Jonah 2
2
Alaye Jonah kar zin Ta̱mu̱ta̱dde̱n keela nonno
1Ala Jonah Manyi Ta̱mu̱ta̱dde̱n cinne kenge ci u̱lu̱gto̱ ecito. 2Azi enne ne:
“Imma bali ngati kapirnane, kala anna Manyi
kar zin enne abarizekan.
Bali ngati kaave anna daiza orgena, kawu anna zar cigunnek,
kar zin i̱nna̱ zik u̱lu̱wa̱ cinanni.
3U̱ju̱ke̱ya̱ i̱nna̱ annit nginti u̱u̱ni̱,
a̱ju̱ke̱ka̱ liil orgen ele,
a̱ri̱k tawani aburukka annit ne riu,
kar bo̱do̱k maama cik komiz cunne
aburukka ele cinanni do̱o̱k.
4Kazi anna ne, ‘Kacinni u̱ju̱ke̱ya̱ bali i̱nna̱ annit tu̱
ngu̱me̱ cunne;
ngen zin atin anna kacinni dee
Ce̱e̱ze̱ cunne a̱li̱le̱.’
5Orong maama cik aburuka ko̱ kegerzantan,
uburuwa annit buuluc ci u̱u̱ni̱;
a̱lu̱ce̱ arte cik li̱i̱lu̱ oowe cinanni.
6Kutudude bali anna maame kuk rok egero cik biyenu lo̱o̱ta̱;
a̱gga̱ma̱ zin annit looci lo̱o̱ta̱ udut.
Ma̱i̱je̱ i̱nna̱ obodane ruget cinanni lo̱o̱wa̱ ka̱vvu̱ ta̱dde̱na̱,
Manyi Ta̱mu̱ta̱dde̱n cinanni.
7Baling okko rugeti cinanne orong ki̱zzi̱,
ka̱a̱da̱nni̱ zin anna i̱nne̱ta̱, Manyi,
kar lawinet cinanni kuzucai i̱nne̱ta̱,
Ce̱e̱ze̱ cunne a̱li̱le̱.
8Imma ol wak azunne kaal cik adimanai azzine
kizeto ta̱mu̱ta̱dde̱ne̱t cik iróng anyak doiz ko̱
alam deten ci Ta̱mu̱ta̱dde̱no̱ ci weda een cinne̱ng.
9Ma̱i̱je̱ anna, ke̱be̱ne̱ki̱ lo̱ng ci kaanyi zany,
kar atin kapahei wawac.
Kar zoz ci kodola ko̱, kogonni atin anna kubunna.
A̱kku̱ ti̱ri̱ze̱ne̱t ngati Manyi.”
10Kar zin Manyi ku̱du̱wa̱k u̱lu̱gi̱t, kar zin enne katazahak Jonah liil ti̱ti̱m.
Đang chọn:
Jonah 2: tex
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2018, Wycliffe Bible Translators, Inc. All rights reserved.