Ireevi 24

Á mẹ vọrọ ka aa tẹsị ozotupa ana yà ịnị Ajẹngụ Ohomorihi

(Kụra 27.20-21)

1Ẹnẹyịmavara ộ kà a yị Imosiisi ka 2Ọ̀ kà a yị Anisirẹrị nịnị ka ẹ̀ sị angwẹ orivi ene zoza hu kere-kere vẹ, dị à sị tụ ịnị ozotupa ana ya ịnị ajẹngụ ọnị Ẹnẹyịmavara, agụvị dị ịra ọọ za pooro kẹnẹ. 3Ozotupa ọnọọ vị ana a vaa sị tụ eyi ẹhẹ ọvịdị ịta ana a sị jị ịzị a sị apoti oto tụ oruva-oruva Eerọnị vaa sị ịraa da a dị ọọ za naa ngụ ẹnẹnẹ eyinẹhẹ anị nị. Aanị ẹ́ mẹ vaa saasa ọda ọnọnị pooro nị. 4Ịrẹsụ ọchị ozotupa ana á wụ́ igooru obobooro ku á vaa sị ozotupa ọnọọ tụ, dị Eerọnị aa tẹsị anị nị. Aa nyị ka ò ré ka ozotupa ọnọọ aa za pooro kẹnẹ ọvịdị Ẹnẹyịmavara.

Ịbụrẹdị ana aā sị vẹ ịnị Ajẹngụ Ohomorihi

5 # Kụra 25.30 Ẹnẹyịmavara kà Imosiisi ọ̀ ká ayị ọyịkwọ ene zoza dị ẹ sị mẹ ịbụrẹdị ẹwụrẹva. Ẹ̀hụ ayị ikirogirami ẹẹva avọọ a vaa sị mẹ ịbụrẹdị ikonyi ikonya nị. 6Dị o tò wa ịhịnọnyị-ịhịnọnyị tụ ịnị ọrọ ẹẹva tụ ịrẹsụ itevuru ana á wụ́ igooru obobooro ku nị. 7Ọ kà Imosiisi ọ̀ sị eturare obooro pe ọrọ ikonyi-ikonya. Ọnị ọ vaa sị zụ Ẹnẹyịmavara kà aa sị avaba ịbụrẹdị ẹnẹnị va yọ nị. 8Avaba ẹkụhị ọnị ọza ẹ̀ yị ma mẹ̀ ụkọrọ, ọvịdị Ẹnẹyịmavara pooro yị Anisirẹrị nịnị. Ịzẹzẹ ọ vị yị wa pooro nị. 9#Imt 12.4; Ịmk 2.26; Irk 6.4Eerọnị ọnịrị ezi anị ẹ nyị ịbụrẹdị ọnọọ nị. Aha ana a kà yaa rị ọ, ẹnịnị vaa yaa rị ọ nị, agụvị ka ịsa Ohomorihi ịnya kẹnẹ ọ vị nị, ịnị ịsọyịrị ana a sị va yị Ẹnẹyịmavara ọ vị nị.

Ọda ana za ọza ana ka chire Ohomorihi

10Â nyị ọnọrụ ọnya aanị, ana ada anị vị Anijipiti, dị ọnyị anị vị Anisirẹrị nị. Ẹkụhị ọnya, ọnịrị Anisirẹrị nịnị ệ zị jịnẹ, dị ọnịrị Anisirẹrị ọnya zyaazị nị. 11Ọnọrụ ọnị ọnyị anị vị Anisirẹrị aanị ộ kà chire ịrẹha Ẹnẹyịmavara, dị ọ́ kụ̀ ọ ụhụ ẹ́ mẹ vavọọ aa zyaazị nị. Dị ẹnịnị za a ve tu Imosiisi nị. Ịrẹha ọnyị anị ọ rị Iseromiti nị, ozi ọnọrụ ọnya ana aā hị́ Idibiri ana vị Anịdanị ọnyị anị ọnọnị vị nị. 12Ẹnịnị ệ za a, dị ẹ nyị ọza ka ò sị eyi pe e dị ẹnị ẹ̀ na họ̀ Ẹnẹyịmavara ịsị o sì ka a mẹẹ nị. 13Ẹnẹyịmavara ộ kà a yị Imosiisi ka 14Ọ̀ sị ọza ana kụ ọnị ụhụ aanị tụ ẹhẹ hụrị udi ẹnịnị. Avaba aza ana wụ ka ộ kụ ọnị ụhụ ẹ̀ sị ụvọ tụra a ịrẹsụ dị ẹ̀ dọ ivenu ka ộ rị ịvị. Ẹ̀ẹ vavọọ raa dọ ivenu, dị avaba anẹkụra ẹ̀ sị ịrẹta-ịrẹta wụ̀ ọ. 15Ọ kà Imosiisi ọ̀ kà a yị Anisirẹrị nịnị ka ọza tụra ọza ana àa kụ Ohomorihi anị ụhụ vị ana vaa rị ụya ịvị ọnị ọ mẹ̀. 16Ọza ana àa ka kẹnẹ-kẹnẹ chire ịrẹha Ẹnẹyịmavara vị ana á vaa wụ̀; avaba ịragụ ẹ̀ kụ̀ ọ ịrẹta. Àa vị ọzọga, àa vị ozi ẹtẹ ọ kà kẹnẹ-kẹnẹ chire ịrẹha Ẹnẹyịmavara nị, à wụ̀ ọ. 17#Kụra 21.12Ọza ana àa wụ̀ ọza, vị ana á vaa wụ̀. 18Ọza ọ̀ọ wụ̀ ịsụpa ọza ẹnẹsa, ọ̀ sị ọsa dọ ọ ịrẹsụ yọ ọda anị ọ vị ka, ịsa ana nyị ụhwẹ a vaa sị dọ ịsa ana nyị ụhwẹ ịrẹsụ nị. 19Ọza ana àa tọ̀ ọnọhụva anị ụnava, vị ana a vaa tọ̀ ụnava anka ọ́ mẹ tọ̀ ọnọhụva anị. 20#Kụra 21.23-25; Ọda 19.21; Imt 5.38Òo che ọza ẹchụkụ, è re che ọnị ẹchụkụ, ọ̀ọ tụ ọza eyi ọnya, à rẹ tụ ọnị eyi ọnya; òo hu ọza anyị ọnya, à re hu ọnị anyị ọnya. Ụnava ọnị ọ̀ọ tọ̀ ọza kẹnẹ a rẹ vaa tụ ọnị nị. 21Ọza anaaa wụ̀ ịsụpa ọza ẹnẹsa, ọ vaa sị ịsụpaa dọ ọ ịrẹsụ yọ, ama ọza anaaa wụ̀ ọza vị ana vaa wụ̀. 22#Ịrị 15.16Ọ kà ọda ọnyara ẹ́ vaa mẹẹ yị ọzọga ọnịrị ozi ẹtẹ nị; agụvị ka ọnị ọ vị Ẹnẹyịmavara Ohomorihi ẹnịnị nị. 23Ịjị Imosiisi maanị sị ọsọnị ka yị Anisirẹrị nịnị, ẹnịnị ệ sị ọza ana kụ Ẹnẹyịmavara ụhụ aanị tụ ẹhẹ hụrị udi, dị ẹ sị ịrẹta-ịrẹta wụ̀ ọ nị. Aanị Anisirẹrị nịnị mẹ mẹ ịsị ọnị Ẹnẹyịmavara mẹ ọda yị Imosiisi nị.

Đang chọn:

Ireevi 24: EBTP

Tô màu

Sao chép

So sánh

Chia sẻ