مرقس 15

تَاوِين سِيذِيثْنغ عِيْسَى غَار لْحَاكم بِيلَاطُس

1وَامِي يصْبح ڒْحَاڒ، مُوْنن اَرُّوْيَاس ن ڒْفُقَهَا، ذ يمقّْرَانن ن أَيث-إِسْرَائِيل، ذ يمْسڒْمَاذن ن شَّرِيعَا، ذ مَارَّا جْمَاعث ن لْحُكَّام نْسن مْشَوَارن جَارَاسن. شَرْفن عِيْسَى ؤُوِين-ث اَث سلّْمن إِ لْحَاكم اَرُّوْمَانِي ؤُمِي قَّارن بِيلَاطُس.

2ئِسّقْسَا-ث بِيلَاطُس ينَّا-ٱس: "مَا ذ شك ذ اَزدْجِيذ ن أَيث-إِسْرَائِيل؟"

ينَّا-ٱس عِيْسَى: "أَقَا ثنِّيذ-ت شك."

3قِّيمن ذِنِّي اَرُّوْيَاس ن ڒْفُقَهَا تَهَامن-ث اَطَّاس.

4ينَّا-ٱس بِيلَاطُس إِ عِيْسَى: "مَا وَار ثْقَّارذ وَالُو؟ قَا خْزَر مشْحَاڒ خَاك تْشثْشَان!" 5ئِقِّيم بِيلَاطُس يتْعجّب وَامِي وَار خَاسن يَارِّي بُو وَاوَاڒ عِيْسَى.

6ذِي مْكُڒ ڒْعِيذ اَمقّْرَان ينُوْم بِيلَاطُس يضدْجق-اَسن-د إِ يجّن ن ومحْبُوْس عْلَاحْسَاب ونِّي يخس شَّعْب. 7ئِجّن ن ومحْبُوْس قَّارن-اَس بَارَابَاس، ݣِّين-ث ذِي ڒحْبس اَك يِنِّي يتْحرَّابن ضد إِ ڒْمخْزن مِينْزِي نْغِين يجّن ن بْنَاذم ذِي ڒْفَوْضَا. 8ݣَعّْذن ڒْغَاشِي غَار بِيلَاطُس، بْذَان تتَّارن زَّايس اَذَاسن يݣّ مِين ينُوْم يتݣّ-اَسن.

9ينَّا-ٱسن بِيلَاطُس: "مَا ثخْسم اَذَاوم د ضڒْقغ إِ وزدْجِيذ ن أَيث-إِسْرَائِيل؟" 10ئِسّن بِيلَاطُس بلِّي اَرُّوْيَاس نِّي ن ڒْفُقَهَا سلّْمن-اَس عِيْسَى ڒَاحقَّاش حسْذن-ث. 11كَّرن اَرُّوْيَاس نِّي ن ڒْفُقَهَا قڒْبن اَزدْجِيف إِ ڒْغَاشِي نِّي حمَا اَذَاسن د يضْڒق إِ بَارَابَاس. 12ئِنْدق-د بِيلَاطُس ينَّا-ٱسن: "إِيوَا مِين ذَاس غَا ݣّغ إِ بْنَاذم-أَ ؤُمِي ثقَّارم قَا نتَّا ذ اَزدْجِيذ ن أَيث-إِسْرَائِيل؟"

13سْنكَّرن ثْغُوْيّث س جّْهذ قَّارن: "صلّْب-يث!"

14ينَّا-ٱسن بِيلَاطُس: "مَايمِّي؟ مَان لْجَرِيمَا إِݣ يݣّا وَانِيتَا؟"

وَلَكِن اَرنِّين سْنكَّرن ثْغُوْيّث س جّْهذ قَّارن: "صلّْب-يث!"

15بِيلَاطُس وَامِي يرزُّو اَذ يسعّف ڒْغَاشِي نِّي، يضْڒق-اَسن-د إِ بَارَابَاس. سّنِّي ؤُوْثِين عِيْسَى س وسْغُوْن يسلّْم-اَسن-ث حمَا اَث صلّْبن خ صَّلِيب.

16ؤُوِين-ث ڒْعَسْكَار غَار ذَاخڒ، غَار ڒمْرَاح ن ڒقْصَار ن لْحَاكم، سْمُوْنن-د ذِنِّي مَارَّا لْفِرْقَا ن ڒْعَسْكَار نِّي. 17ݣِّين خَاس اَسڒْهَام ذ اَزݣّْوَاغ.#15‏.17 ذَا ذ لْأَيَا 20، نْزمَّر اَ نِينِي اَزݣّوَاغ نِغ ݣْرُوْنَا. مُوْذن-اَس يجّن ن تَّاج ن يسنَّانن ݣِّين-اَس-ث خ وزدْجِيف نّس. 18بْذَان تْسدْجَامن خَاس قَّارن-اَس سَّلَام آي اَزدْجِيذ ن أَيث-إِسْرَائِيل. 19شَّاثن-ث س يِجّن ن وغَانِيم غَار وزدْجِيف نّس، سُّوْسُوْفن خَاس، ترْكَاعن-اَس، تْسجَّاذن-اَس.

