यूहन्ना 16
16
1“टुह्र पाछ नैहट्बो कैक मै यी सब बात कनहुँ। 2टुह्र सभाघरमसे खेद्वापैबो। असिन समय फे अइटीबा, जब टुन्हक हत्या करुइया ‘परमेश्वरक सेवा करटुँ’ कैक विचार करुइया बा। 3हुँक्र ना त बाबह चिह्न्ट, ना त महीह चिह्न्ट। उहओर्से हुँक्र असिन काम करुइयाबाट। 4यी घट्ना हुइलागी त टुह्र ‘उहाँ हमन सब बात पैल्हहेँ कलह’ कैक सम्झबो। उहओर्से मै टुँहन यी बात कहटुँ। मै आम्हीसम टुन्हकसँग पलरलकओर्से टुँहन यी बात कल नैरनहुँ।
पवित्र आत्मक काम
5“आब मै महीह पठुइयकठे जाइटुँ, तर ‘अप्न कहाँ जाइटी?’ कैक टुह्र कुई फे महीह नैपुछ्टो। 6मै यी सब बात कलकओर्से टुन्हक मन दुःखीत हुइल बा। 7तर फे मै टुँहन सत्य बात कहटुँ, मै गैलसे टुन्हक फाइदा बा। काकरकि मै नैजैम कलसे, सहायता देहुइया टुन्हकठे नैअइहीँ। तर मै जैम कलसे, उहाँह टुन्हकठे पठादेहम। 8उहाँ अइहीँ त संसारक मनैन पाप, धार्मिकता ओ न्याय सम्बन्धम हुँक्र कर्टिरहल गल्ती हुँकन देखादेहुइयाबाट। 9म्वारम विश्वास नैकर्ना पाप हो कैक उहाँ हुँकन देखादेहुइयाबाट। 10धार्मिकतक सम्बन्धम हुँक्र कर्टिरहल गल्तीक बारेम उहाँ देखादेहुइयाबाट, काकरकि मै बाबकठे चलजाइटुँ ओ टुह्र महीह फेदोस्र नैदेख्नेहुइटो। 11न्याय सम्बन्धम हुँक्र कर्टिरहल गल्तीक बारेम उहाँ देखादेहुइयाबाट, काकरकि यी संसारक शासक आघहेँ दोषी ठहररहल।
12“मै टुँहन कहपर्ना बात त धेर बा, तर आब टुह्र यहीसे धेर बात सह नैसेक्नेहुइटो। 13सत्यक आत्मा अइहीँ त उहाँ सत्य का हो कना बात टुँहन बुझादेनेबाट। उहाँ आपन तर्फसे बोलुइया नैहुइट। उहाँ आपन सुनल बात टुँहन कहुइयाबाट, ओ पाछ हुइना घट्ना फे जनादेहुइयाबाट। 14उहाँ म्वार बट्वाइल बात टुँहन जनादेक म्वार महिमा प्रकट करहीँ। 15बाबकठे रहल चिज सब म्वार हो। उहओर्से मै कनु, ‘सत्यक आत्मा टुँहन म्वार बात जनादेहुइयाबाट।’
16“कुछ समय पाछ टुह्र महीह नैदेख्नेहुइटो, वाकर कुछ समय पाछ टुह्र महीह फेदोस्र देखुइयाबाटो।”
चेलन्हक शोक ओ आनन्द
17तब उहाँक कौनो-कौनो चेलावँ अप्न-अप्न पुछीकपुछा कर्ल, “‘कुछ समय पाछ टुह्र महीह नैदेख्नेहुइटो, वाकर कुछ समय पाछ टुह्र महीह फेदोस्र देखुइयाबाटो’ ओ ‘मै बाबकठे जाइटुँ’ कैक उहाँ का कहख्वाजल हुइट?” 18हुँक्र कल, “उहाँ ‘कुछ समय पाछ’ कलक का हो? हम्र त बात नैबुझ्टी, उहाँ का कल, का कल।”
