१ कोरिन्थी 1
1
1यी चिठी परमेश्वरक इच्छासे ख्रीष्ट येशूक प्रेरित हुइक लाग बोलावट पाइल मै पावल ओ हमार भाइ सोस्थेनेससे हो। 2मै कोरिन्थ सहरम रहल परमेश्वरक मण्डलीह यी चिठी लिखटुँ। टुह्र परमेश्वरक पवित्र जन हुइक लाग उहाँ टुँहन बलैल। उहाँ ख्रीष्ट येशूद्वारा टुँहन पवित्र बनैल, जसिन कि प्रभु येशू ख्रीष्टह पुकारा कर्ना सारा ठाउँक सबजहन उहाँ पवित्र जन हुइक लाग बलैल। उहाँ जो हुँकन्हक ओ हमार प्रभु हुइट।#प्रे १८:१
3हमार परमेश्वर बाबा ओ प्रभु येशू ख्रीष्ट टुँहन अनुग्रह ओ शान्ति देहीँ।
धन्यवाद चह्रैना काम
4टुन्हक लाग ओ परमेश्वर टुँहन ख्रीष्ट येशूद्वारा देलक अनुग्रहक लाग मै सड्ड परमेश्वरह धन्यवाद देठुँ। 5काकरकि परमेश्वर उहाँद्वारा टुँहन हरकिसिमले बोलीवचनम ओ ज्ञानम समेत धनी बनारख्ल। 6यी बातले ख्रीष्टक बारेम हमार देहल गवाही सत्य प्रमाणित होरहल। 7उहओर्से हमार प्रभु येशू ख्रीष्ट फेदोस्र अइना बट्या ह्यारबेर टुन्हकम कौनो आत्मिक वरदानक कमी नैहो। 8हमार प्रभु येशू ख्रीष्ट अइना दिनम टुह्र निर्दोष रबो कैक उहाँ टुँहन अन्तिमसम बलगर करैलरह्हीँ। 9परमेश्वर विश्वासयोग्य बाट। उहाँ आपन छावा हमार प्रभु येशू ख्रीष्टक सङ्गतिम रहक लाग टुँहन बलैल।
मण्डलीम मतभेद
10भैयौ, प्रभु येशू ख्रीष्टक नाउँम मै टुँहन बिन्ती करटुँ, कि टुह्र एक-आपसम मिल्क रहो। टुन्हक बीचम फूट जिन ह्वाए, बेनसे टुह्र एक मनक ओ एक विचारक होओ। 11म्वार भैयौ, टुन्हक बीचम झग्रा परल बात क्लोए कना मनैयक घरपरिवारसे मै सुनरख्नु। 12म्वार सुनल बात का हो कलसे, टुह्र कुई “मै पावलक हुइटुँ,” कुई “मै अपोल्लोसक हुइटुँ,” कुई “मै पत्रुसक हुइटुँ,” ओ कुईजुन “मै ख्रीष्टक हुइटुँ” कठो हुँ।#प्रे १८:२४
13का ख्रीष्ट भागबन्डा लागरल? का पावल टुन्हक लाग क्रूसम बलिदान हुइलह? का टुह्र पावलक नाउँम बप्तिस्मा लेलहो? 14परमेश्वरह धन्यवाद बा, कि मै टुह्रमध्ये क्रिस्पस ओ गायसह बाहेक और किहुह फे बप्तिस्मा नैदेलहुँ।#प्रे १८:८; १९:२९; रोम १६:२३ 15उहओर्से टुह्र म्वार नाउँम बप्तिस्मा लेलो कैक कुई फे कह पउइया नैहो। 16(हो, मै स्तिफनसक घरपरिवारन फे बप्तिस्मा देनहुँ। यी बाहेक मै और किहुह बप्तिस्मा देलक महीह थाहाँ नैहो।)#१ कोर १६:१५ 17ख्रीष्ट महीह बप्तिस्मा देहक लाग नाहीँ, खुशीक खबर प्रचार करक लाग पठैलह। मै प्रचार करबेर बुद्धिमान हिसाबले नैबोल्नु, नकि त क्रूसम हुइलक ख्रीष्टक मृत्युक शक्ति बिनकामक हुइनेरह।