تَاوِين سِيذِيثْنغ عِيْسَى حمَا اَث صلّْبن

20وَامِي خَاس كمّْڒن اَبُوْصَار، كّْسن-اَس اَسڒْهَام نِّي اَزݣّْوَاغ ݣِّين-اَس اَرُّوْض نّس ؤُوِين-ث حمَا اَث صلّْبن.

21ئِجّن ن ورْيَاز يكَّا-د زِي ڒْكَامْپُو يعْذُو-د سّنِّي. أَرْيَاز نِّي زِي ثنْدِينْت ن لْقُرِينَا قَّارن-اَس سِمْعَان، نتَّا ذ بَابَاس ن إِسْكَنْدر اَك أَرُوْفُس. ݣِّين خَاس ڒْعَسْكَار صَّلِيب س بزّز حمَا اَث يَرْبُو.

22ؤُوِين عِيْسَى غَار يِجّن ن ومْشَان قَّارن-اَس <ݣُلْݣُوْطَا.> (ڒْمَعْنَا ن يِيسم-أَ: أَمْشَان ن جُمْجُمَا.) 23ؤُشِين-اَس اَمَان وضِيڒ يخلّط ذَايْسن يجّن ن دّْوَا ذ اَمرْزَاݣ قَّارن-اَس مُوْرّْ، وَلَكِن يُوْݣِي عِيْسَى اَثن يسو. 24صلّْبن-ث، فرْقن اَرُّوْض نّس جَارَاسن. ݣِّين لْقُرْعَا حمَا كُڒ يجّن مين غَا ييْسِي. 25تُوغَات ذ تسْعَا ن صْبَاح وَامِي ث صلّْبن. 26غَار وزدْجِيف نّس ݣِّين-اَس يجّن ن ثڒْوِيحت ثُوْرَا ذَايس تُّهْمَا نِّي يقَّارن: "وَانِيتَا ذ اَزدْجِيذ ن أَيث-إِسْرَائِيل." 27صلّْبن اَكِذس ثْنَاين ن يشفَّارن، ئِجّن خ وفُوْسِي يجّن خ وࢲڒْمَاض نّس. 28{س مَانَاينِّي يكمّڒ مِين يُوْرِين ذِي لْكِتَاب قَا حسْبن-ث زِي لْمُجْرِمِين.}

29ئِوْذَان إِي تكّن سّنِّي تُوْكَّارن-ث تْهزَّان اَزدْجِيف نْسن قَّارن-اَس: "مَا ذ شك إِي غَا يهذْمن ثَمْزِيذَا ثَمقّْرَانْت اَت تبْنِيذ ذِي ثڒْتِيَّام!؟ 30نجَّا يخف نّش هْوَا-د زݣ وجنَّا زِي صَّلِيب-أَ!"

31ؤُڒَا ذ اَرُّوْيَاس ن ڒْفُقَهَا ذ يمْسڒْمَاذن ن شَّرِيعَا تْبُوْصَرن خَاس عَاوذ قَّارن إِ وَايَاوْيَا: "ئِسنْجم ينّغْنِي وَلَكِن وَار يزمَّر شَا ڒخُّو اَذ يسنْجم يخْف نّس! 32هْوَا-د آ لْمَسِيح آي اَزدْجِيذ ن أَيث-إِسْرَائِيل ڒخُّو زݣ وجنَّا زِي صَّلِيب-أَ حمَا أَ نࢲر مَانَايَا اَزَّايك نَامن!" أَمنِّي عَاوذ إِي ث زَوَرن لْمُجْرِمِين نِّي إِي كِذس صلّْبن.

