يوحنا 13

سِيذِيثْنغ عِيْسَى يسِّيرِيذ يضَارن ن يمحْضَارن نّس

1قْبڒ إِ ڒْعِيذ اَمقّْرَان، نتَّا عِيْسَى يسّن قَا ڒْوقْث نّس ثُوْوض-د اَذ يمُوْتِّي زِي دُّنشْت-أَ غَار بَابَاس. نتَّا يحِبّ يِنِّي يدْجَان اَكِذس ذِي دُّنشْت، ئِحِبّ-يثن اَڒ ونݣَّارُو. 2قْبڒ اَمنْسِي تُوْغَا إِبْڒِيس يغَرّ يَهُوْذَا مِّيس ن سِمْعَان إِسْخَرْيُوْطِي حمَا اَذ يزّنْز عِيْسَى. 3تُوْغَا عِيْسَى يسّن قَا بَابَاس يݣَّا-ٱس كُڒْشِي ذݣ يفَاسّن نّس، يُوْسَا-د زِي أَربِّـي اَذ يذْوڒ غَار أَربِّـي. 4ئِكَّر خ ومنْسِي يكّس تْشَامِّير نّس، ييْسِي يجّن ن ومنْدِيڒ يصَّار يخف نّس. 5ئِفَرّغ-د اَمَان ذِي ثْبقِّيث#13‏.5 ثَبقِّيث قَّارن-ت إِ ثْحبِّيث. يبْذَا يسِيرِيذ يضَارن ن يمحْضَارن نّس، ئِمْسح-اَسن س ومنْدِيڒ مِيزِي يصَّار يخف نّس.

6وَامِي د يُوْسَا غَار سِمْعَان بُطْرُس ينَّا-ٱس إِ عِيْسَى: "مَا شك آ سِيذِي اَذَايِي ثْسِيرْذذ يضَارن ينُو؟"

7ينَّا-ٱس عِيْسَى: "شك ڒخُّو وَار ثفْهِيمذ شَا مِين خدّْمغ، زِي سَّا اَڒ ثْسَاونْت عَاذ اَذ تْفهْمذ مَانَايَا."

8ينَّا-ٱس بُطْرُس: "ئِضَارن ينُو عمَّارْص اَثن ثْسِيرْذذ."

ينَّا-ٱس عِيْسَى: "مڒَا وَار ذَاش سِيرْذغ، وَار ثْزمَّرذ شَا اَذ تِيڒِيذ ذ اَمحْضَار ينُو."

9ينَّا-ٱس سِمْعَان بُطْرُس: "آ سِيذِي، وَار يدْجِي شَا اَذَايِي ثْسِيڒْذذ يضَارن ينُو وَاهَا، أَذَايِي تْسِيڒْذذ ؤُڒَا ذ يفَاسّن ينُو ذ وزدْجِيف ينُو."

10ينَّا-ٱس عِيْسَى: "لَّا، ونِّي يسِيرِيذن بْڒَا مَا ٱذ يسِيرذ عَاوذ. أَذ يسِيرذ يضَارن نّس وَاهَا مِينْزِي نتَّا قَاع ذ اَمنْقَاوِي. كنِّيو مَارَّا ذ يمنْقَاوِيْين إِلَّا يجّن." 11نتَّا يسّن ونِّي إِي ث غَا يزّنْزن. س مَانَاينِّي ينَّا كنِّيو وَار ثدْجِيم شَا مَارَّا ذ يمنْقَاوِيْين.

12وَامِي ذَاسن يسِيرذ يضَارن نْسن، ئِݣَّا تْشَامِّير نّس يقِّيم عَاوذ ينَّا-ٱسن: "مَا ثْفهْمم مِين ذَاوم ݣِّيغ؟ 13كنِّيو ثقَّارم-اَيِي آ لْمُعَلِّم نِغ آ سِيذِي، كنِّيو غَارْوم ڒْحَقّ مِينْزِي نِيشَان قَا ذ نش. 14مڒَا نش إِݣ يدْجَان ذ سِيذِيثْوم أُو ذ لْمُعَلِّم نْوم سِيرْذغ-اَوم يضَارن نْوم، ئِتْخصَّا ؤُڒَا ذ كنِّيو اَذ تْسِيرْذم يضَارن إِ وَايَاوْيَا. 15ݣِّيغ-اَوم اَمُّو حمَا اَذ تݣّم مِين ݣِّيغ نش. 16أَقَا تسْڒَام ڒْحَقّ: أَخدَّام وَار يدْجِي شَا ذ اَمقّْرَان زݣ ؤُوقَّاف نّس. أَمْسخَّار وَار يدْجِي شَا ذ اَمقّْرَان زݣ ونِّي إِي ثِيذ يسّكّن. 17ڒخُّو ثسّْنم مَانَايَا، سَّعْذ نْوم مڒَا ثݣِّيم مِين ذَاوم نِّيغ.

18نش وَار سِّيوِيڒغ شَا خَاوم مَارَّا، نش سّْنغ ؤُݣ يخْضَرغ. ڒخُّو لَابُد اَذ يكمّڒ مِين د يُوْسِين ذِي لْكِتَاب: <ونِّي يشِّين زݣ وغْرُوْم ينُو، يُوْوث-اَيِي س ونِيرز نّس.> 19سْخبَّارغ-كنِّيو س مَانَايَا قْبڒ مَا ٱذ يوْقع، خْمِي غَا يوْقع اَتَاف اَذ تَامْنم قَا ذ نش إِݣ يدْجَان. 20أَقَا تسْڒَام ڒْحَقّ: ونِّي يقبّْڒن ونِّي إِي د غَا سّكّغ، أَقَا يقْبڒ-اَيِي. ونِّي ذَايِي يقبّْڒن، أَقَا يقبّڒ ؤُڒَا ذ ونِّي إِي ذَايِي د يسّكّن."

