प्रेरित 14
14
पावल ओ बारनाबास आइकोनियन सहरम
1एन्टिओखियम करलअस पावल ओ बारनाबास आइकोनियन सहरम फे यहूदीन्हक सभाघरम जाक असिन किसिमले बोल्ल, कि उहाँ रहल धेर यहूदीहुँक्र ओ गैरयहूदीहुँक्र येशूम विश्वास कर्ल। 2तर विश्वास कर नैचहना यहूदीहुँक्रजुन और गैरयहूदीहुँकन सुर्याक विश्वासीन्हक विरोध कर लगैल। 3पावल ओ बारनाबास उ सहरम धेर दिनसम रल। हुँक्र प्रभुकम भरोसा कैक साहससे बोल्ल। प्रभु हुँकन अचम्म-अचम्मक काम कर्ना शक्ति देलन। असिक उहाँक कृपक बारेम हुँकन्हक ब्वालल् वचन सत्य प्रमाणित हुइल्। 4तर सहरक मनैन्हक बीचम फूट हुइलन। कुई यहूदीन्हकओर लग्ल ओ कुई प्रेरितन्हकओर लग्ल। 5तबदोस्र कुछ गैरयहूदीहुँक्र ओ यहूदीहुँक्र आपन शासकहुँकनसे मिल्क पावल ओ बारनाबासह पत्थ्रले मार्क मुवादेना योजना कर्ल। 6तर हुँक्र उ योजना थाहाँ पैल त, भाग्क लुकोनिया क्षेत्रक लुस्त्रा ओ डर्बी सहर, ओ आसपासक इलाकम गैगिल। 7हुँक्र उ ठाउँम फे खुशीक खबर प्रचार कर्टीरल।
लुस्त्रा ओ डर्बी सहरम
8लुस्त्रा सहरम ग्वारा चलाइ नैसेक्ना एकठो मनैया रह। ऊ जन्मटीक कूँज रलकओर्से कबु फे नैनेङ्ग्लरह। 9पावल प्रचार करबेर उ मनैया ध्यान देक सुनटह। पावल ओहीह एकटक लगाक हेर्ल, ओ “मै चोखाजैम” कना वाकर विश्वास देख्ल। 10तब पावल बरा बोलीले कल, “आपन ग्वारक भरम उठ!” अत्रा कटीसाइट उ मनैया जुरुक्कसे उठल ओ न्याङ्गलागल।
11पावलक करल यी काम देख्क उहाँक मनै आपन लुकोनिया भाषम बरा बोलीले कहलग्ल, “दिउँताओँ मनै होक हमारठे आरल।” 12हुँक्र बारनाबासह जिउस दिउँता कल, ओ पावल मुख्य प्रचारक रलकओर्से हुँकहीन हर्मेस दिउँता कल।#१४:१२ ग्रीकहुँकन्हक मुख्य दिउँता जिउस रलह। हुँक्र उ दिउँता मनैन्हक रक्षा कर्ठ कैक विश्वास करँट्। हर्मेसजुन जिउस दिउँतक छावा रलह, ओ ऊ जिउस ओ और दिउँतन्हक तर्फसे ब्वालँट्। 13जिउस दिउँतक मन्दिर सहरक गेटसे बाहर लग्घ रह। उ मन्दिरक पूजारी नट्वन ओ फूलमाला लेक सहरक गेटम अइल, काकरकि हुँक्र सबजन बलि चह्राक पावल ओ बारनाबासक पूजा कर चहल।
14यी बात थाहाँ पैटीकि प्रेरितहुँक्र बारनाबास ओ पावल आपन-आपन झुल्वा चिँठ्ल#१४:१४ आपन-आपन झुल्वा चिँठ्ल: यहूदीहुँकन यदि कौनो मनैया परमेश्वरक अपमान करटा जसिन लग्लन कलसे, उ अवस्थम आपन-आपन झुल्वा चिँठ्क कर्रा विरोध जनैना हुँकन्हक चलन रलहन। ओ मनैन्हक भीडम दगुर्टी जाक बरा बोलीले कल, 15“नाहीँ, टुह्र यी का करटो? हम्र फे त टुन्हकअस दुःख-सुख भोग्ना मनै हुइटी। हम्र टुँहन असिन बेकार काममसे घुमाक जीवित परमेश्वरकठे लैजाइक लाग खुशीक खबर प्रचार कर आरली। स्वर्ग, पृथ्वी, समुद्र ओ उहिँम रहल सब थोक बनुइया उह परमेश्वर हुइट।