प्रेरित 8
8
विश्वासीहुँक्र सतावटम पर्लक
1मनै स्तिफनसह मारबेर शाऊल फे सहमत रलह। उह दिनठेसे यरूशलेमक मण्डलीक विरोधम भारी सतावट सुरु हुइल्। प्रेरितहुँक्र बाहेक और सब विश्वासीहुँक्र यहूदिया ओ सामरिया क्षेत्रम तितरबितर हुइल। 2प्रभुक भक्तजनहुँक्र स्तिफनसक मुवल शरीरह गर्ल ओ ऊ मुलकम धेर शोक कर्ल। 3तर शाऊल विश्वासीन नाश कर भिर्ल। ऊ घर-घरम जाक येशूम विश्वास करल पुरुष ओ स्त्रीहुँकन घँस्यैटी जेलम डारदेहँट्।#प्रे २२:४-५; २६:९-११
सामरियम फिलिप प्रचार कर्लक
4तब तितरबितर हुइल् चेलावँ जहोँरतहोँर जाक खुशीक खबर प्रचार कर्ल। 5फिलिप सामरिया कना सहरम जाक येशू मनैन मुक्ति देहुइया ख्रीष्ट हुइट कैक प्रचार कर्ल। 6फिलिपक वचन सुन्क ओ हुँकहार करल अचम्मक काम देख्क भीडक सारा मनै हुँकहार बातम ध्यान देल। 7धेर मनैन्हकमसे भूत जोरले चिल्लैटी निक्रल। प्यारालाइस रोग#८:७ प्यारालाइस रोग: प्यारालाइस रोग लागल मनै आपन शरीरक कौनो भाग या पूरा शरीर चलाइ नैसेक्ट। लागल ओ नाङ्गरलुल हुइल् मनै फे चोखैल। 8असिक सामरिया सहरक मनै बहुत खुशी हुइल।
जादू देखैना मनैया दोषी ठह्रागैलक
9उ सहरम सिमोन नाउँक जादू देखैना एकठो मनैया रह, ऊ जादू देखाक सामरियक मनैन दङ्ग पाररख्लहा। ऊ म्वारअस कुई फे नैहो कैक कह। 10सर्वसाधारण ओ गन्यमान्य सबजन ओहीह मानँट् ओ “महाशक्ति कैजैना परमेश्वरक शक्ति पाइल मनैया हो” कैक कहँट्। 11सबजन ओहीह मानँट् काकरकि ऊ धेर समय आघसे जादू देखाक मनैन दङ्ग पर्लरह। 12तर जब हुँक्र परमेश्वरक राज्य ओ येशू मुक्ति देहुइया ख्रीष्ट हुइट कैक फिलिपक प्रचार करल खुशीक खबर सुन्ल, तब पुरुष मनै ओ स्त्री मनै विश्वास कर्ल ओ बप्तिस्मा लेल। 13सिमोन फे विश्वास करल ओ बप्तिस्मा लिहल। ऊ फिलिपक सँगसँग लग्लरह। फिलिपक करल अचम्मक काम ओ चिन्ह देख्क ऊ छक्क पर।
14सामरिया क्षेत्रक मनै परमेश्वरक वचनम विश्वास कर्ल कैक यरूशलेमम प्रेरितहुँक्र सुन्ल त पत्रुस ओ यूहन्नह हुँकन्हकठे पठैल। 15हुँक्र सामरिया जाक प्रभुकम विश्वास करल मनै पवित्र आत्मा पैहीँ कैक हुँकन्हक लाग प्रार्थना कैदेल। 16काजेकलसे पवित्र आत्मा हुँक्रमध्ये केक्रोम फे नैअइलरलहन। हुँक्र प्रभु येशूक नाउँम पानीक बप्तिस्मा केल लेरख्लह। 17तब पत्रुस ओ यूहन्ना हुँकन्हकम हाँठ ढैक प्रार्थना कैदेल त हुँक्र पवित्र आत्मा पैल।
18प्रेरितहुँक्र मनैन्हकम हाँठ ढरल ब्याला हुँकन पवित्र आत्मा पाइल देख्क सिमोन जादूगर फे प्रेरितन पैँसा देटी कहल, 19“मनैन्हकम हाँठ ढर्लसे पवित्र आत्मा पैना यी शक्ति महीह फे दी।”
20पत्रुस जवाफ देल, “ट्वार पैँसा ट्वारसँग नाश ह्वाए काकरकि टैँ त परमेश्वरक वरदान पैँसले किन सेक्जिठा कैक विचार कर्ल्या। 21यिहिँम ट्वार ना त अधिकार बा ना हिस्सा बा, काकरकि परमेश्वरक नजरम ट्वार मन ठीक नैहो। 22असिन दुष्ट विचारमे आपन मन परिवर्तन कैक परमेश्वरसे प्रार्थना कर्। सायद परमेश्वर टोहीह क्षमा कैदेहसेक्ठ। 23टैँ त डाहाले भरल बाट्या ओ पापक बन्धनम परल बाट्या।”
