YAASINƆ 14
14
1Nↄgbɛ̃ ↄ̃ndↄ̃dee è ua káɛ,
à faasaidee sↄ̃ è ua fãakↄ̃a.
2Gbɛ̃ kɛ̀ è yã kɛ a zɛ́a Dii vĩa vĩ,
gbɛ̃ kɛ̀ è zɛ́ sɛ́ súusuroo sↄ̃ è kya kán.
3Faasaide lɛ́n à gbɛ̃bↄ ũ,
ↄ̃ndↄ̃dee yã'ona è à bↄ.
4Tó zù kuuro, pↄ́ble gbà ègↄ̃ da korimɛ,
wè àre bíta e kↄ̃n zùnↄ gbãaao.
5Sèeda yãpuradee è ɛgɛɛ toro,
sèeda ɛgɛde yã ègↄ̃ mↄnafiki vĩ.
6Fabori è kpáɛ kɛ ↄ̃ndↄ̃ↄzi à korazi,
yãdↄ̃na aaga làakarideenɛ.
7Ǹ kɛ̃ yↄ̃nkↄↄa zã̀azã,
zaakɛ nɛ́ dↄ̃na earo.
8Ɔ̃ndↄ̃ↄ è tó làakaridee laasuu lɛ́ a zɛ́a,
yↄ̃nkↄↄ faasaikɛɛ è à sãsã.
9Faasaideenↄ è kya ká taari kúɛkɛnan,
gbɛ̃ maaanↄ ègↄ̃ nna kↄ̃o.
10Baade a zĩnda yã'ↄ̃amma dↄ̃,
gbɛ̃ pↄnnaa ègↄ̃ dɛ gbɛ̃ pãnde pↄ́ ũro.
11Gbɛ̃ zaaanↄ ua é mì dɛ,
gbɛ̃ maaanↄ bɛ é ↄ tá.
12Zɛ́ ke kuu è kɛ gbɛ̃nↄnɛ maa,
mↄde à mìdɛkii nɛ́ gaamɛ.
13Baa yáadↄna guu nↄ̀sɛ è yaka,
pↄnnaa kuu kɛ̀ è mì dɛ kↄ̃n pↄsiaao.
14Bↄrukpɛɛde yãkɛna è wí à musu,
gbɛ̃ maaa è a yãkɛna gbɛ̀ e.
15Laasuusaidee è yã píngi símɛ,
làakaridee è yã náanɛ kɛ laasuulɛna sairo.
16Ɔ̃ndↄ̃dee ègↄ̃ zaakɛna vĩa vĩ è pãnɛ,
yↄ̃nkↄↄ è náanɛ kpá a zĩndaa ègↄ̃ wãna.
17Pↄfɛ̃ri è yã futaa kɛ,
mↄnafikidee è zangu i a zĩndanɛ.
18Ɔ̃ndↄ̃saideenↄ è gↄ̃ faa sai,
làakarideenↄ è dↄ̃na kú fùra ũ.
19Gbɛ̃ zaaanↄ é mì siɛ gbɛ̃ maaanↄnɛ,
zaakɛrinↄ é kúɛ nↄ̀sɛpuradeenↄ kpɛɛlɛa.
20Takaasidee, baa à gbɛ̃daaa è zan,
mↄde auzikide gbɛ̃nnanↄ ègↄ̃ pari.
21Kyakana n gbɛ̃daaan nɛ́ durummɛ.
Aubarikadeen gbɛ̃ kɛ̀ è wɛ̃nda dↄ̃ takaasideenↄnɛ ũ.
22Zaalɛkpakↄ̃sↄ̃rinↄ sãsãnaroo?
Maawaariparinↄↄ sùu vĩ kↄ̃n náanɛo.
23Mɛ̀kpana zĩia ègↄ̃ àre vĩ,
yãbↄɛna pãa è mↄ́ kɛ̃sãnao.
24Ɔ̃ndↄ̃deenↄ auzikimɛ ń fùra ũ,
yↄ̃nkↄↄnↄ faasaikɛɛ è mↄ́ kↄ̃n faasaiyão.
25Sèeda yãpuradee è gbɛ̃ mì sí,
mↄde sèeda ɛgɛdee yã mↄnafiki vĩ.
26Vĩakɛna Diinɛ nɛ́ gbãa'eki náanɛdeemɛ,
à dɛ mìsikii ũ à nɛ́nↄnɛ.
27Vĩakɛna Diinɛ nɛ́ íbↄki wɛ̃̀ndideemɛ,
è tó wà bↄ ga bàn.
28Tó kína gbɛ̃nↄↄ pari, ègↄ̃ gakui vĩ,
bùsugbɛ̃saikɛɛ nɛ́ kpatableri mↄ́nzimɛ.
29Gbɛ̃ kɛ̀ è pↄ fɛ̃ kpaaro wɛ́ɛ kɛ̃na,
pↄfɛ̃ri è a futakɛɛ sɛ́ lezĩ.
30Làakarikpaɛna nɛ́ mɛ̀ aafiamɛ,
zangu è mɛ̀kɛkpɛtɛ kpáńzi.
31Wɛ̃ndade wɛ́ɛtãmmari è à Kɛ̀ri kpɛ bↄ,
takaaside wɛ́ɛgwari è à Kɛ̀ri kpe da.
32Tó kisia gɛ̃̀ zaakɛrizi, è à nɛmɛ,
baa tó gbɛ̃ maaa gà, à utɛkii vĩ.
33Ɔ̃ndↄ̃ↄ è vɛ̃ɛkii e làakaridee nↄ̀sɛn,
mↄde wè e yↄ̃nkↄↄaro.
34Yãzɛdee è bùsu sɛ́ lezĩ,
durun sↄ̃ è wí da gbɛ̃nↄa, baa démɛ.
35Zↄ̀bleri làakaride yã è ká kínanɛ,
mↄde è a pↄfɛ̃ bↄbↄ à wídammaria.
Đang chọn:
YAASINƆ 14: BBB
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Bokobaru Bible with New Testament and OT Portions © Sim International, 2005.