سِيذِيثْنغ عِيْسَى يمُّوْث

33غَار ثنْعَاش ؤُزِيڒ، ثهْوَا-د ثَادْجسْت خ ثْمُوْرْث اَمن-ثكْمَاڒ اَڒ وَامِي ذ ثْڒَاثَا وعشِّي. 34غَار ثْڒَاثَا وعشِّي يڒَاغَا عِيْسَى س جّْهذ ينَّا: "إِيْلِي، إِيْلِي، لْمَا سْبَاقْثَانِي؟" ڒْمَعْنَا ن وَاوَاڒ-أَ: "يَا أَربِّـي، يَا أَربِّـي، مَايمِّي ذَايِي ثْسمْحذ؟" 35سْڒِين-اَس ڒبْعَاض زݣ يِنِّي يحْضَارن ذِنِّي نَّان: "أَقَا يتْڒَاغَا خ نَّبِي إِلْيَاس." 36ڒخْدّنِّي يرُوْح يجّن زَّايْسن يقْڒع يتَازّڒ، ييْسِي يجّن ن سْپُوْنْخَا يسغْذص-يت ذݣ وَامَان وضِيڒ ذ يسمَّامن، ئِݣِّي-ت خ يِج وكشُّوْض يُوْشَا-اَس اَذ يسو. ينَّا: "ڒخُّو جّم-ث، أَ نْࢲر مَا ٱذ د يَاس نَّبِي إِلْيَاس اَثِيذ يسِيهْوَا!"

37يڒَاغَا عِيْسَى س يِجّن ن ثْمِيجَّا ثمْغَر يَارَّا نّفْس صَافِي يمُّوْث. 38ڒخْدّنِّي إِݣ يقَّارْص اَرّْوَاق ن ثمْزِيذَا ثَمقّْرَانْت خ ثْنَاين، زݣ وجنَّا اَڒ ثْمُوْرْث. 39ئِجّن ن وعَسْكَارِي ذ اَمقّْرَان ن اَرُّوْمَانُوْس يبدّ ذِنِّي زَّاثس يࢲْرَا ڒْموْث إِݣ يݣَّا عِيْسَى ينَّا: "أَثرَّاس-أَ ذ صَّح ذ مِّيس ن أَربِّـي."

40ذِنِّي شَان ن ثمْغَارِين خزَّرنْت-يد زِي ڒݣّْوَاج، ذَايْسنْت مَرْيَم ثَمَݣْدَالِيث، ذ سَالُوْمِي، ذ مَرْيَم يمَّاس ن يَعْقُوْب اَمزْيَان ذ يُوْسِيس. 41نِثنْتِي تُوْغَا ذفَّارن-ث، تْسخَّارنْت خَاس وَامِي تُوْغَاث يدْجَا ذِي ثْمُوْرْث ن لْجَلِيل. عَاوذ حْضَارنْت اَكِس اَطَّاس ن ثمْغَارِين نّغْنِي زِي ثِنِّي كِس يݣَعّْذن غَار لْقُدْس.

نطّْڒن سِيذِيثْنغ عِيْسَى

42نْهَار نِّي سوْجَاذن إِ نْهَار ن سّبْث ن لْعِبَادَا. وَامِي د ثُوْوض ثْمدِّيث، 43يُوْسَا-د يجّن ن ورْيَاز قَّارن-اَس يُوْسف، زِي دْشَار ن أَرِيْمَاتْيَا. نتَّا ذ يجّن ن ورْيَاز مُهِم جَار جْمَاعث ن لْحُكَّام ن أَيث-إِسْرَائِيل، ئِتْرحَّاب عَاوذ زِي ڒْمُلْك ن أَربِّـي. ئِزْعم يُوْذف غَار لْحَاكم بِيلَاطُس يتَّار-اَس دَّات ن عِيْسَى. 44بِيلَاطُس يذْهش وَامِي يسْڒَا عِيْسَى ذغْيَا يمُّوْث. ئِڒَاغَا-د خ وعَسْكَارِي نِّي اَمقّْرَان ينَّا-ٱس مَا يمُّوْث مَا عَاذ؟ 45وَامِي يسّن بِيلَاطُس زݣ وعَسْكَارِي نِّي عِيْسَى يمُّوْث، ئِسلّم دَّات نّس إِ يُوْسف. 46يُوْسف يسْغَا-د ڒشْفن، ئِسهْوَا-د دَّات نّس#15‏.46 يعْنِي، ئِسهْوَا-د دَّات ن سِيذِيثْنغ عِيْسَى زِي صَّلِيب. يكفّن-يت س ڒشْفن. ئِسرْس-يت ذݣ يِجّن ن ونْضڒ يغْزِين ذݣ وزْرُو يݣَّا اَم يِيفْرِي. ئِسقْنُوْنِّي يجّن ن وزْرُو ذ اَمقّْرَان يَارِّي-ث خ وقمُّوْم ن ونْضڒ نِّي. 47مَرْيَم ثَمَݣْدَالِيث ذ مَرْيَم يمَّاس ن يُوْسِيس خزَّرنْت مَانِي ينْضڒ.

Đang chọn:

مرقس 15: ريف

Tô màu

Chia sẻ

Sao chép