#प्रस २०:११; भज १४६:६ 16हुइना त उहाँ अघट्टेक मनैन ज्या मन लग्लन उह धर्म मान देल, 17तर उहाँ असल ओ भलो काम कर्टीआइलबाट कना बातक प्रमाण देटीबाट। उदाहरणक लाग, उहाँ आकाशमसे पानीक झरी पठादेठ ओ ठीक समयम बालीनाली फरादेठ। उहाँ टुन्हक लाग खैना चिज प्रशस्त जुटादेक टुन्हक मन आनन्दले भरदेठ।” 18अत्रा कैक बारनाबास ओ पावल मुस्किलसे मनैन रोक्ल, काकरकि हुँक्र बलि चह्राक पावल ओ बारनाबासक पूजा कर चाहल रलह।
19पाछ कुछ यहूदीहुँक्र एन्टिओखिया ओ आइकोनियनसे उहाँ अइल, ओ भीडक मनैन सुर्याक पावलकम पत्थ्रा बर्साइ लगैल। हुँक्र पावल मुगैल्हुई कैक हुँकहीन सहरसे बाहर घँस्यैटी लैगिल। 20तर जब विश्वासीहुँक्र पावलक आञ्जरपाञ्जर जम्मा हुइल, तब ऊ उठ्ल ओ सहरम घुम्क गैल।
द्वासर दिन पावल बारनाबासक सँग डर्बी सहरम गैल।
सिरिया क्षेत्रक एन्टिओखियम
21हुँक्र उ सहरम खुशीक खबर प्रचार कर्ल ओ धेर जन प्रभु येशूम विश्वास कर्ल। तबदोस्र हुँक्र उहाँसे लुस्त्रा, लुस्त्रासे आइकोनियन, आइकोनियनसे पिसिदिया क्षेत्रक एन्टिओखिया सहरम घुम्ल। 22हुँक्र हरेक सहरम विश्वासीन बलगर बनैल ओ येशूम विश्वास कर्लरहपर्ना बातक उत्साह देटी कल, “हम्र परमेश्वरक राज्यम जाइक लाग धेर दुःखकष्ट सहपर्ठा।” 23पावल ओ बारनाबास हरेक मण्डलीम एल्डरहुँकन नियुक्त कर्ल। हुँक्र ब्रत रह्क प्रार्थना कर्ल ओ आपन विश्वास करल प्रभु येशूक रेखदेखम हुँकन सुम्पदेल।
24तबदोस्र हुँक्र पिसिदिया क्षेत्र हुइटी पामफिलिया क्षेत्रम गैल। 25हुँक्र पर्गा सहरम परमेश्वरक वचन प्रचार कर्ल, ओ पाछ अटालिया सहरम गैल।
26हुँक्र उहाँसे पानीजहाजम चिहुर्क सिरिया क्षेत्रक एन्टिओखिया सहरम घुम्ल। यिह सहरम विश्वासीहुँक्र पावल ओ बारनाबासह परमेश्वरक रेखदेखम सुम्पलहन ओ प्रचार कर्ना कामम पठैलहन। हुँक्र आपन काम पूरा कैक उह ठाउँम घुम्ल। 27हुँक्र एन्टिओखियम पुग्ल त, मण्डलीक मनैन जम्मा करैल। हुँक्र परमेश्वर उहाँक वचन प्रचार कर्ना कामम हुँकन सहायता कर्लक, ओ गैरयहूदी मनैन येशूम विश्वास कर्ना मौका देलक बात सुनैल। 28हुँक्र उ सहरम विश्वासीन्हकसँग धेर दिनसम रल।
Đang chọn:
प्रेरित 14: thl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2020, Wycliffe Bible Translators, Inc. All rights reserved.
