مرقس 2
2
سِيذِيثْنغ عِيْسَى يسْݣنْفَا يجّن ن ونشْرُوْف
1منْبَعْد إِ شَان وُوْسَّان، ئِذْوڒ-د عِيْسَى عَاوذ غَار وبِيلَاج ن كَفرْنَاحُوْم سْڒِين يوْذَان بلِّي اَقَاث ذِي ثدَّارْث. 2مُوْنن اَطَّاس ن ڒْغَاشِي يعمَّر ڒْحَاڒ اَڒ وَامِي وَار يقِّيم ؤُڒَا ذ يجّن ن ومْشَان وَاخَّا زَّاث إِ ثوَّارْث. ئِسَّاوَاڒ اَكِذْسن عِيْسَى س وَاوَاڒ ن أَربِّـي. 3ؤُسِين-د شَان يِوْذَان ؤُوِين-اَس-د يجّن ن ورْيَاز مُّوْثن-اَس يضَارن، يْسِين-ث اَرْبعَا إِذْسن خ ثَاسُّوْث نّس. 4وَار زمِّيرن شَا اَث سِيذْفن غَار عِيْسَى مِينْزِي ذِنِّي اَطَّاس ن ڒْغَاشِي. قڒْعن سّْقف شْوَايْت رزْمن-ث، سهْوَان اَنشْرُوف نِّي خ ثَاسُّوْث نّس غَار وخَّام مَانِي يدْجَا عِيْسَى.
5وَامِي يࢲْرَا عِيْسَى لْإِيمَان نْسن، ينَّا-ٱس إِ ونشْرُوْف نّي: "آ مِّي تْوَاغْفَرنْت-اَش ڒْمُعْصِيَاث نّش."
6شَان يمْسڒْمَاذن ن شَّرِيعَا إِي يقِّيمن ذِنِّي تْفكَّرن نَّان ذݣ وُوْڒَاون نْسن: 7"مَامّش يسَّاوَاڒ بْنَاذم-أَ اَمُّو؟ ئِقَّار اَوَاڒ وَار يحْڒِين خ أَربِّـي. ؤُݣ يزمَّرن اَذ يغْفَر ڒْمُعْصِيَاث إِلَّا أَربِّـي وَاحْذس!؟"
8ذغْيَا يسّن عِيْسَى ذِي نّفْس نّس مِين تْفكَّرن ذِي ڒَعْقُوْڒَاث نْسن ينَّا-ٱسن: "مَايمِّي تْفكَّرم اَمُّو كنِّيو ذِي ڒَعْقُوْڒَاث نْوم؟ 9مِين يسهْڒن اَطَّاس اَذَاس ينِيغ إِ ونشْرُوْف-أَ، مَا ٱذَاس ينِيغ: تْوَاغْفَرنْت-اَش ڒْمُعْصِيَاث نّش؟ نِغ مَا ٱذَاس ينِيغ: كَّر شك، يْسِي ثَاسُّوْث نّش ؤُيُوْر؟ 10نش خْسغ اَذ تسّْنم بلِّي مِّيس ن بْنَاذم غَارس سُّلْطَا خ ثْمُوْرْث حمَا اَذ يغْفَر ڒْمُعْصِيَاث." أُوْشَا ينَّا-ٱس عِيْسَى إِ ونشْرُوْف نِّي: 11"أَذَاش ينِيغ، بدّ خ يضَارن نّش يْسِي ثَاسُّوْث نّش رُوْح اَذ تْروّْحذ غَار ثدَّارْث نّش!"
12ڒخْدّنِّي يبدّ خ يضَارن نّس ييْسِي ثَاسُّوْث نّس يفّغ زَّاث إِ يِوْذَان مَارَّا. قِّيمن كُڒْشِي ذهّْشن حمّْذن أَربِّـي نَّان: "عمَّارْص مَا نࢲْرَا مَانَايَا يوْقع زِي قْبڒ."
سِيذِيثْنغ عِيْسَى ئِتْڒَاغَا-د إِ لَاوِي
13يفّغ عِيْسَى عَاوذ غَار طَّارْف ن ڒبْحَر، ؤُسِين-د غَارس مَارَّا ڒْغَاشِي يسڒْمَاذ-يثن ذِنِّي. 14وَامِي يعْذُو سّنِّي، يُوْفَا لَاوِي مِّيس ن حَلْفَى يقِّيم غَار مِيسَّا ذݣ ومْشَان مَانِي جمّْعن ضَّرِيبَا. ينَّا-ٱس عِيْسَى: "ذْفَار-اَيِي-د." أُوْشَا يكَّر يذْفَار-يث.
