يوحنا 10

سِيذِيثْنغ عِيْسَى يتْصدَّاق ثُوْذَارْث نّس خ يحُوْڒِيْين نّس

1"أَقَا تسْڒَام ڒْحَقّ: ونِّي وَار يتِيذْفن شَا زِي ثوَّارْث ن ڒْكُوْرِي ن يحُوْڒِيْين يتْݣَعَّاذ مَانِيس نّغْنِي، نتَّا يتْوَاحْسَاب ذ اَشفَّار ذ اَخوَّان. 2وَلَكِن ونِّي د غَا يَاذْفن زِي ثوَّارْث نتَّا إِݣ يَروّْسن يحُوْڒِيْين نّس. 3أَعسَّاس ن ڒْكُوْرِي اَذَاس يرْزم ثَوَّارْث إِ ونِّي إِي يَروّْسن، ئِحُوْڒِيْين نّس تسْڒَان إِ صُّوْت نّس. ئِتْڒَاغَا خ يحُوْڒِيْين نّس س يِيسمَاون نْسن، أَثن يسُوْفغ. 4أَذ يسُوْفغ مَارَّا يحُوْڒِيْين نّس يݣُّوْر زَّاثْسن، ئِحُوْڒِيْين نِّي ذفَّارن-ث مِينْزِي سّْنن صُّوْت نّس. 5وَلَكِن اَثَرَّاس ن مِيدّن وَار ث ذفَّارن عمَّارْص، اَزَّايس اَروْڒن مِينْزِي نِثْنِي وَار سِّينن شَا صُّوْت ن وثَرَّاس ن مِيدّن." 6ينَّا-ٱسن عِيْسَى ڒمِثَال-أَ، وَلَكِن نِثْنِي وَار فْهِيمن شَا ثِمسْڒَايِين مِيخف إِي ذَاسن يسَّاوَاڒ.

7ينَّا-ٱسن عِيْسَى عَاوذ: "أَقَا تسْڒَام ڒْحَقّ: نش ذ ثَوَّارث ن ڒْكُوْرِي. 8مَارَّا يِنِّي د يُوْسِين قْبڒ إِ نش نِثْنِي تْوَاحَاسْبن ذ يشفَّارن ذ يخوَّانن، ئِحُوْڒِيْين نِثْنِي وَار غَارْسن سْڒِين شَا. 9نش ذ ثَوَّارث، ونِّي زَّايي غَا يَاذْفن اَذ ينْجم. أَذ يِيڒِي اَمشْنَاو يجّن ن وحُوْڒِي يتَاذف يتفّغ يتَاف مِين غَا يشّ. 10نتَّا اَشفَّار يتَاس-د غِير اَذ يَاشَار اَذ ينغ اَذ يهْذم. نش ؤُسِيغ-د حمَا اَغَارْسن ثِيڒِي ثُوْذَارْث نِّي ن ثُوذَارْث بْڒَا ڒقْيَاس.

11نش إِݣ يَروّْسن ذ صَّح. ونِّي إِݣ يَروّْسن ذ صَّح يتْصدَّاق ثُوْذَارْث نّس خ يحُوْڒِيْين نّس. 12أَخدَّام مَاشِي اَم ونِّي يَروّْسن يحُوْڒِيْين نّس نِّيث. أَخدَّام، مڒَا يࢲْرَا ؤُشَّان يُوْسَا-د اَذ يسْمح ذݣ يحُوْڒِيْين نِّي اَذ يَرْوڒ. ؤُشَّان اَذ يهْجم خ يحُوْڒِيْين اَثن يعْزڒ خ وَايَاوْيَا. 13أَخدَّام اَذ يَرْوڒ مِينْزِي نتَّا ذ اَخدَّام وَاهَا، وَار ث تْهِيمِّين شَا يحُوْڒِيْين.

14‏-15نش ذ ونِّي إِي ثن يَروّْسن ذ صَّح. سّْنغ يحُوْڒِيْين ينُو يحُوْڒِيْين ينُو سّْنن-اَيي، مَامّش ذَايي يسّن بَابَا نش سّْنغ-ث. ثُوْذَارْث ينُو، تْصدَّاقغ-ت خ يحُوْڒِيْين ينُو. 16غَاري يحُوْڒِيْين نّغْنِي وَار دْجِين شَا ذِي ڒْكُوْرِي-يَا، ئِتخصَّا-ٱيي اَثن د اَوِيغ. أَذ سْڒن إِ صُّوْت ينُو اَذ تِيڒِي ذ يجّن ن ثْحِيمرْث ذ يجّن إِي ثن غَا يَروْسن. 17س مَانَايَا بَابَا يتْحِبَّا-ٱيي مِينْزِي نش تْصدَّاقغ ثُوْذَارْث ينُو حمَا عَاوذ اَتِيد اَرّغ. 18ؤُڒَا ذ يجّن وَار زَّايِي ت يتكّس شَا؛ لَّا، نش تْصدَّاقغ ثُوذَارْث ينُو س ڒْخَاضَر ينُو. غَاري جّْهذ حمَا اَت صدّْقغ. غَاري جّْهذ حمَا اَتِيد اَرّغ عَاوذ. أَمُّو إِي ذَايِي يوصَّا بَابَا."

