ta gwaɗa a Yesuw: «Bazlam ata ndeɗiŋa kà tsik ndaka bazlam minew a ka, maa tsaraka tsəna, ɗif a mər dər te.» 11Yesuw a gwaɗa a tar: «Kurum ka, Mbulum aka ɗif a kurum à dukw ana makàhà ŋa i mekwere ŋgar a. Ama gà mìsle ŋgiɗ tì dze a zləm ka, a dukw ana ti tsik a ter a ndaka bazlam minew a pəra. 12Taŋa a riŋ mewetse ŋa i wakita Mbulum ka, a gwa:

<Ku mege ta fir ahər a lele tekeɗe ka,

ndə̀tàràmàŋŋa ta ŋgeter a tsa.

Ku mege tàa dzar zləm lele tekeɗe ka,

ndəkəmma ti tsereke a ɓav tsa asa.

Aɗaba na mege tə sər ka,

ta mère a a dəba a təv Mbulum a,

dite mə̀ pəl a tar à bakal tar.> «*fa*

Yesuw a ɗif à bazlam minew meslìgè daw

Mata 13:18-23; Luka 8:11-15

13I dəba ŋa ya, Yesuw a gwaɗa a tar: «Kàa tsarakum bazlam minew gà ata tsiye? Na kàa tsarakum tsəna, meme na dite ki tserekwim a gà bazlam minew ŋgiɗ pampam a? 14Aɗaba taŋa na i tsik a. Wele ata a slige hwife daw ata ya ka, ŋgat a ne ka, mala metsìkè bazlam Mbulum. 15Gà mìsle ŋgiɗ ka, ti ndzikiɗ ba wur daw ata a dza aka vatwa ya ɗekɗek. Taŋa ka, a ndzikiɗ ba biy gà mburma ana ti tsereke a bazlam ata ka, ama Əbay sitene a dehe a tsara, a ndzehe a bazlam ata ta gəs a gəzləŋ tar a. 16Gà mìsle ŋgiɗ pam asa, ti ndzikiɗ ba wur daw ata a dza aà sik kuvəl a. Ta gis a bazlam ata a gəzləŋ tar nda gà maŋgayaba tsara. 17Ama bazlam ata a ŋge a zlile aà mendze i gəzləŋ tar tsa. Mendze tar a riŋ ika vatwa Mbulum hinne tsa. Zàkwayiya, na bəla mawùràba bazlam, kige tsa mesewere are aka ge a tar ba a gər ka, ŋgwìɗik ta miyek a à magəsa bazlam ata tsara. 18Gà mìsle ŋgiɗ pam asa, ti ndzikiɗ ba wur daw ata a dza aà huɗ adak a. Ti tsereke a bazlam Mbulum, 19ama madzala gà gər mesewere are a be a tar i gəzləŋ a hinne. Tar ihər ti dzele a gà gər aka limana, a bene a tar, nda mege are aka dukw mburma tserdze. Aɗaba taŋa, gà dukw ata tserdze ya ka, ta bets a bazlam Mbulum i gəzləŋ tar a. Ta gis a ka, gà dukw ata ɗekɗek. Bazlam Mbulum a ge a ter a ŋgulum asa tsa. 20Gà mìsle ŋgiɗ pam ka, tar ti ndzikiɗ ba wur daw ata a dza aka ahəɗ ŋgwal ŋa ya. Ti tsereke a bazlam Mbulum, ta gis a a gəzləŋ tar nda ndzer. Tar ka, ti ne kamala wur daw ata a sləl ika ahəɗ ata ŋgwal ŋa, dite a ge ba hinne ya: biy ŋgiɗ ilik ka, dzìsl gèher a kəzləm, biy ŋgiɗ asa ka, fàhha, dite biy ŋgiɗ ka, tìs aɗəm.»

Bazlam minew lalampa ana i təv dzəgəɗaf ŋa ya

Luka 8:16-18

21I dəba ŋa ya, Yesuw a gwaɗa a tar asa: «Wura a sle a aà mezlera lalampa, dite a tike a aà huɗ maàslə̀làh à, kige tsa aà huɗ tasà ya? A tike a ana, a təv ana, dzəgəɗaf a tsiye? Tsəka, wura a ŋget a a dzaydzay ŋa a riŋ, a ge a ŋgulum tsa. 22Kamala taŋa ya, dukw ana makàhà ŋa kinehe ya ka, aləka aka miɗ mba ka, a ta pèt a aba lele. Dite dukw ana gà mburma tə sər kinehe tsiye ka, aləka aka miɗ ka, a sir a ba lele. 23Aɗaba taŋa, dzùmar zləm lele, na gər kurum aka ge aà metsereke ya.»

24Yesuw a gwaɗa a tar asa: «Ama ka, gwim metsehe a dukw ana i tsik a kurum a ya lele, dite ki gwim a metsehe a dukw ana ki gwim a a gà mburma ŋgiɗ pampam a asa. Dukw ana kàa gwim a tar a ka, Mbulum tekeɗe, à me a kurum a dər aɗəm ka, kamala taŋa ya mbaŋa. Ama ŋgat kəla ka, à zè a dər biy na kì gwim a ter a fit. 25Aɗaba wur ana aka gəs bazlam ana i tsik a ya ka, a sər *mekwere Mbulum ana a kwere a ya, Mbulum à sikehe a dər aaka asa. Wur ana aka gəs kwizikw a ka, Mbulum à dzik a ihər kwizikw ŋa ata ya mbaŋa asa.»

