Amós 3
3
Israel y Judá runakunata Tayta Dios juzgananpaq nishqan
1Israel y Judá runakuna, Egiptupita jorqamushuqniki Tayta Dios kayno nishqanta mayapäkuy:
2<<Kay patsacho tsaytsika runakuna kaptinpis qamkunalatami akrashqä kuyashqä runakuna kanaykipaq.#Deut. 7.6.
Tsaymi jutsata rurapäkushqaykipita castigashayki>>.
3Maypapis ishkan aywananpaqqa puntata wilanakunraqmi.
4Leonpis munticho qaparan uywata mikunanpaq tarirraqmi.
León malwapis machaypita chikikamun mikunanpaq tsarirraqmi.
5Pishqukunapis trampaman yaykun ima mikuytapis churapaptinraqmi.
Ima uywatapis tsarirraqmi trampapis juchun.
6 Cornëtatapis tukan markacho imapis mantsariypaq kaptinraqmi.
Tsaynölami markacho ima desgraciapis pasan Tayta Dios castigaptinraq.#Job 2.10; Isa. 45.7.
7Sirviqnin profëtakunata manaraq wilarqa Tayta Dios manami imatapis espantaypaq kaqkunata rurantsu.#Gén. 18.17-19; Jer. 7.25; Dan. 9.10.
8León qaparashqanta mayar ¿piraq mana mantsakunmantsu?
Tayta Dios nishqanta mayar ¿piraq mana wilakunmantsu?#Jer. 20.9; 1Cor. 9.16.
9Wilakuqkuna, Asdod markaman aywaykur nishqäta palaciuncho reyta wilapay.
Egiptumanpis aywaykur nishqäta palaciuncho reyta wilapay.
Wilapar kayno nipäkunki:
<<Samaria markaman y nawpan jirkankunaman lapayki shapäkamuy.
Tsaychömi rikapäkunkipaq markacho lutanta rurarkaykaqta y mana kuyapaypa runakunata nakarkaykätsiqta.
10Paykunaqa ali rurayta manami yachapäkuntsu.
Suwakushqalantami palaciunkunachöpis tsararkaykan>>.
11Tsayno kashqanpitami Samaria runakunata Tayta Dios kayno nin:
<<Contraykikuna maytsaypita shamurmi atacashunkipaq.
Amparakunaykipaq sharkatsishqayki jatusaq perqa murällakunatapis lapantami juchutsinqapaq.
Palaciuykikunapitapis lapan tarishqantami apakärinqapaq>>.
12 Tayta Diosmi kayno nin:
<<Uyshata leonpa shiminpita qechuptin atakshulan o rinrilan quëdashqannölami Samariacho taq Israel runakunapis walkaqla quëdanqa.
Damascupita rantimushqan kuyaylapaq sillëtacho jamaraq runakunapis walkaqlami quëdanqa>>.
13Lapanta mandaq Tayta Dios kaynömi nin:
<<Nishqäkunata shumaq mayapäkuy.
Jacobpita miraq lapan runakunata kayno wilapäkuy:
14<Jutsa rurashqanpita Israel runakunata juzganä junaq Bet-elcho kaykaq altarkunata lapantami ushakätsishaq.#2Rey. 23.15.
Ushakätsiptïmi altarpa esquïnancho kaykaq waqrankuna pakikar pampaman shikwanqa.
15Usya witsan tänanpaq ruratsishqan wayitapis y tamya witsan tänanpaq ruratsishqan wayitapis lapantami juchutsishaq.
Marfilwan adornashqa wayikunatapis lapantami juchutsishaq.
Lapan jatun wayikunatami ushakätsishaq> >>.
Tayta Diosmi tsayno nin.
Đang chọn:
Amós 3: qvmB
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2003, Wycliffe Bible Translators, Inc. All rights reserved.