1 Tesalonikɩ 1

A Pol nɩ a ʋ taabɛ puore nɩ a Tesalonikɩ tẽw kɩrɩta-nɩbɛ

1A mãa Pol, nɩ Sɩlvɛ̃, de nɩ Timote, tɩ tɩrɛ nɩ a sɛbɛ ŋa kʋ̀rɛ a Tesalonikɩ tẽw Lãw-yir, a Naaŋmɩn Sãà nɩ a Sore Yeezu Kɩrɩta na so a. A maalʋ nɩ a ƴã-ɓaarʋ, a be a nyɩ zie.

A Tesalonikɩ tẽw kɩrɩta-nɩbɛ nyɔ-vʋʋrʋ nɩ a bɛ naaŋmɩn-sàw-deb

2Tɩ mɩ́ puore nɩ Naaŋmɩn yãanɩ kʋralɛ a nyɩ za ƴãw, ɛ́ tɩɛrɛ a nyɩ yele kʋralɛ a tɩ puoru pʋɔ. 3Bʋ̃ʋ n'ʋ vɛ̃, a Naaŋmɩn tɩ Sãà niŋé a, tɩ mɩ́ lɛb'a bãwnɩ a nyɩ naaŋmɩn-sàw-deb tome, a nyɩ nɔ̃wfʋ na nyɛrɛ bàlʋ a, nɩ a tɩɛrʋ nyɩ na ƴãw kpɛ̃w za a tɩ Sore Yeezu Kɩrɩta ƴãw a. 4Tɩ bãwnɩ a na, yɛbr i, a Naaŋmɩn na nɔ̃w nyɩ ɛ́ kaa ír nyɩ a. 5Bʋ̃ʋ n'ʋ vɛ̃, a Yel-nʋ̃ɔ̀ tɩ na wa manɩ kʋ̀ nyɩ a bɛ tɩ ɩ ƴɛ̀rʋ tɛwr tɩ ƴɛ̀r ɛ, a tɩ lãw nɩ nɩ kpɛnʋ nɩ sõwfʋ na yi a Vʋʋrʋ Sõw zie a, bʋnʋ mɩ̀ bɛ tɩ ka be ɩ. Ɛ́ nyɩ bãw nɩ a lɛ tɩ na ɩ a nyɩ sɔgɔ a nyɩ vla ƴãw a. 6Ɛ́ a nyɩɩm a, nyɩ cɔwrɩ tɩ na, tɩɩm nɩ a Sore. Nyɩ tɩ be n kpɩɛrʋ na bɛ dɩ vuo a pʋɔ, ɛ́ sàw de a Naaŋmɩn ƴɛ̀rʋ nɩ nʋ̃ɔ̀ na yi a Vʋʋrʋ Sõw zie a. 7Lɛ n'a nyɩ lɩɛbɩ nɩbɛ a Masedʋan nɩ a Akayi ten naaŋmɩn-sàw-dierbɛ za na cɔwrɛ a. 8Bʋ̃ʋ n'ʋ vɛ̃, a Masedʋan nɩ a Akayi ten tɛwr bɛ n'a a Sore ƴɛ̀rʋ yi a nyɩ zie ɛ́ hieri tɩ tɔ ɩ, a nyɩ naaŋmɩn-sàw-deb yele ta n a ziir za, a dɛ bɛ lɛb tɛr tɩ na ƴɛ̀rɛ a ƴɛ̀rʋ ɛ. 9A nɩbɛ za na ƴɛ̀rɛ a tɩ ƴɛ̀rʋ a mɩ́ manɛ nɩ a lɛ nyɩ na de tɩ a sãanʋ, a lɛn daar tɩ na tɩ wa a nyɩ zie a, nɩ a lɛ nyɩ na tɩ zawrɩ a tɩbɛ bɛr ɛ́ tu a Naaŋmɩn kɛ́ nyɩ tone ʋ, ʋl na ɩ Naaŋmɩn-vʋʋra nɩ Naaŋmɩn-sɩza a. 10Nyɩ gùre nɩ a Yeezu, a ʋ Bie, na na yi a tẽ-vla pʋɔ lɛb wa a, ʋl ʋ na ɩ k'ʋ lɛb yi a kũuni pʋɔ a, ʋl na faarɛ tɩ a Naaŋmɩn ƴɛ̀rʋ maalʋ bibir na pɩɛl'a ƴãw a.

Đang chọn:

1 Tesalonikɩ 1: DBDC

Tô màu

Sao chép

So sánh

Chia sẻ