19يوْقع لْخِلَاف عَاوذ جَار يسْرَائِيلِيْين خ وَاوَاڒن-أَ. 20نَّان اَطَّاس زَّايسن: "وَانِيتَا ذَايس جْنُوْن. نتَّا ذ اَبُوْهَاڒِي، مَايمّي غَارس تسْڒَام؟"

21نَّان ينّغْنِي: "أَوَاڒن-أَ وَار ثن يقَّار شَا ونِّي إِي ذِي دْجَان جْنُوْن. مَا يزمَّر شَان يِجّن زِي جْنُوْن اَذ يسْݣنْفَا ثِيطَّاوِين ن يضَرْغَاڒن؟"

سِيذِيثْنغ عِيْسَى ذ بَابَاس نِثْنِي ذ يجّن

22يُوْوض-د ڒْعِيذ لْمِلَاد ن ثمْزِيذَا ثَمقّْرَانْت ن أَيث-إِسْرَائِيل ذِي لْقُدْس. مَانَايَا ذِي ڒْمشْتَا، 23عِيْسَى يݣُّوْر ذݣ وسقِّيف ن سُوْلِمَان ذِي ثمْزِيذَا ثَمقّْرَانْت. 24مُوْنن خَاس يسْرَائِيلِيْين نَّان-اَس: "أَڒ مڒْمِي ش غَا نْرَاجَا؟ مڒَا شك ذ لْمَسِيح، إِنِي-يَانغ-ث نِيشَان!"

25ينَّا-ٱسن عِيْسَى: "نِّيغ-اَوم-ث، كنِّيو وَار تِيمْنم شَا. ڒخْذَايم إِي تݣّغ عْلَاحْسَاب يسم ن بَابَا شهّْذنْت خَافِي. 26وَلَكِن كنِّيو وَار تِيمْنم شَا مِينْزِي وَار ثدْجِيم شَا ذ يحُوْڒِيْين ينُو. 27ئِحُوْڒِيْين ينُو تسْڒَان غَار صُّوْت ينُو، سّْنغ-ثن نِثْنِي ذفَّارن-اَيي. 28تِيشّغ-اَسن ثُوْذَارْث ن ڒبْدَا عمَّارْص وَار فنِّين شَا، وَار ثن يخطّف ؤُڒَا ذ يجّن زݣ وفُوْس ينُو. 29ذ بَابَا إِي ذَايي ثن يُوْشِين أُو نتَّا ذ اَمقّْرَان زِي كُڒْشِي. وَار يزمَّر ؤُڒَا ذ يجّن اَثن يخْضف زݣ وفُوْس ن بَابَا. 30نش ذ بَابَا ذ يجّن."

31ئِسْرَائِيلِيْين نِّي يْسِين-د عَاوذ يزْرَا اَث رجْمن. 32ينَّا-ٱسن عِيْسَى: "سْبيّْنغ-اَوم-د اَطَّاس ن ڒخْذَايم ثِصبْحَانِين زِي بَابَا، مَانْت ڒْخذْمث إِي ثخْسم اَذَايِي ثْرجْمم خَاس؟"

33نَّان-اَس يسْرَائِيلِيْين: "وَار ش نْرجّم شَا خ ڒْخذْمث يصبْحَان؛ لَّا، أَش نرْجم وَامِي ثنِّيذ لْبُهْتَان خ أَربِّـي. قَا شك ذ بْنَاذم، ثَارِّيذ يخف نّش ذ أَربِّـي."

34ينَّا-ٱسن عِيْسَى: "مَا ثُوْرَا نِغ لَّا ذِي شَّرِيعَا نْوم بلِّي أَربِّـي ينَّا: <نش نِّيغ-اَوم كنِّيو ذ أَربِّـيثن>!؟ 35نتَّا إِي ذَاسن يقّارن <أَربِّـيثن> إِ يِنِّي ؤُمِي د يُوْسَا وَاوَاڒ ن أَربِّـي، أُو لْكِتَاب ڒبْدَا يقَّار ڒْحَقّ. 36مَا ثقَّارم إِ ونِّي يخْضَر بَابَا يسّكّ-يث-يذ غَار دُّنشْت شك ثنِّيذ لْبُهْتَان خ أَربِّـي مِينْزِي نِّيغ نش ذ مِّيس ن أَربِّـي؟ 37مڒَا وَار خْذِيمغ شَا ڒخْذَايم ن بَابَا، وَار زَّايي تَامْنث شَا. 38مڒَا خذْمغ-ثنْت، أَمْنث زِي ڒخْذَايم نِّي وَاخَّا وَار زَّايِي ثُوْمِينم. أَمُّو اَذ تسّْنم قَا بَابَا اَقَاث ذَايِي، نش اَقَايِي ذِي بَابَا."

39رزُّوْن اَث طّْفن وَلَكِن ينُوْفْسڒ-اَسن جَار يفَاسّن نْسن. 40ئِذْوڒ عَاوذ غَار وجمَّاض-ين ن يغْزَار ن لْأُرْدُن غَار ومْشَان مَانِي تُوْغَا يتْطهَّار يَحْيَى ذݣ ومزْوَارُو، ئِقِّيم ذِنِّي. 41ؤُسِين-د غَارس اَطَّاس نَّان، يَحْيَى وَار يݣِّي ؤُڒَا ذ يجّن ن لْمُعْجِيزَا، وَلَكِن مَارَّا مِين ينَّا خ وَانِيتَا ذ صَّح. 42ؤُمْنن زَّايس اَطَّاس ن يِوْذَان ذِنِّي.

Đang chọn:

يوحنا 10: ريف

Tô màu

Chia sẻ

Sao chép