Bazlam minew hwife ana ti slige ka, dite a slil a ya

26Yesuw a gwaɗa a tar asa: «*Mekwere Mbulum a ndzikiɗ ba ka, hwife ana mburma a slige a ya. Wele ata a slige hwife ata a gùvàh ŋgar. 27I dəba ŋa ya, hawa a ge ka, a de a a ma. A ndze a are. Mbulum aka də̀v ka, a hitse a asa. Kəla pat kataya. Zàkwayiya ka, daw ata a sliliŋa. A slil a dze ana, meme ka, wura a sər tsa. 28Ahəɗ a slil a daw ata à gər ŋgar. Malahalah ŋa ka, simir ŋa dzekwiŋ. I dəba ŋa ya ka, a gil a ba dàmbasl ŋa, a de a a bəra, sùput ŋa, dite à nèh a, a ge a wur kuɗa. 29Na daw ata aka nah, aka kula, masàsà ŋa ide ka, mala gùvàh aaha ndeɗiŋa ya, a zle a matuhwa, à ses a dər daw ŋgar aaha.»

Bazlam minew wur dukw ana hinne tsiye

Mata 13:31-32,34-35; Luka 13:18-19

30Yesuw a gwaɗa a tar asa: «Wànà i gweɗe a kurum a, *mekwere Mbulum a ndzikiɗ ba ana, dukùla asa ya? I ɗe a dər dze ana, ndaka bazlam minew awara asa ya? 31Aɗaba mekwere Mbulum a ndzikiɗ ba ka, wur dukw ana hinne tsa kamala wur meserek a. Ar ka, kwizikw ika magər gà dukw medile ana ti slige a dze ya. 32Ama tàa slige ka, a sliliŋa, kwitsikw a de a aà mbulum hinne, à zè a gà dukw medile tserdze. A zlele a ahər zlàlaw zlàlaw hinne asa mbaŋa. Dite gà ɗiyeŋ ti ndze aɗəmiŋa, ta ge aɗəm a ga tar.»

33I dəba ŋa ya, Yesuw a tsik a tar bazlam minew ŋgiɗ pampam hinne asa. A live dər aba nda gà dukw ata pampam a tsik a tar a. A tsikewa a tar ka, dukw ana gà mburma ata ti tsereke a lele ya. 34Aɗaba a tsikewa bazlam ŋgar ze bazlam minew tsa pəra. Ama i təv ana tar nda gà ɓəzla mazazama ŋgat a ka, a ɗe a tar à bazlam minew ata fit dze.

Yesuw a kwara akaba gà himbiɗ nda yam

Mata 8:18,23-27; Luka 8:22-25

35Pat ata Yesuw a tsik a tar aba bazlam ata ya tsara ka, ndaàwa ŋana a gwaɗa a gà ɓəzla mazazama ŋgat: «Tàkwa aka lìdè duluv ŋgiɗ.» 36Gà ɓəzla mazazama ŋgat ata, tə tsaraka kataya tsara ka, tə tsəlaha a slə̀làh yam ata ŋgat iɗəm a. Ta mah ba, tə da. Tə zla dər ŋgat. Ta miyak à gà asiŋ gà mburma ata a fata. Gà asiŋ gà mburma ŋgar ŋgiɗ i liwiŋ gà mburma ata mbaŋa. Tə ndzaya a gà biy ŋgiɗ, tə zazamaha ŋgat. 37Ti ndze a magər duluv ka, himbiɗ batsah ŋa a dza ba aà mege. Yam a tsele akaba a hinne, a de aka terehe aɗəmiŋa. 38Ama Yesuw ka, ŋgat a riŋ ika mendze are aà dəba tar. A tike gər aka təv gər. Gà ɓəzla mazazama ŋgat ata, ta ge magəɗa hinne, ti dzedzeriŋa. Ta piɗeke à ŋgat. Ta gwaɗar: «Əbay, kər ka, ki ndze a are ana, meme? Ki dzèkwe a a yam.» 39Aləka Yesuw a hitse aà mbulum ka, a kwara akaba himbiɗ ata. Dite a gwaɗa a yam aaha asa: «Ndza ɗikɗik, kà ɓə̀zl aba asa tsa.» Gà himbiɗ ata nda yam a ka, ta gəs bazlam ŋgar tsara, tàa ɓazla aba asa tsa. 40Dite Yesuw a gwaɗa a gà ɓəzla mazazama ŋgat ata: «Aɗaba la na ki gwim a magəɗa dze ya? Wànà kàa gəsum iye a gəzləŋ kurum zukw tsiye?» 41Ama medzedzere i ba tar mba hinne. Ta gwaɗaba ika magər tar: «Naha dze ana, weke ɗara, na a kwere akaba a gà himbiɗ nda yam ka, ta gis ahər a ahəm a?»

Đang chọn:

Markus 4: gnd

Tô màu

Sao chép

So sánh

Chia sẻ