21وَامِي ينَّا عِيْسَى مَانَايَا، ئِخيّق ذِي نّفْس نّس ينَّا-ٱسن-ت نِيشَان: "أَقَا تسْڒَام ڒْحَقّ: ئِجّن زَّايوم اَذَايِي يزّنْز."

22ئِمحْضَارن نّس خْزَرن ذݣ وَايَاوْيَا وَار سِّينن ونِّي مِيخف يسَّاوَاڒ. 23ذِنِّي يجّن ن ومحْضَار نّس يعِيزّ خَاس خ عِيْسَى اَطَّاس، نتَّا يقِّيم اَك وغزْذِيس نّس. 24ئِشيَّار-اَس سِمْعَان بُطْرُس ينَّا-ٱس: "سّقْسَا-ث مِين يعْنَا ونِّي مِيخف يسَّاوَاڒ."

25ئِميّڒ غَار عِيْسَى ينَّا-ٱس: "آ سِيذِي، مِين يعْنَا؟"

26ينَّا-ٱس عِيْسَى: "أَذ سِّيسْنغ اَرقُّوْز-أَ ن وغْرُوْم، ونِّي ؤُمِي غَا ث ؤُشغ ذ نتَّا." ئِسِّيسن اَرقُّوْز نِّي ن وغْرُوْم، يُوْشَا-ٱس-ث إِ يَهُوْذَا مِّيس ن سِمْعَان إِسْخَرْيُوْطِي. 27وَامِي يطّف اَرقُّوْز نِّي ن وغْرُوْم يَهُوْذَا ڒخْدّنِّي يُوْذف-يث شِّيطَان. ينَّا-ٱس عِيْسَى: "ذغْيَا، ٱݣّ مين غَا ثݣّذ."

28وَار يفْهِيم ؤُڒَا ذ يجّن زݣ يِنِّي إِي ذِين يحْضَارن خ مِين ذَاس ينَّا. 29تْغِيڒ-اَسن إِ ڒبْعَاض قَا ينَّا-ٱس اَذ يسغ مِين حْذَاجن ذِي ڒْعِيذ نِغ اَذ يصدّق خ يمسْعَان مِينْزِي يَهُوْذَا مْكلّف خ وشمُّوْس ن تْمنْيَاث. 30وَامِي يطّف اَرقُّوْز نِّي ن وغْرُوْم صَافِي ئِفّغ. ڒخْدّنِّي ثُوْوض-د ثْمدِّيث.

سِيذِيثْنغ عِيْسَى يسڒْمَاذ يجّن ن ڒُوْصِيّث ذ جْذِيذ

31وَامِي يفّغ يَاهُوْذَا ينَّا عِيْسَى: "ڒخُّو يتْوَاسمْغَار مِّيس ن بْنَاذم، يتْوَاسمْغَار س مِّيس ؤُڒَا ذ أَربِّـي. 32مڒَا أَربِّـي يتْوَاسمْغَار س مِّيس، أَتَاف اَث يسمْغَار عَاوذ أَربِّـي ذݣ يِيخف نّس، أُو ذغْيَا اَث يسمْغَار. 33آ ثَارْوَا ينُو، ثقِّيم ذْرُوْسْت ن ڒْوقْث بَاش اَذ يڒِيغ اَكِذْوم. أَخَافِي ثْرزُّوْم. مِين نِّيغ نش إِ يسْرَائِيلِيْين اَذَاوم ت ينِيغ ڒخُّو إِ كنِّيو: مَانِي غَا رَاحغ نش، وَار ثْزمَّرم شَا اَذ د تَاسم ذِنِّي. 34ڒخُّو تِيشّغ-اَوم يجّن ن ڒُوْصِيّث ذ جْذِيذ: حِبّث اَيَاوْيَا. أُو حِبّث اَيَاوْيَا مَامّش كنِّيو حِبّغ نش. 35مڒَا كنِّيو تْحِبِّيم اَيَاوْيَا، أَتَاف اَذ سّْنن مَارَّا قَا كنِّيو ذ يمحْضَارن ينُو."

36ينَّا-ٱس سِمْعَان بُطْرُس: "مَانِي غَا ثْرَاحذ آ سِيذِي؟"

ينَّا-ٱس عِيْسَى: "مَانِي غَا رَاحغ نش، ڒخُّو وَار ثْزمَّرذ شَا اَذَايِي ثذْفَارذ ذِنِّي. وَلَكِن عَاذ اَذَايِي د ثذْفَارذ."

37ينَّا-ٱس بُطْرُس: "آ سِيذِي، مَايمّي وَار زمَّرغ شَا اَش ذْفَارغ ڒخُّو؟ نش اَخَاك صدّْقغ ثُوْذَارْث ينُو!"

38ينْدق-د عِيْسَى ينَّا-ٱس: "مَا ذ صَّح اَخَافِي ثْصدّْقذ ثُوْذَارْث نّش؟ أَقَا تسْڒِيذ ڒْحَقّ: أَذَايِي ثنْكَرذ ثْڒَاثَا ن ثْوَاڒَاثِين قْبڒ مَا ٱذ يدّن ويَازِيض."

Đang chọn:

يوحنا 13: ريف

Tô màu

Chia sẻ

Sao chép