24यी बात सुन्क सिमोन बिन्ती करल, “अप्नहुँकन्हक कहल यी बात म्वारम जिन आए कैक म्वार लाग प्रभुसे प्रार्थना कैदी।”
25हुँक्र साक्षी देल ओ प्रभुक वचन प्रचार कैक सेक्ल त पत्रुस ओ यूहन्ना सामरिया क्षेत्रक गाउँ-गाउँम खुशीक खबर प्रचार कर्टी यरूशलेमम घुम्ल।
इथियोपिया देशक बडाहाकिम
26तबदोस्र प्रभुक एकठो स्वर्गदूत फिलिपह कल, “उठो, ओ यरूशलेमसे दक्षिनओर गाजा जैना उजार ठाउँक डगरिम जाओ।” 27तब फिलिप उठ्क गैल। उहब्याला इथियोपिया देशक एकठो बडाहाकिम उह डगर जाइटलह। उ मनैया इथियोपिया देशक महारानी कन्दाकीक बरा मनैया ओ सम्पत्तिक हिसाबकिताब करुइया रलह। उ नपुंसक#८:२७ नपुंसक: नपुंसक कलक सन्तान उत्पादन कर्ना क्षमता नाश करावापाइल मनैया हो। मनैया परमेश्वरक आराधना कैक यरूशलेमसे घर घुमटलह। 28ओ आपन रथम बैठ्क यशैया अगमवक्तक लिखल किताब पह्रटलह। 29पवित्र आत्मा फिलिपह कल, “उ रथक पञ्ज्र-पञ्ज्र जाओ।”
30फिलिप दौरटी रथक लग्घ पुग्ल त उ मनैयह यशैया अगमवक्तक लिखल किताब पह्रट् सुन्ल। तबदोस्र फिलिप हुँकहीन पुछ्ल, “अप्न का पहर्टीबाटी, उ बात बुझटी?”
31उ मनैया जवाफ देल, “कुई ना कुई याकर अर्थ नैलगादेहट्सम मै कसिक बुझम्?” तब ऊ फिलिपह रथम चिउह्र कैक आपनठे बैठक लाग बिन्ती कर्ल।
32उ मनैया धर्मशास्त्रक यी खण्ड पह्रटलह,
“उहाँ काट लैगिल् भेँरीअस रलह,
भुत्ला काटबेर भेँरीक पठ्रू चामचुम रहलअस
उहाँक मुहमसे बोली नैफुट्लन।#यशै ५३:७-८
33उहाँक बेइज्जत हुइलन,
उहाँ ठीक न्याय नैपैल।
का उहाँक सन्तानन्हक बयान कुई कर सेकी?
काकरकि मनै उहाँह सिध्यादेल।”
34उ धनसम्पत्तिक हिसाबकिताब करुइया फिलिपह पुछ्ल, “कृपया महीह कही, यी बात अगमवक्ता क्याकर बारेम कलक हुइट? आपनऽ बारेम कि और केक्रो बारेम?” 35तब फिलिप धर्मशास्त्रक उह खण्डसे सुरु कैक येशूक बारेम खुशीक खबर सुनैल।
36जैटी-जैटी डगरिम हुँक्र पानी रहल ठाउँम पुग्ल त, धनसम्पत्तिक हिसाबकिताब करुइया कल, “हेरी, अठे पानी बा। आब मै काजे बप्तिस्मा नैलेना?” 37[फिलिप कल, “अप्न सारा मनले विश्वास कर्ठी कलसे बप्तिस्मा लिहसेक्ठी।” ऊ जवाफ देल, “येशू ख्रीष्ट परमेश्वरक छावा हुइट कैक मै विश्वास कर्ठुं।”] 38तब ऊ रथ ठह्र्याए लगैल। फिलिप ओ धनसम्पत्तिक हिसाबकिताब करुइया पानी रहल ठाउँम गैल, तबदोस्र फिलिप हुँकहीन बप्तिस्मा देल। 39हुँक्र पानीमसे निक्रल त प्रभुक आत्मा फिलिपह लैगिलन। उ धनसम्पत्तिक हिसाबकिताब करुइया फिलिपह नैदेख्ल, तर खुशी होक गैल। 40फिलिप अपन्हे अश्दोद सहरम पुगल थाहाँ पैल ओ कैसरिया सहर नैपुगट्सम डगरिम पर्ना सब सहरम खुशीक खबर प्रचार कर्टी गैल।
Đang chọn:
प्रेरित 8: thl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2020, Wycliffe Bible Translators, Inc. All rights reserved.
