प्रेरित 25
25
फेस्तसक आघ पावलक मुद्दा
1फेस्तस कैसरियम आक आपन लौव पदभार सम्हल्लक तीन दिन पाछ यरूशलेम गैल। 2मुख्य पूजारीहुँक्र ओ कुछ यहूदी अगुवाहुँक्र उहाँकठे पावल दोषी रलक बात बटोइल। 3हुँक्र पावलह डगरिहेम सिध्यादेना उद्देश्यले यरूशलेमम सारमाङ्गक लाग फेस्तसक आघ बिन्ती कर्ल। 4फेस्तस हुँकन कल, “पावल कैसरियम जेलम बा, ओ मै फे हाली उहाँ घुमजाइकठुँ। 5टुह्रमध्येम कुछ अगुवन म्वारसँग जैहीँ ओ यदि पावल खराब काम कैराखल कलसे, हुँक्र वाकर विरोधम उहँ उजुर करसेक्ठ।”
6फेस्तस आठ-दश दिन पाछ कैसरिया घुम्ल। द्वासर दिन ऊ अदालतम न्याय-आसनम बैठ्क पावलह हाजिर करैना हुकुम देल। 7पावल अइल त यरूशलेमसे आइल यहूदीहुँक्र हुँकहार चारिओर जम्मा हुइल, ओ हुँकहीन गम्भीर बातक अनेकौँ दोष लगैल। तर हुँक्र कौनो दोषक फे प्रमाण देह नैसेक्ल।
8तब पावल आपन बचाउक लाग कल, “मै ना त यहूदीन्हक व्यवस्थक विरोधम, ना त मन्दिरक विरोधम, ना त रोमी सरकारक विरोधम कुछु अपराध कैरख्नु।”
9फेस्तस यहूदीहुँकन खुशी पर्ना उद्देश्यले पावलह कल, “मै टुँहीन यरूशलेमम पठैम, ओ टुँहार मुद्दक फैसला मै उहँ कैदेहम। असिक कर्लसे कसिन हुई?”
10तर पावल जवाफ देल, “नाहीँ! रोमी अदालत त यिह हो। म्वार मुद्दक फैसला यिहँ हुइपरी। मै यहूदीन्हक कुछु खराबी नैकर्लहुइटुँ कना बात अप्नक लाग सब थाहाँ बा। 11यदि मै मृत्युदण्ड पैना कुछु अपराध कैरख्नु कलसे, मै मुना फे तयार बाटुँ। तर यदि हुँकन्हक लगाइल दोष सत्य नैहुइटन कलसे, महीह मुवाइक लाग हिँकन्हक हाँठम सुम्पना अधिकार केक्रो फे नैहो। मै रोमी शासक कैसर म्वार न्याय कैदेहीँ कैक बिन्ती करटुँ।”
12तब फेस्तस आपन सल्लाहकारहुँकनसे सरसल्लाह कर्ल ओ पावलह कल, “टुँ रोमी शासक कैसरक आघ बिन्ती कर्लो। उहओर्से आब मै टुँहीन रोमी शासकक्ठे पठैम।”
राजा हेरोदसे फेस्तसक सल्लाह
13टनिक दिन पाछ फेस्तसह दर्शन करक लाग राजा हेरोद ओ हुँकहार बहिन्या बरनिकी कैसरियम अइल। 14हुँक्र उहाँ धेर दिनसम रहल समयम, फेस्तस पावलक मुद्दक बारेम राजसे बटोइल। ऊ कल, “फेलिक्सक थुनल एकठो कैदी यिहाँ बा। 15मै यरूशलेमम रहल समयम, मुख्य पूजारीहुँक्र ओ यहूदी अगुवाहुँक्र वाकर विरोधम दोष लगैल ओ ओहीह मृत्युदण्ड देहक लाग महीसे कल।
16“तर मै हुँकन कनु, ‘मनैन दोषी नैठह्राइट्सम किहुह फे दण्ड नैदेहपरट्। दोष लगावापाइल मनैया दोष लगुइयन्हक आघ आपन बचाउक लाग बोल्ना मौका पाइपर्ठा। यी रोमी सरकारक नियम हो।’ 17ओहीह दोष लगुइयन यिहाँ अइल त, मै एक्को फे ढिल नैकर्नु। मै द्वासर दिन न्याय-आसनम बैठ्क पावलह अदालतम हाजिर करैना हुकुम देनु। 18तर पावलक विरोधीहुँक्र उठ्क ओहीह लगाइल दोषम मै आपन स्वाँचलअस कुछु खराब बातक दोष नैपैनु। 19हुँकन्हक मुद्दा त हुँकन्हक्के धर्मक बारेम ओ येशू कना मुवल मनैयक बारेम रलहन। पावल उह मुवल येशू फेदोस्र जिरल कैक जिद्दी कर। 20यी विषयम सत्यतथ्य बात कसिक पत्ता लगैना हो कैक मै अलमलम परल रनहुँ। उहओर्से मै ओहीह ‘टुँहार मुद्दा यरूशलेमम जाक फैसला कर्लसे कसिन हुई’ कैक पुछ्नु। 21तर पावल रोमी शासकद्वारा आपन मुद्दक फैसला हुइपर्ना कैक बिन्ती करल। उहओर्से ओहीह रोमी शासकक्ठे पठैना व्यवस्था नैमिलट्सम मै ओहीह थुन्लरना आदेश देरख्नु।”
22तबदोस्र हेरोद कल, “यी मनैयक बात मै अपन्हे सुन पैटुँ त हुइनेरह।”
ओ फेस्तस कल, “अप्न काल सुन्बी।”
पावल राजा हेरोदक सामुन्ने
23द्वासर दिन हेरोद ओ बरनिकी भारी सम्मानसहित सभाभवनम अइल। हुँकन्हक सँगसँग सेनापतिहुँक्र ओ सहरक गन्यमान्य व्यक्तिहुँक्र फे रलह। फेस्तस हुकुम कर्ल त, पावल सभम हाजिर करागैल। 24फेस्तस कल, “राजा हेरोद ओ यिहाँ उपस्थित सब भद्रभलाद्मीहुँक्र, यी मनैयह हेरी, यिहाँक ओ यरूशलेमक सारा यहूदीहुँक्र यहीह मुवैहीपरी कैक माग कर्ठ। 25तर म्वार विचारम यी मनैया ज्यानसजाय पैना हिसाबक कुछु खराबी नैकर्लहो। ओ यी अपन्हे कैसरकठे आपन मुद्दक बिन्ती कर्लकओर्से मै यहीह रोमम पठैना विचार कैरख्नु। 26तर याकर बारेम मै का कैक कैसरह चिठी लिखुँ? यहीह दोष लगैना स्पष्ट कारण त कुछु नैहो। उहओर्से मै यहीह अप्नहुँक्र सबजन्हक सामुन्नेम, खासकैक, हे राजा हेरोद, अप्नक सामुन्नेम, हाजिर करारख्नु। आब हम्र याकर छानबिन कर्बी त, मै कैसरह चिठी लिख बनी कना आशा कैरख्नु। 27काकरकि एकठो कैदीक विरोधम लगागैल दोषक कारण स्पष्ट बिना पर्ल ओहीह शासकक्ठे पठैलसे, वाकर त कुछ अर्थ नैरही।”
Đang chọn:
प्रेरित 25: thl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2020, Wycliffe Bible Translators, Inc. All rights reserved.