19हुँक्र यी बातक बारेम पुछ चाहट कैक येशू थाहाँ पैल। उहाँ हुँकन कल, “मै कनु ‘कुछ समय पाछ टुह्र महीह नैदेख्नेहुइटो, वाकर कुछ समय पाछ टुह्र महीह फेदोस्र देखुइयाबाटो।’ का यिह बातक बारेम टुह्र अप्न-अप्न सोधपुछ करटलहो? 20जाट्टीसे मै टुँहन कहटुँ, टुह्र रुइबो ओ विलाप कर्बो, तर संसार खुशी हुइनेबा। टुह्र शोक कर्बो, तर टुह्र शोक कर्लसे फे पाछ आनन्दित हुइबो। 21महिला लर्का जन्माइबेर बठकमार धेर छट्पटैठी, तर जब ऊ लर्का जन्मैठी, तब ऊ सब दुःख बिस्राडर्ठी काकरकि संसारम एकठो लर्कक् जन्म हुइल कना बातम ऊ खुशी हुइठी। 22ओसहेँक आब टुह्र शोक कर्बो, तर मै टुँहन फेदोस्र भेँटाइ अइम त टुह्र एकदम आनन्दित हुइबो, ओ उ आनन्द टुन्हकमसे कुई फे अछिन्क लैजाइ नैसेक्नेहो। 23उ ब्याला टुह्र महीह कुछु फे नैपुछ्ने हुइटो। जाट्टीसे मै टुँहन कहटुँ, टुह्र म्वार नाउँम बाबसे ज्या मङ्लसे फे उहाँ टुँहन देहुइयाबाट। 24आम्हीसम टुह्र म्वार नाउँम कुछु फे नैमङ्लहुइटो। माङ्गो, त पैबो, तब टुह्र पूरा हिसाबले आनन्दित हुइबो।
25“यी बात मै टुँहन आहानम कैरख्नु। तर समय अइटीबा, उ ब्याला मै टुँहनसे फेदोस्र आहानम नैबोलम, बाबक बारेम टुँहन स्पष्ट रूपले कैदेहम। 26उ ब्याला टुह्र अपन्हे म्वार नाउँम मङ्बो, मै टुन्हक लाग बाबसे माङ देह नैपर्नेहो। 27बाबा अपन्हे टुँहन प्रेम कर्ठ, काकरकि टुह्र महीह प्रेम कैरख्लो ओ मै परमेश्वरकठेसे अइनहुँ कैक विश्वास कैरख्लो। 28मै बाबकठेसे संसारम अइनहुँ, ओ आब संसारह छोर्क फेदोस्र बाबकठे जैटीबाटुँ।”
29उहाँक चेलावँ येशूह कल, “आब पो अप्न आहानम नैबट्वाक, स्पष्ट रूपले बट्वाइटी। 30अप्न सब बात जन्ठी कैक हम्र बुझ्ली। वास्तवम अप्नह प्रश्न पुछ्नासे आघहेँ अप्न जवाफ देडर्ठी। उहओर्से अप्न परमेश्वरकठेसे अइलही कैक हम्र विश्वास कर्ठी।”
31येशू हुँकन कल, “का टुह्र आब विश्वास कर्ठो? 32तर समय अइटीबा ओ वास्तवम आस्याकल, उ ब्याला टुह्र सबजन तितरबितर हुइबो। टुह्र आपन-आपन घर जाजैबो, ओ महीह अकल्हे छोरदेबो। तर फे मै अकल्हे नैहुइटुँ, काकरकि म्वारसँग बाबा बाट। 33टुह्र म्वारम रह्क शान्ति पाइसेको कैक मै टुँहन यी सब बात कनहुँ। संसारम टुँहन दुःखकष्ट सहपरी, तर साहस करो, मै संसारह जितरख्नु।”
Đang chọn:
यूहन्ना 16: thl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2020, Wycliffe Bible Translators, Inc. All rights reserved.