क्रूसक सन्देश
18क्रूसम हुइलक ख्रीष्टक मृत्युक प्रचार नाश हुउइयन्हक लाग मूर्ख बात हो, तर हम्र मुक्ति पउइयन्हक लाग परमेश्वरक शक्ति हो। 19अस्तह बात धर्मशास्त्रम लिखल बा,
“मै बुद्धिमान मनैयक बुद्धिह नाश कैदेहम
ओ विद्वान मनैयक ज्ञानह रद्द कैदेहम।”#यशै २९:१४
20खै बुद्धिमान मनै कहाँ बाट? खै शास्त्रीहुँक्र? संसारम बुद्धि लरुइयन कहाँ बाट? का परमेश्वर यी संसारक बुद्धिह मूर्ख नैबनैल?#अयू १२:१७; यशै १९:१२; ३३:१८; ४४:२५ 21संसारक मनै आपन ज्ञानबुद्धिक शक्तिले परमेश्वरह चिन्ह नैसेकहीँ कना बात उहाँ आपन बुद्धिले ठहरैल। उहओर्से उहाँ हमार प्रचार करल मूर्ख बातले विश्वास करुइयन बचाइ चहल। 22यहूदीहुँक्र प्रमाणक लाग स्वर्गक चिन्ह मङ्ग्ठ ओ ग्रीकहुँक्रजुन संसारक बुद्धि खोज्ठ। 23हम्र त ख्रीष्ट क्रूसम टङ्गावापैल कैक प्रचार कर्ठी। यी बात यहूदीन्हक लाग ठ्यास लग्ना बात हुइल्, ओ और जातिन्हक लाग मूर्ख बात हुइल्। 24तर परमेश्वरक बलाइल मनैन्हक लाग, चाहा यहूदी, चाहा ग्रीक, ख्रीष्ट जो परमेश्वरक शक्ति ओ बुद्धि हुइट। 25काकरकि परमेश्वरक यी मूर्ख योजना मनैन्हक सारा बुद्धिसे बुद्धिमानी बा, ओ परमेश्वरक कमजोरी मनैन्हक सारा बलसे फे शक्तिशाली बा।
26भैयौ, परमेश्वर टुँहन बलाइल समयम टुह्र कसिन रलहो? उ विचार करो। मनैन्हक हिसाबले टुह्र धेर जन बुद्धिमान्, या शक्तिशाली या खानदानी नैरलहो। 27तर बुद्धिमान मनैन शरमम पारक लाग परमेश्वर संसारम मूर्ख मानगैल् बातह रोज्ल, ओ शक्तिशाली मनैन शरमम पारक लाग परमेश्वर संसारम कमजोर मानगैल् बातह रोज्ल। 28संसारम महान मानगैल् बातह बिनकामक बनाइक लाग परमेश्वर संसारम हेल्हा कैगिल् ओ तुच्छ मानगैल् बातह रोज्ल। 29परमेश्वरक उपस्थितिम कुई फे घमण्ड कर नैसेकी कना उद्देश्यले उहाँ यी कर्ल। 30परमेश्वर टुँहन येशू ख्रीष्टकसँग एक बनारख्ल, ओ उहाँ ख्रीष्टह हमार बुद्धि बनैल। ख्रीष्ट हमन परमेश्वरक आघ धर्मी ठह्रैल, हमन पवित्र बनैल ओ हमन पापमसे छुट्कारा देल। 31उहओर्से धर्मशास्त्रम लिख्गैल् बा, “गर्व करुइया प्रभुक करल कामम गर्व करपर्ठा।”#यर ९:२४
Đang chọn:
१ कोरिन्थी 1: thl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2020, Wycliffe Bible Translators, Inc. All rights reserved.