15ئِقِّيم عِيْسَى ذِي ثدَّارْث ن لَاوِي، يتتّ نتَّا ذ يمحْضَارن نّس. أَطَّاس ن يعشَّارن ذ يِنِّي يعصَّان زَعْمَا قِّيمن تتّن اَكِذس ڒَاحقَّاش اَطَّاس ن يِوْذَان إِي ث يذفَّارن. 16شَان يمْسڒْمَاذن ن شَّرِيعَا زِي ڒْحِزب ن يفَرِّيسِيّْين ؤُفِين عِيْسَى يتتّ اَك يعشَّارن#2.16 مِين عنَّان يعشَّارن؟ نِثْنِي زِي أَيث-إِسْرَائِيل خدّْمن اَك ڒْمخْزن ن اَرُّوْمَانُوْس جمّْعن ضَّرِيبَا زِي أَيثْمَاثْسن. ئِسْرَائِيلِيْين نّضْنِي قَّارن بلِّي يعشَّارن عصَّان اَطَّاس. عَاوذ اَزْين اَمقّْرَان ن يعشَّارن اَرنِّين شِي حَاجَا حمَا اَثنْت يْسِين إِ يِيخف نْسن. ذ يِنِّي يعصَّان زَعْمَا، نَّان إِ يمحْضَارن نّس: "مَايمِّي يتتّ نتَّا اَك يعشَّارن ذ يِنِّي يعصَّان؟"
17ئِسْڒَا-يَاسن عِيْسَى ينَّا-ٱسن: "ئِوْذَان يصحَّان وَار تحْذِيجِين بُو وضْبِيب، أَضْبِيب تحْذَاجَان-ث يمهْڒَاش." ينَّا-ٱسن: "نش وَار د ؤُسِيغ شَا اَذ ڒَاغِيغ إِ يِنِّي يدْجَان نِيشَان، ؤُسِيغ-د غَار يِنِّي يعصَّان."
تْسقْسَان سِيذِيثْنغ عِيْسَى خ ثْࢲُوْمِيث
18تُوْغَا يمحْضَارن ن يَحْيَى ذ يمحْضَارن ن ڒْحِزب ن يفَرِّسِيْين نِثْنِي تْࢲُوْمَّان. ؤُسِين-د يِوْذَان غَار عِيْسَى نَّان-اَس: "مَايمِّي يمحْضَارن ن يَحْيَى ذ يمحْضَارن ن ڒْحِزب ن يفَرِّسِيْين تْࢲُوْمَّان، ئِمحْضَارن نّش وَار تْࢲُوْمِّين شَا؟"
19ينَّا-ٱسن عِيْسَى: "ئِمدُّوْكَاڒ ن مُوْڒَاي، مَا زمَّرن اَذ ࢲُوْمّن ذِي نْهَار نِّي ن ڒْفَارْح نّس؟ لَّا، خْمِي يتِيڒِي مُوْڒَاي اَكِذْسن وَار زمَّرن اَذ ࢲُوْمّن. 20وَلَكِن اَذ د اَسن وُوْسَّان اَذ يميْسِي مُوْڒَاي زِي ڒْوسْط نْسن، ڒخْدّنِّي اَذ ࢲُوْمّن ذي نْهَار نِّي.
21وَار يدْجِي حَدّ يتْرقَّاع اَرُّوْض ذ ڒْبَاڒِي س يِجّن ن ثْرقِّيعْث ن تُّوْب ذ جْذِيذ، مَايمِّي؟ ڒَاحقَّاش ثَرقِّيعْث نِّي ن تُّوْب ذ جْذِيذ اَذ تْنجْمع اَذ تْوَاكّس زݣ وَارُّوْض نِّي ذ ڒْبَاڒِي. ڒخْدّنِّي اَذ يقِّيم وشَارِّيݣ يمْغَر! 22ؤُڒَا ذ اَمَان ن وضِيڒ ذ جْذِيذ وَار خدْجْقن شَا ذݣ يِيڒمَاون يقْذِيمن، حمَا وَار دُّوْقُّوْزن وَار تْزدْجِيعن شَا وَامَان ن وضِيڒ اَذ ضيّْعن يِيڒمَاون نِّي. وَلَكِن اَمَان ن وضِيڒ ذ جْذِيذ خدْجْقن ذݣ يِيڒمَاون ذ جْذِيذ."
مِين يدْجَان حَلَال ذِي نْهَار ن سّبْث ن لْعِبَدَا
23ئِجّن ن نْهَار ن سّبْث ن لْعِبَدَا، ئِعْذُو عِيْسَى ذݣ وبْرِيذ ذِي ڒْوسْط ن يمنْدِي، ݣُّوْرن اَكِذس يمحْضَارن نّس بْذَان تكّْسن ثِيْذرِين. 24نَّان-اَس ڒبْعَاض زِي ڒْحِزب ن يفَرِّيسِيْين: "خْزَر! مَايمِّي يمحْضَارن نّش تݣّن مِين يدْجَان حْرَام ذِي نْهَار ن سّبْث ن لْعِبَدَا؟"
25ئِنْدق-د عِيْسَى ينَّا-ٱسن: "مَا وَار ثغْرِيم شَا مِين يݣَّا دَاود وَامِي يحْذَاج، ئِدْجُوْز نتَّا ذ يِنِّي اَكِذس؟ 26يُوْذف غَار ثمْزِيذَا ن أَربِّـي ذِي زْمَان ن أَبْيَاثَار اَرَّايس ن ڒْفُقَهَا، يُوْفَا ذِنِّي اَغْرُوْم نِّي إِي يدْجَان ذ صّذْقث يشَّا نتَّا يُوْشَا-ٱسن إِ يِنِّي اَكِذس؛ وَاخَّا مَانَاينِّي وَار يدْجِي شَا حَلَال غِير إِ ڒْفُقَهَا وَاهَا."
27أُوْشَا ينَّا-ٱسن: "نْهَار ن سّبْث ن لْعِبَدَا يتْوَاخْڒق إِ سَّبَاب ن بْنَاذم، مَاشِي ذ بْنَاذم يتْوَاخڒْقن إِ سَّبَاب ن نْهَار ن سّبْث ن لْعِبَدَا. 28ڒَاحقَّاش مِّيس ن بْنَاذم إِݣ يدْجَان ذ لْحَاكم حتَّا خ نْهَار ن سّبْث ن لْعِبَدَا."
Đang chọn:
مرقس 2: ريف
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
